ነሐሴ 18, 2022 | የታደሰው፦ ታኅሣሥ 19, 2023
ሩሲያ

ወቅታዊ መረጃ—ወንድም እና እህት ታሰሩ | በይሖዋ መታመናቸው ስደትን እንዳይፈሩ ረድቷቸዋል

አጫውት

ታኅሣሥ 18, 2023 በኖቮሲቢርስክ ክልል የሚገኘው የኖቮሲቢርስክ አውራጃ ፍርድ ቤት፣ ወንድም ቫለሪ ማሌትስኮቭ እና እህት ማሪና ቻፕሊኪና ጥፋተኛ ናቸው የሚል ብይን አስተላልፏል። ቫለሪ የስድስት ዓመት እስራት የተፈረደበት ሲሆን ማሪና ደግሞ የአራት ዓመት እስራት ተፈርዶባታል። ሁለቱም ከፍርድ ቤት ወዲያውኑ ወደ እስር ቤት ተወስደዋል።

የክሱ ሂደት

2018

በይሖዋ ምሥክሮች ላይ እገዳ ከመጣሉ በፊት መጽሐፍ ቅዱስን ያጠናና በስብሰባዎች ላይ ይገኝ የነበረ አንድ ሰው በኖቮሲቢርስክ ከሚገኙ የፌዴራል ደህንነት አባላት ጋር በመተባበር በስብሰባዎቹ ላይ ስለሚገኙት ሰዎች መረጃ መሰብሰብ ጀመረ
ሚያዝያ 19, 2019

ይህ ሰው የሰጠውን መረጃ መሠረት በማድረግ በኖቮሲቢርስክ በሚኖሩ ስድስት የይሖዋ ምሥክሮች ቤቶች ላይ ፍተሻ ተካሄደ። ቫለሪ ማሌትስኮቭ እና ማሪና ቻፕሊኪና ክስ ተመሠረተባቸው። ሁለቱም በቁጥጥር ሥር ከዋሉ በኋላ ማረፊያ ቤት እንዲገቡ ተደረገ
ሚያዝያ 21, 2019

ሁለቱም ከማረፊያ ቤት ተለቀቁ። ቫለሪ የቁም እስረኛ እንዲሆን ተደረገ፤ ማሪና ቻፕሊኪና ደግሞ የጉዞ ገደብ ተጣለባት
የካቲት 21, 2022

ቫለሪ የጽንፈኛ ድርጅት እንቅስቃሴዎችን በማደራጀት ወንጀል ክስ ተመሠረተበት። ማሪና ቻፕሊኪና በጽንፈኛ ድርጅት እንቅስቃሴዎች ላይ በመሳተፍና ለድርጅቱ የገንዘብ ድጋፍ በማድረግ ወንጀል ተከሰሰች
መጋቢት 30, 2022

ጉዳዩ በፍርድ ቤት መታየት ጀመረ

አጭር መግለጫ

ማሪና ቻፕሊኪና

የትውልድ ዘመን:- 1971 (ኖቮሲቢርስክ)

ግለ ታሪክ፦ የፀጉር ሥራ ባለሙያ ነች። ነጠላ እናት ሆና ሴት ልጇን አሳድጋለች

የይሖዋ ምሥክሮች ከቤት ወደ ቤት ሲያገለግሉ አግኝተዋት የአምላክን ስም ከራሷ መጽሐፍ ቅዱስ ላይ አሳዩአት፤ ከዚያም ማጥናት ጀመረች። በ2004 ተጠመቀች

የሰጠችው ሐሳብ

ቲኦክራሲያዊ መመሪያዎችን መከተልሽ የጠቀመሽ እንዴት ነው?

በአገሪቱ ውስጥ ያለው ሁኔታ መቀየር ሲጀምር ወንድሞች የሚሰጡንን መመሪያ በትኩረት መከታተሌና በተቻለኝ ፍጥነት ተግባራዊ ማድረጌ ምን ያህል አስፈላጊ እንደሆነ ተረዳሁ። በሌላ የአገሪቱ ክፍል እስራትና ፍተሻ ሲጀመር ሁኔታውን ለማጤንና ወንድሞቻችን ሁኔታውን እንዴት እንደያዙት ለማስተዋል ጥረት አደረግኩ። ይህም ራሴንም ሆነ ቤቴን ከዚያ በኋላ ለሚመጣው ነገር ዝግጁ ለማድረግ አስችሎኛል።

ጸሎት ብርታት የሰጠሽ እንዴት ነው?

