ጥር 4, 2022
ሩሲያ

ወቅታዊ መረጃ | ወንድም ፕዮትር ክሩፕኖቭ እና ባለቤቱ ማያ አስቀድመው መዘጋጀታቸውና ተስፋቸው ላይ ማተኮራቸው ረድቷቸዋል

አጫውት

መጋቢት 9, 2022 የፔንዛ ክልላዊ ፍርድ ቤት ወንድም ፕዮትር ክሩፕኖቭ እና ባለቤቱ ማያ ያቀረቡትን ይግባኝ ውድቅ አድርጓል። እርግጥ በአሁኑ ወቅት ወህኒ አይወርዱም።

የክሱ ሂደት

ታኅሣሥ 30, 2021

በፔንዛ ክልል የሚገኘው የኒኮልስኪ አውራጃ ፍርድ ቤት ፕዮትር እና ባለቤቱ ማያ ጥፋተኛ ናቸው በማለት በሦስት ዓመት የገደብ እስራት እንዲቀጡ ወስኗል።
ጥቅምት 25, 2021

ክሱ በፍርድ ቤት መታየት ጀመረ
ጥቅምት 12, 2021

ፕዮትር እና ማያ ከወዳጆቻቸው ጋር ሃይማኖታዊ በሆኑ ጉዳዮች ላይ ስለተወያዩ በአሸባሪዎችና በጽንፈኞች ዝርዝር ውስጥ ተካተቱ
መስከረም 15, 2021

በማያ ላይ የወንጀል ክስ ተመሠረተባት። በኋላ ፕዮትርም በክሱ ውስጥ ተካተተ
ጥቅምት 11, 2020

የደህንነት አባላት የፕዮትርንና የማያን ቤት ጨምሮ የአራት የይሖዋ ምሥክሮችን ቤቶች በረበሩ

አጭር መግለጫ

ፕዮትር ክሩፕኖቭ

የትውልድ ዘመን፦ 1963

ግለ ታሪክ፦ የቧንቧ ሠሪ ነው። በ1996 ከይሖዋ ምሥክሮች ጋር መጽሐፍ ቅዱስ ማጥናት ጀመረ። ጽሑፎቻችንን ሲያነብና መጽሐፍ ቅዱስን የሚያስተምረው ሰው የሚያሳየውን ባሕርይ ሲመለከት እውነትን እንዳገኘ እርግጠኛ ሆነ። በ2002 ተጠመቀ

በጉባኤ ስብሰባ ላይ ከማያ ጋር ተዋወቀ። በ2008 ትዳር መሠረቱ

የሰጠው ሐሳብ

የይሖዋን እርዳታ ያየህበትን አንድ አጋጣሚ ልትነግረን ትችላለህ?

[አስታውሳለሁ፣ በአንድ ወቅት] መንፈስ ቅዱስን ለማግኘት ጸልዬ ነበር፤ ከዚያም ዮሐንስ 10:28 ላይ የሚገኘው ሐሳብ ወደ አእምሮዬ መጣ። ጥቅሱ ‘ከእጄ የሚነጥቃቸው የለም’ ይላል። በዚህ ሐሳብ ላይ ማሰላሰሌ ብርታትና ደስታ እንዳገኝ ረድቶኛል። አባቴ ከጎኔ እንዳለ እንዲሰማኝ አድርጓል። ይህም ይበልጥ እንድረጋጋና ልበ ሙሉ እንድሆን አስችሎኛል።

እንድትጸና እየረዳህ ያለው ምንድን ነው?

የሚያጋጥሙን ፈተናዎች የቱንም ያህል ከባድ ቢሆኑ ይሖዋን ከማገልገል [መብታችን] እና በገነት ውስጥ የዘላለም ሕይወት ከማግኘት ተስፋችን ጋር ሲወዳደሩ እዚህ ግባ የሚባሉ እንዳልሆኑ ለማስታወስ እሞክራለሁ። ለአምላክና ለሰዎች ያለኝ ፍቅር የሚጋጥሙኝን ፈተናዎች ለመጋፈጥ የሚያስችል ብርታት ይሰጠኛል።

ማያ ክሩፕኖቫ

የትውልድ ዘመን፦ 1957 (አታሱ፣ ካዛክስታን)

ግለ ታሪክ፦ ኬክ ጋጋሪ ሆና ሠርታለች። አሁን ጡረታ የወጣች ሲሆን አትክልት መንከባከብ ያስደስታታል

ለመጀመሪያ ጊዜ ስለ ይሖዋ ምሥክሮች የነገረቻት ልጇ ናት። ሁለቱም በ2001 ተጠመቁ

የሰጠችው ሐሳብ

ለእነዚህ ፈተናዎች አስቀድመሽ የተዘጋጀሽው እንዴት ነው?

ዝግጅት ማድረግ የጀመርኩት [በአቅራቢያችን ባለ ከተማ] ወንድሞችና እህቶች መታሰር ሲጀምሩ ነው። የመጽሐፍ ቅዱስ ክፍል የሆኑትን የአስቴር እና የኤርምያስ መጻሕፍትን አነበብኩ። . . . ድረ ገጻችን ላይ የሚወጡትን ሪፖርቶች ተከታትዬ አነብ ነበር፤ መዝሙሮችንም በቃሌ አጠናሁ። ድንገተኛ ሁኔታ ቢያጋጥም ይዤ የምሄደው ሻንጣ እና እስር ቤት የምወስደው ቦርሳ አዘጋጀሁ። . . . የሚያጋጥሙኝን ፈተናዎች በተረጋጋ ሁኔታ ለመወጣት የሚያስችል ጥበብና ድፍረት ለማግኘት ጸለይኩ።

መንፈሳዊ ቤተሰብሽ ድጋፍ ያደረገልሽ እንዴት ነው?

ሁሉም ወንድሞችና እህቶች በተለይ በጣም በሚያስፈልገኝ ጊዜ ማበረታቻ ሰጥተውኛል። በጣም በዛልኩበት ወቅት ወንድሞችና እህቶች እየደወሉና እየጻፉ ምን ያህል እንደሚወዱኝ ይነግሩኝ ነበር። . . . አፍቃሪ የሆነ ትልቅ ቤተሰብ አባል እንደሆንኩ ጠፍቶኝ አያውቅም። ከ2020 አንስቶ ግን ይህን በይበልጥ መረዳት ችያለሁ።

ፕዮትር እና ማያ ተስፋቸውን አጽንተው በመያዝና በይሖዋ በመታመን ረገድ የተዉትን ምሳሌ ከልብ እናደንቃለን።—ዕብራውያን 6:19