ኅዳር 25, 2021
ሩሲያ

ወቅታዊ መረጃ | ወንድም ዬቭጌኒ ኮሮቱን ከይሖዋ ማጽናኛ አግኝቷል

አጫውት

ግንቦት 16, 2022 የቶምስክ ክልላዊ ፍርድ ቤት ወንድም ዬቭጌኒ ኮሮቱን ያቀረበውን ይግባኝ ውድቅ አድርጓል። አሁንም እስር ቤት ነው።

ጥር 20, 2022 በቶምስክ ክልል የሚገኘው የሴቬርስኪ ከተማ ፍርድ ቤት ዬቭጌኒ ጥፋተኛ ነው በማለት የሰባት ዓመት እስራት ፈረደበት። ፍርዱ ወዲያውኑ ተፈጻሚ ይሆናል።

የክሱ ሂደት

መጋቢት 31, 2021

ክሱ መታየት ጀመረ
መስከረም 7, 2020

በፖሊስ ቁጥጥር ሥር ዋለ፤ ፍርድ ቤት ከቀረበ በኋላ ማረፊያ ቤት እንዲቆይ ተደረገ
ሐምሌ 15, 2020

የቁም እስረኛ ተደረገ
ሐምሌ 14, 2020

የፌደራል ደህንነት አባላት በሴቬርስክ ከተማ የሚገኙ አራት የይሖዋ ምሥክሮች ቤቶችን ፈተሹ፤ ከእነዚህ አንዱ የወንድም ዬቭጌኒ ኮሮቱን ቤት ነው
ሐምሌ 13, 2020

ዬቭጌኒ በወንጀል ተከሰሰ
2018–2019

ሁለት የስውር ፖሊሶች ስለ መጽሐፍ ቅዱስ የማወቅ ፍላጎት ያላቸው መስለው ከዬቭጌኒ ጋር ያደረጉትን ውይይት በድብቅ ይቀርጹ ነበር፤ ይህን ያደረጉት ለክስ ማስረጃ ሆኖ እንዲያገለግላቸው ነው

አጭር መግለጫ

ዬቭጌኒ ኮሮቱን

የትውልድ ዘመን፦ 1970 (ሴቬርስክ)

ግለ ታሪክ፦ ሥነ ጥበብ አጥንቷል። አናጢ እንዲሁም የጂፕሰምና የቧንቧ ባለሙያ ሆኖ ሠርቷል። ፎቶግራፍ ማንሳትና ማንበብ ይወዳል

ለአሥር ዓመት ገደማ መጽሐፍ ቅዱስ ላይ ምርምር ሲያደርግ ከቆየ በኋላ የአምላክ ቃል እንደሆነ አመነ። በ2008 ተጠመቀ። በኋላ ላይ በዚያው ዓመት ከዬቭጌኒያ ጋር ትዳር መሠረተ። አሌክሳንደር የተባለ የአሥር ዓመት ልጅ አላቸው

የዬቭጌኒ ባለቤት የሆነችው ዬቭጌኒያ የሰጠችው ሐሳብ a

ባለቤትሽ ማረፊያ ቤት ባለበት ጊዜ ምን ፈተናዎች አጋጥመውሻል?

የፌደራል የገንዘብ ቁጥጥር ቢሮ የባንክ ካርዶቻችንን አግዶብናል። ጉዳዩን አቤት ለማለት ወደተለያዩ የመንግሥት ቢሮዎች ሄጃለሁ። ያም ሆነ ይህ፣ ይሖዋ በወንድሞችና እህቶች ተጠቅሞ የሚያስፈልጉንን ነገሮች አሟልቶልናል።

ደስታሽን ጠብቀሽ እንድትኖሪና በጭንቀት እንዳትዋጪ የረዳሽ ምንድን ነው?

መንፈሳዊ ልማዶቼ ረድተውኛል። . . . አሁን ዬቭጌኒ እዚህ አጠገባችን ሆኖ ሊጸልይልን ስለማይችል ለብቻዬ ከይሖዋ ጋር ብዙ የመነጋገር አጋጣሚ አግኝቻለሁ። ለይሖዋ የምነግረው ብዙ አዳዲስ ነገሮች አሉ። ስለ ስደት፣ ድፍረት፣ ጽናት፣ ታማኝነት፣ የይሖዋ ሉዓላዊነት እንዲሁም አዎንታዊ ሆኖ ስለ መቀጠል ብዙ ማንበብ ጀምሬያለሁ። ለማንበብ አቅም እንደሌለኝ ሲሰማኝ የብሮድካስት ቪዲዮዎችን አያለሁ። መዝሙሮቻችንንም በጣም የሚያንጹ ሆነው አግኝቼያቸዋለሁ።

ልጃችሁ አሌክሳንደር የአባቱ አለመኖር የፈጠረበት ስሜት አለ?

አንዳንድ ጊዜ እያለቀሰ ‘አባቴ ናፈቀኝ’ ይላል። . . . ግን ሁሌ ይቆዝማል ማለት አይደለም። በጥቅሉ ሲታይ አዎንታዊና ደስተኛ ነው። . . . መጠመቅ እንደሚፈልግ ነግሮኛል። ይህ በጣም ነው ያስደሰተኝ።

ይሖዋ የዬቭጌኒን ቤተሰብም ሆነ በአስቸጋሪ ሁኔታ ውስጥ ሆነው የሚያገለግሉትን በሙሉ እንደማይተዋቸው እርግጠኞች ነን።—ሮም 15:5

a ወንድም ዬቭጌኒ ኮሮቱን አሁን ማረፊያ ቤት ስለሆነ እሱ የሚሰጠውን ሐሳብ ማካተት አልቻልንም።

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች