መስከረም 1, 2021| የታደሰው፦ ጥቅምት 25, 2023
ሩሲያ

ወቅታዊ መረጃ—ወንድም ታሰረ| ወንድም አሌክሲ ካባሮቭ መጸለዩ እና የአምላክን ቃል ማንበቡ ድፍረት ሰጥቶታል

አጫውት

ጥቅምት 20, 2023 በፕስኮቭ ክልል የሚገኘው የፖርኮቭስኪ አውራጃ ፍርድ ቤት ወንድም አሌክሲ ካባሮቭ ጥፋተኛ ነው የሚል ብይን ያስተላለፈ ሲሆን የሁለት ዓመት ከስድስት ወር እስራት ፈርዶበታል። ይህ ፍርድ የተላለፈው ወንድም አሌክሲ ነፃ እንዲለቀቅ ቀደም ሲል የተላለፈውን ብይን አቃቤ ሕጉ ይግባኝ ካለ በኋላ ነው። ወንድም አሌክሲ ለፍርድ ሲቀርብ ይህ ሦስተኛ ጊዜው ነው። ከፍርድ ቤት በቀጥታ ወደ ወህኒ ተወስዷል።

ሰኔ 27, 2022 በፕስኮቭ ክልል የሚገኘው የፖርኮቭስኪ አውራጃ ፍርድ ቤት ወንድም አሌክሲ ካባሮቭ ጥፋተኛ አይደለም የሚል ብይን አስተላልፏል። አሌክሲ ከተመሠረቱበት ክሶች በሙሉ ነፃ ተደርጓል።

የክሱ ሂደት

ኅዳር 26 2021 የፕስኮቭ ክልላዊ ፍርድ ቤት የአሌክሲን ይግባኝ ተመልክቷል። ክሱ በመጀመሪያው ፍርድ ቤት በሌላ ዳኛ እንዲታይ ውሳኔ አስተላልፏል። ወንድም አሌክሲ ካባሮቭ በአሁኑ ወቅት ወህኒ አይወርድም
መስከረም 7, 2021

በፕስኮቭ ክልል የሚገኘው የፖርኮቭስኪ አውራጃ ፍርድ ቤት፣ አሌክሲ ጥፋተኛ ነው በማለት የሦስት ዓመት የገደብ እስራት ፈረደበት።
ጥቅምት 29, 2020

የአሌክሲ ጉዳይ በፍርድ ቤት መታየት ጀመረ
ነሐሴ 28, 2020

አሌክሲ አማኞች ‘ስለ እምነታቸው በሚነጋገሩበት፣ መጽሐፍ ቅዱስን በሚያነቡበት፣ ቅዱስ ጽሑፋዊ ጉዳዮችን በሚወያዩበትና ሃይማኖታዊ መዝሙሮችን በሚዘምሩበት’ “ሃይማኖታዊ ስብሰባ ላይ ቀናተኛ ተሳትፎ በማድረግ” ወንጀል ክስ ተመሠረተበት
የካቲት 7, 2020

አሌክሲ ለሁለተኛ ጊዜ የወንጀል ምርመራ ተደረገበት። ስልኩ በ2018 ተጠልፎ እንደነበር በምርመራው ወቅት ታወቀ
ጥር 31, 2020

አሌክሲ የወንጀል ክስ ተመሠረተበት
ግንቦት 24, 2019

አሌክሲ በፕስኮቭ ክልል ለሚገኘው የሰብዓዊ መብቶች እንባ ጠባቂ ተቋም አቤቱታውን በጽሑፍ አስገባ። አሌክሲ ወንጀለኛ ሳይሆን አማኝ እንደሆነ አበክሮ ገለጸ። እንባ ጠባቂ ተቋሙ፣ አሌክሲ እምነቱን የመያዝና የማራመድ መብት እንዳለው በመግለጽ ምላሽ ሰጠ
ሚያዝያ 3, 2019

የአሌክሲ ቤት ተፈተሸ፤ አንዳንድ ንብረቶቹ ተወረሱ፤ እንዲሁም ፖሊሶች የወንጀል ምርመራ አደረጉበት

አጭር መግለጫ

አሌክሲ ካባሮቭ

የትውልድ ዘመን፦ 1975 (ቡርትሴቭስካያ፣ አርሃንግዬልስክ ክልል)

ግለ ታሪክ፦ ከጓደኞቹ ጋር ተራራ መውጣት ያስደስተዋል። ቤቶችን በማደስ ሥራ ተሰማርቷል። በጦር ሠራዊት ውስጥ ያገለግል በነበረበት ወቅት የሕይወትን ዓላማ ለማወቅ ፍላጎት አደረበት። መልስ ለማግኘት ባደረገው ጥረት ከይሖዋ ምሥክሮች ጋር መጽሐፍ ቅዱስን ማጥናት ጀመረ። በ2000 ተጠመቀ

የሰጠው ሐሳብ

ልብህን የነካህና ለመጽናት የረዳህ አበረታች ሐሳብ አለ?

ፖሊሶቹ ቤቴን በፈተሹበት ወቅት ቻይና ውስጥ ለአራት ዓመት ብቻውን ስለታሰረው ስለ ሃሮልድ ኪንግ ማሰብ ጀመርኩ። አሁን ደግሞ የእኔ ተራ እንደሆነ ተሰማኝ። አቋራጭ መንገድ ተጠቅሜ ከስደት ለማምለጥ አስቤ አላውቅም! በተደጋጋሚ ለራሴ እንዲህ እል ነበር፦ ‘አሁን የእኔ ተራ ነው። ታዲያ ምን አደርግ ይሆን?’ እንዲህ እያልኩ ማሰቤ ብርታት ሰጥቶኛል።

በዚህ ፈተና ወቅት ይሖዋ ምን እንዲያደርግልህ ትጸልይ ነበር?

ሌሎች መጨነቄን እንዳያዩ . . . እንዲሁም ምንጊዜም የተረጋጋሁ መስዬ እንድታይ እጸልይ ነበር። አሳዳጆቻችን . . . ተስፋ ሊያስቆርጡኝ እንዳልቻሉ፣ አሁንም እንዳልተሸነፍኩና ብቻዬን እንዳልሆንኩ እንዲያዩ ፈልጌ ነበር። ይሖዋ በዚህ ረገድ በእጅጉ ረድቶኛል! አሁንም ድረስ ፍርድ ቤት ስቀርብ ቀልድ ጣል በማድረግ ውጥረቱን ለማርገብ እሞክራለሁ፤ ዳኛውም ለዚህ ጥሩ ምላሽ ሰጥተዋል።

ደፋር ለመሆን እንዲሁም ደስታህን ጠብቀህ ለመጽናት የረዳህ ጥቅስ የትኛው ነው?

መዝሙር 27:14 . . . ፈተና በሚያጋጥመኝ ወቅት ምን ማድረግ እንዳለብኝ ለማወቅ ረድቶኛል። “ይሖዋን ተስፋ አድርግ” የሚለው ሐረግ በዚህ ጥቅስ ውስጥ ሁለት ጊዜ ይገኛል። . . . ወደ ፍርድ ቤት ስገባ ይህን ጥቅስ ደጋግሜ እለው ነበር፤ በዚህ ጊዜ አስደናቂ ብርታት ይሰማኛል።

እኛም እንደ አሌክሲ፣ ይሖዋ ምንጊዜም ታማኞቹ ‘ደፋር እንዲሆኑና ልባቸው እንዲጸና’ እንደሚረዳቸው በሙሉ ልባችን እንተማመናለን።—መዝሙር 27:14