ፖሊሶች በቁጥጥር ሥር ሲያውሉኝ ወዲያውኑ ወደ አእምሮዬ የመጣው ነህምያ የተወው ምሳሌ ነው። ልቤ እንዳይሸበርና ሰላም እንዳገኝ እንደ ነህምያ ወደ ይሖዋ አጭር ጸሎት አቀረብኩ። ፍተሻ ለማካሄድ ወደ ቤት ይዘውኝ ሲሄዱ በጣም ተረጋግቼ ነበር። ፖሊሶቹ እንደ ማንኛውም ሰው የተሰጣቸውን ሥራ እየሠሩ እንደሆነ አሰብኩ። ትንሽ ቆየት ብሎ ልጄ ናታሊያ ወደ ቤት መጣች። ፖሊሶቹ፣ ናታሊያ ቤቱን እየፈተሹ በመድረሷ ምንም እንዳልተደናገጠች አስተዋሉ። ከመካከላቸው አንዱ ያልፈራችው ለምን እንደሆነ ሲጠይቃት ሌላኛው ፖሊስ “እንደምንመጣ ጠብቀው ነበር” በማለት መለሰለት። በዚህ ጊዜ ‘ይሖዋ ጸሎቴን መልሶልኛል። ሌሎችም እንኳ የነበረንን መረጋጋት ማስተዋል ችለዋል’ ብዬ አሰብኩ።

ቫለሪ ማሌትስኮቭ

የትውልድ ዘመን፦ 1974 (ኖቮሲቢርስክ)

ግለ ታሪክ፦ በአናጺነትና በአትክልተኝነት ሠርቷል

የይሖዋ ምሥክሮች የሚያምኑበት ነገር ሁሉ በመጽሐፍ ቅዱስ ላይ የተመሠረተ መሆኑ አስገረመው። በ1994 ተጠመቀ

በ2004 ከማሪና ጋር ትዳር መሠረቱ። አንድ ልጅ አላቸው

የሰጠው ሐሳብ

አንተም ሆንክ ቤተሰብህ ስደትን እንዳትፈሩ የረዳችሁ ምንድን ነው?

ስለ እምነት ባልንጀሮቻችን መታሰር የሚናገሩ ሪፖርቶችን ስንሰማ ራሳችንን በእነሱ ቦታ አድርገን ለማሰብ እንሞክር ነበር። ‘ምን እየተሰማቸው ይሆን? ምን እያሰቡ ይሆን?’ ብለን ራሳችንን እንጠይቃለን። በግሌም ሆነ ከቤተሰቤ ጋር ስጸልይ የስደት ፍርሃት በልባችን ውስጥ ሥር እንዳይሰድ ይሖዋን በተደጋጋሚ እጠይቀው ነበር። ስደት ወንድሞቻችንና እህቶቻችን መመሥከር የሚችሉበት አዲስ መንገድ እንደሚከፍትላቸው የሚያሳዩ ብዙ ተሞክሮዎችን አይተናል።

ስደትን በገዛ ሕይወቴ ማየቴ ወደ ይሖዋ ይበልጥ እንድቀርብና ስደት ለሚያደርሱብኝ ሰዎች የይሖዋ ዓይነት አመለካከት እንዲኖረኝ አስችሎኛል። ሰዎቹ ሲታዩ ሊያስፈሩ ቢችሉም እነሱም እንደ ማንኛውም ሰው እውነትን ሊሰሙ የሚገባቸው ሰዎች ናቸው፤ አሁን ባለሁበት ሁኔታ ደግሞ የእኔም ምግባር ምሥክርነት የሚሰጥ ሊሆን ይገባል።

የእምነት ባልንጀሮቻችን ስደትን በጽናት መጋፈጣቸው ይሖዋ እየባረካቸውና ጥበቃ እያደረገላቸው እንዳለ በግልጽ የሚያሳይ ነው።—1 ዮሐንስ 5:4