ነሐሴ 5, 2021
ሩሲያ

ወቅታዊ መረጃ | ወንድም ዲሚትሪ ቴሬቢሎቭ ለአምስተኛ ጊዜ ሊታሰር ይችላል፤ በእምነቱ ምክንያት ሲከሰስ ግን ይህ የመጀመሪያው ነው

አጫውት

መስከረም 22, 2022 አራተኛው ጠቅላይ ይግባኝ ሰሚ ፍርድ ቤት ወንድም ዲሚትሪ ቴሬቢሎቭ ለሁለተኛ ጊዜ ያቀረበውን ይግባኝ ውድቅ አደረገ። ዲሚትሪ አሁንም እስር ቤት ነው።

ጥር 12, 2022 የኮስትሮማ ክልላዊ ፍርድ ቤት የዲሚትሪን ይግባኝ ውድቅ አደረገ።

የክሱ ሂደት

መስከረም 6, 2021

በኮስትሮማ ከተማ የሚገኘው የስቬርድሎቭስኪ አውራጃ ፍርድ ቤት በዲሚትሪ ላይ የሦስት ዓመት እስራት ፈረደበት። ዲሚትሪ ብይኑ ከተላለፈ በኋላ ወዲያውኑ ወደ እስር ቤት ተወሰደ
መስከረም 8, 2020

የዲሚትሪ ጉዳይ በፍርድ ቤት መታየት ጀመረ
ግንቦት 25, 2020

ዲሚትሪ ተከሰሰ፤ እንዲሁም የጉዞ ገደብ ተጣለበት
መስከረም 19, 2019

የዲሚትሪ የባንክ ሒሳብ ታገደ
ሰኔ 13, 2019

ዲሚትሪ የታገዱ ጽሑፎችን በማሰራጨትና የታገደ ድርጅት ስብሰባዎችን በማደራጀት ወንጀል ክስ ተመሠረተበት
ሐምሌ 25, 2018

ዲሚትሪና ባለቤቱ በሞልዶቫ የክልል ስብሰባ ላይ ተገኝተው እየተመለሱ ሳሉ ቤታቸው ተፈተሸ። ዲሚትሪና ባለቤቱ ቤታቸው እንደደረሱ ፖሊሶቹ በቁጥጥር ሥር አውለው ምርመራ አደረጉባቸው

አጭር መግለጫ

ዲሚትሪ ቴሬቢሎቭ

የትውልድ ዘመን፦ 1980 (ኮስትሮማ)

ግለ ታሪክ፦ እናቱ ያረፈችው ገና ልጅ እያለ ነው። በልጅነቱ ትግል እና ቦክስ ይወድ ነበር። ከዕፅ ጋር በተያያዘ ክስ አራት ጊዜ ታስሯል

በ2010 እስር ቤት እያለ መጽሐፍ ቅዱስን በደብዳቤ አማካኝነት ማጥናት ጀመረ። በ2013 ከእስር ተፈታ። በ2014 ተጠመቀ። በ2015 ከአይሪና ጋር ትዳር መሠረተ። አብረው በእግር መንሸራሸር፣ ተራራ መውጣትና ብስክሌት መንዳት ይወዳሉ

የሰጠው ሐሳብ

ከይሖዋ ምሥክሮች ጋር ለመጀመሪያ ጊዜ የተገናኘኸው እንዴት ነው?

ከይሖዋ ምሥክሮች ጋር የተገናኘሁት በሕገ ወጥ ዕፆች ምክንያት ለአራተኛ ጊዜ በታሰርኩበት ወቅት ነው። ነሐሴ 2010 በኡድሙርቲያ ከሚኖር ወንድም ለመጀመሪያ ጊዜ ደብዳቤ ደረሰኝ። በእስር በቆየሁባቸው ዓመታት በሙሉ ይህ ወንድም ረድቶኛል፤ ደብዳቤዎችን ይጽፍልኝ እንዲሁም ጽሑፎች ይልክልኝ ነበር። አሁንም ድረስ የቅርብ ጓደኞች ነን።

ሰኔ 21, 2013 የእስር ጊዜዬን አጠናቅቄ ተፈታሁ። ከዚያም በኮስትሮማ መኖር ጀመርኩ፤ በዚያም ከይሖዋ ምሥክሮች ጋር ተገናኘሁ።

ደስታህን እንድትጠብቅና በጭንቀት እንዳትዋጥ የረዳህ ምንድን ነው?

በ2018 የተገኘንበት ስብሰባ ርዕሱ “ደፋር ሁኑ!” የሚል ነበር። ከስብሰባው እንደተመለስን ወዲያውኑ የተማርነውን ነገር በሥራ ላይ ማዋል ጀመርን። . . . [ቤታችን ለሁለተኛ ጊዜ በተፈተሸበት ወቅት የወንጀል ምርመራ ከተደረገብን በኋላ] ወደ ቤት ስንመለስ የሆነውን ነገር አስታውሳለሁ። ቤት ስንደርስ ብዙ ወንድሞችና እህቶችን አገኘን፤ ቤታችን መፈተሹን ሲሰሙ ቶሎ ብለው ወደ ቤታችን መጥተው ነበር። ይህም ይሖዋ ቅርባችን እንደሆነ የሚያሳይ ግልጽ ማስረጃ ነው።

በእምነትህ ምክንያት ድጋሚ እስር ቤት ልትገባ እንደምትችል ስታስብ ምን ይሰማሃል?

ይሖዋ እስካሁን የረዳኝ እንዴት እንደሆነ እንዲሁም በእምነታቸው ምክንያት የታሰሩ ወንድሞችና እህቶችን እየደገፋቸው ያለው እንዴት እንደሆነ ስላየሁ ይሖዋ እኔንና ቤተሰቤንም እንደሚደግፈን አልጠራጠርም። ከእስር ቤት ስወጣ ‘የይሖዋ ምሥክር መሆን እፈልጋለሁ’ የሚል ውሳኔ አድርጌ ነበር። ይህ ውሳኔዬ ዛሬም አልተቀየረም።

ዲሚትሪ ‘ለክርስቶስ ስም ሲል በመነቀፉ ደስተኛ ነው’፤ እኛም ‘የክብር መንፈስ ይኸውም የአምላክ መንፈስ በእሱ ላይ እንደሚያርፍ’ እርግጠኞች ነን።—1 ጴጥሮስ 4:14

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች