ታኅሣሥ 16, 2022 | የታደሰው፦ ሰኔ 20, 2023
ሩሲያ

ወቅታዊ መረጃ—ወንድም ታሰረ | ፈተናው ባያቆምም ደስተኛ ነው

አጫውት

ሰኔ 20, 2023 የሶቺ ማዕከላዊ አውራጃ ፍርድ ቤት፣ በወንድም ዳኒል ሱቮሮቭ ላይ የጥፋተኝነት ብይን አስተላልፏል፤ የስድስት ዓመት እስራትም በይኖበታል። ዳኒል ከነሐሴ 18, 2021 አንስቶ በእስር ላይ ነበር፤ የእስራት ፍርዱም በዚሁ ይጸናል።

አጭር መግለጫ

ዳኒል ሱቮሮቭ a

የትውልድ ዘመን፦ 1995 (አልሜትዬቭስክ፣ ታታርስታን ሪፑብሊክ)

ግለ ታሪክ፦ የሕንፃ መሣሪያዎች ሱቅ ውስጥ የሽያጭ ሠራተኛ ነበር

የይሖዋ ምሥክር የሆነች እናቱ ከልጅነቱ ጀምሮ እውነትን አስተምራዋለች። በ2011 ተጠመቀ

የዳኒል እናት፣ እህት ጉልናራ ሱቮሮቫ የሰጠችው ሐሳብ b

ዳኒል የማረፊያ ቤት ቆይታውን በጽናት እንዲቋቋም የረዳው ምንድን ነው?

እሱን ሄጄ መጠየቅ ባልችልም ደብዳቤዎቹ ይደርሱኛል። ዳኒል ሁልጊዜም ‘ስለ እኔ አትጨነቂ’ ይለኛል፤ ስላለበት ሁኔታ አማርሮ አያውቅም። ይሖዋ እየተንከባከበውና እየደገፈው እንደሆነ ይነግረኛል። ዳኒል በጣም ተግባቢ ልጅ ነው፤ ጥሩ አድማጭ በመሆኑም ይታወቃል። ሌሎች ሰዎች ችግር ሲያጋጥማቸው ስሜታቸውን ይረዳላቸዋል። እስር ቤቱን የግል የአገልግሎት ክልሉ እንዳደረገው ስሰማ በጣም ተበረታታሁ። እስረኞች በየጊዜው ስለሚቀያየሩ ሁሌም የሚያነጋግራቸው አዳዲስ ሰዎች ይኖራሉ። በተጨማሪም ዳኒል መጽሐፍ ቅዱስ ያነባል፤ ለስብሰባዎች ይዘጋጃል፤ መንፈሳዊ ነገሮችን ማስቀደሙንም ቀጥሏል።

ይህ ከባድ ጊዜ ስለ ይሖዋ ምን አስተምሮሻል?

ይሖዋ ምድር ላይ ብዙ ክፋት ቢያይም ደስታውን አያጣም። ሁለተኛ ዜና መዋዕል 16:9 “በሙሉ ልባቸው ወደ እሱ ላዘነበሉት ሰዎች ብርታቱን ያሳይ ዘንድ የይሖዋ ዓይኖች በምድር ሁሉ ላይ ይመላለሳሉ” ይላል። ስለዚህ ይሖዋ አገልጋዮቹን መርዳት የሚችልበትን አጋጣሚ በንቃት ይከታተላል። እኔም በመንፈሳዊ ነገሮች ራሴን ካስጠመድኩ እንዲሁም ጉባኤ ውስጥና አገልግሎት ላይ ሌሎችን በመርዳት ላይ ካተኮርኩ ለተስፋ መቁረጥ እጅ አልሰጥም።

እኛም ራሳችንን በመንፈሳዊ እንቅስቃሴዎች እናስጠምድ፤ ከይሖዋ ጋር ያለንን ዝምድናም እናጠናክር፤ እንዲህ ካደረግን ምንም ይምጣ ምን ደስተኛ ሆነን መቀጠል እንችላለን።—መዝሙር 16:11

የክሱ ሂደት

ነሐሴ 13, 2021

የወንጀል ክስ ተመሠረተበት፤ ለመጽሐፍ ቅዱስ ፍላጎት ያለው መስሎ የቀረበ አንድ ሰው ለፖሊሶች በሰጠው ቃል ላይ ነው ክሱ የተመሠረተው
ነሐሴ 18, 2021

ቤቱ ተፈተሸ። ከዚያም ተይዞ ወደ ጣቢያ ተወሰደ
ነሐሴ 19, 2021

ወደ ማረፊያ ቤት ተዛወረ
ሚያዝያ 29, 2022

‘የጽንፈኛ ድርጅትን እንቅስቃሴ አስተባብረሃል፣ ተሳትፎ አድርገሃል እንዲሁም ሌሎችን መልምለሃል’ የሚል ክስ በይፋ ተመሠረተበት
ሰኔ 10, 2022

ክሱ በፍርድ ቤት መታየት ጀመረ