ኅዳር 5, 2021
ሩሲያ

ወቅታዊ መረጃ | ወንድም አሌክሲ የርሾቭ መንፈሳዊ ልማዱ ለተስፋ መቁረጥ እጅ እንዳይሰጥ ረድቶታል

አጫውት

ሚያዝያ 7, 2022 የቶምስክ ክልል ፍርድ ቤት፣ ቀደም ሲል በወንድም አሌክሲ የርሾቭ ላይ የተበየነውን ፍርድ ወደ ሦስት ዓመት የገደብ እስራት ለውጦታል። አሌክሲ ወዲያውኑ ከእስር ተለቅቋል።

ጥር 19, 2022 በቶምስክ ክልል የሚገኘው የሴቬርስኪ ከተማ ፍርድ ቤት አሌክሲ ጥፋተኛ ነው በማለት የሦስት ዓመት እስራት ፈረደበት። ፍርዱ ወዲያውኑ ተፈጻሚ ይሆናል።

የክሱ ሂደት

ሰኔ 22, 2021

ክሱ በቶምስክ ክልል ለሚገኘው የሴቬርስኪ ከተማ ፍርድ ቤት ቀረበ
መጋቢት 30, 2021

አሌክሲ ክስ ተመሠረተበት፤ አንድ ሰው ከአንድ ዓመት በላይ ለመጽሐፍ ቅዱስ ጥናት ፍላጎት ያለው መስሎ በመቅረብ የቀረጻቸው ቪዲዮዎች ለክሱ ማስረጃ ሆነው ቀርበዋል
ሐምሌ 14, 2020

የሩሲያ የደህንነት ሠራተኞችና የወንጀል ምርመራ ኮሚቴ አባላት የአሌክሲን ቤት ሰብረው በመግባት ለሰባት ሰዓት ያህል ብርበራ አካሂደዋል። ፖሊሶቹ የባንክ ደብተሮች፣ ኤሌክትሮኒክ መሣሪያዎች፣ መጽሐፍ ቅዱስ፣ ፓስፖርቶችና የዋይ ፋይ ራውተሮች ወስደዋል

አጭር መግለጫ

አሌክሲ የርሾቭ

የትውልድ ዘመን፦ 1953 ሴቬርስክ (ቶምስክ ክልል)

ግለ ታሪክ፦ አባቱ የሞተው አሌክሲ በተወለደበት ዓመት ነው። ያሳደገችው እናቱ ናት። መሐንዲስ ሆኖ ይሠራ ነበር፤ በሙያ ትምህርት ቤትም ያስተምር ነበር

በ1976 ከሊዩድሚላ ጋር ትዳር መሠረተ። ሁለት ለአካለ መጠን የደረሱ ልጆች አሏቸው

ከተማሪዎቹ አንዱ በይሖዋ ምሥክሮች ስብሰባ ላይ እንዲገኝ ጋበዘውና ተገኘ፤ ከዚያም መጽሐፍ ቅዱስን የመማር ፍላጎት አደረበት። መጽሐፍ ቅዱስ የያዘው ጠቃሚ ምክርና የአምላክ መንግሥት ተስፋ ትኩረቱን ሳበው። በ1994 ተጠምቆ የይሖዋ ምሥክር ሆነ

የሰጠው ሐሳብ

በዚህ ፈተና ውስጥ ስታልፍ ከይሖዋ ጋር ያለህ ዝምድና እንዲጠናከር የረዳህ ምንድን ነው?

እኔና ባለቤቴ አዘውትረን አብረን እንጸልያለን። ይሖዋ ባይረዳኝ ኖሮ ይህን ሁኔታ መቋቋም እንደማልችል አውቃለሁ። ስለዚህ ጥሩ የግል ጥናት ልማድ እንዲኖረኝ ጥረት አደርጋለሁ፤ መጽሐፍ ቅዱስንም በየዕለቱ አነባለሁ። እኔና ባለቤቴ ጠዋት ጠዋት የዕለት ጥቅስ ካነበብን በኋላ ወደ ይሖዋ አብረን እንጸልያለን።

ለተስፋ መቁረጥ ስሜት እጅ እንዳትሰጥ የረዳህ ምንድን ነው?

የግል ጥናት ተስፋ እንዳልቆርጥ ረድቶኛል። የጥንት ታማኝ አገልጋዮች በተዉት ምሳሌ ላይ አሰላስላለሁ። አለመረበሽና በይሖዋ መታመን ምን ያህል አስፈላጊ እንደሆኑ የሚያጎሉ በርካታ የመጽሐፍ ቅዱስ ታሪኮች አሉ። በእነዚህ ታሪኮች ላይ ሳሰላስል እነዚያ የአምላክ አገልጋዮች እንዳይረበሹ የረዳቸው ምን እንደሆነ ለማስተዋል ጥረት አደርጋለሁ። የሐዋርያት ሥራ 5:29 “ከሰው ይልቅ አምላክን እንደ ገዢያችን አድርገን ልንታዘዝ ይገባል” ይላል። የሳንሄድሪን ሸንጎ ሐዋርያቱን እንዳይሰብኩ ባዘዛቸው ወቅት ሐዋርያቱ አልተረበሹም። ከገረፏቸው በኋላም እንኳ በፍርሃት አልተርበተበቱም። ሐዋርያቱ ይሖዋ ከእነሱ ጋር እንደሆነና እንደተደሰተባቸው ያውቁ ነበር።

በሩሲያ ያሉ ወንድሞቻችንና እህቶቻችን በየዕለቱ መጽሐፍ ቅዱስ ማንበባቸውና መጸለያቸው ወደፊትም ብርታት እንደሚሆናቸው ምንም ጥርጥር የለውም። መዝሙር 9:9 እንዲህ የሚል ማረጋገጫ ይሰጠናል፦ “ይሖዋ ለተጨቆኑ አስተማማኝ መጠጊያ ይሆናል፤ በመከራ ጊዜ አስተማማኝ መጠጊያ ነው።”

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች