ጥቅምት 1, 2021 | የታደሰው፦ ነሐሴ 29, 2023
ሩሲያ

ወቅታዊ መረጃ—ወንድሞች ተፈረደባቸው | አምስት ወንድሞች ስደት ቢደርስባቸውም ለመጽናት ቆርጠዋል

አጫውት

ነሐሴ 28, 2023 በኦረንበርግ የሚገኘው የፕሮሚሽሌኒ አውራጃ ፍርድ ቤት፣ በወንድም ቭላዲሚር ኮችኔቭ፣ በወንድም ቭላዲስላቭ ኮልባኖቭ፣ በወንድም ፓቬል ሌኮንትሴቭ፣ በወንድም ሰርጌ ሎጉኖቭ እና በወንድም ኒኮላይ ዡጊን ላይ የጥፋተኝነት ብይን አስተላልፏል። ወንድሞች ከሁለት ዓመት ተኩል እስከ ሦስት ዓመት ተኩል የሚደርስ የገደብ እስራት ተፈርዶባቸዋል። በአሁኑ ወቅት ወህኒ አይወርዱም።

የክሱ ሂደት

መጋቢት 1, 2021

ክሱ ወደ አቃቤ ሕግ ቢሮ ከተመለሰ ከአንድ ዓመት በላይ ካለፈ በኋላ ጉዳያቸው በኦረንበርግ በሚገኘው ፕሮሚሽሌኒ አውራጃ ፍርድ ቤት መታየት ጀመረ
ጥር 14, 2020

ክሱ በግልጽ ባለመቀመጡ የተነሳ ወደ አቃቤ ሕግ ቢሮ ተመለሰ
ነሐሴ 3, 2018

ቭላዲሚር በማረፊያ ቤት 79 ቀናት ካሳለፈ በኋላ በቁም እስር እንዲቆይ ተደረገ
ግንቦት 16, 2018

ባለሥልጣናቱ በኦረንበርግ ክልል የሚኖሩ 19 ቤተሰቦችን ቤት ፈተሹ። ቭላዲሚርን እና ቭላዲስላቭን ማረፊያ ቤት አስገቧቸው። ከሦስት ቀናት በኋላ ቭላዲስላቭ ከማረፊያ ቤት ተለቆ በቁም እስር እንዲቆይ ተደረገ
ግንቦት 14, 2018

በኦረንበርግ ክልል የሚገኘው የሩሲያ ፌዴሬሽን የምርመራ ኮሚቴ በአምስቱም ወንድሞች ላይ ክስ መሠረተ

አጭር መግለጫ

ቭላዲሚር ኮችኔቭ

የትውልድ ዘመን፦ 1979 (ኦረንበርግ)

ግለ ታሪክ፦ በልጅነቱ ዓሣ ማጥመድና እግር ኳስ መጫወት ይወድ ነበር። የብረታ ብረት ሠራተኛ እንዲሁም የቴሌቪዥንና የሬዲዮ ጠጋኝ ሆኖ ሠርቷል። በ1993 ተጠምቆ የይሖዋ ምሥክር ሆነ። በ2003 ከገሊና ጋር ትዳር መሠረተ

የሰጠው ሐሳብ

በዚህ ፈተና ወቅት ከይሖዋ ጋር ያለህ ዝምድና የተጠናከረው እንዴት ነው?

በማረፊያ ቤት ያሳለፍኩት ጊዜ ከአምላክ ጋር ያለኝ ዝምድና በጣም የተጠናከረበት ወቅት እንደሆነ በእርግጠኝነት መናገር እችላለሁ። ብቻዬን ስለነበርኩ እንዲሁም ሁኔታው ሙሉ በሙሉ ከቁጥጥሬ ውጭ ስለነበር በይሖዋ ይበልጥ መታመንን ተማርኩ።

ሌሎች ወደፊት ሊያጋጥሟቸው ለሚችሉት ፈተናዎች ለመዘጋጀት ከአሁኑ ምን እንዲያደርጉ ትመክራለህ?

እንደ እውነቱ ከሆነ ስደት በራሱ አንድን ሰው የተሻለ ሰው ሊያደርገው ወይም ሊያዳክመው አይችልም። ከዚህ ይልቅ የግለሰቡ እውነተኛ ማንነት በግልጽ እንዲታይ ያደርጋል። ጥሩ መንፈሳዊ ልማድ ካለን ማለትም አዘውትረን በመንፈሳዊ እንቅስቃሴዎች የምንካፈል ከሆነ እምነታችን አይዳከምም። መንፈሳዊነታችንን ለማጠናከር ለየት ያለ ነገር እስኪፈጠር ድረስ መጠበቁ አያዋጣም። ለምሳሌ መጽሐፍ ቅዱስን በየቀኑ ማንበብ ለመጀመር ወይም አዘውትረን የመጸለይ ልማድ ለማዳበር ልዩ ነገር እስኪፈጠር መጠበቅ አያስፈልገንም።

ቭላዲስላቭ ኮልባኖቭ

የትውልድ ዘመን፦ 1992 (ኦረንበርግ)

ግለ ታሪክ፦ እናቱ መጽሐፍ ቅዱስን ማጥናት የጀመረችው የስድስት ዓመት ልጅ እያለ ነው። በ2008 ተጠምቆ የይሖዋ ምሥክር ሆነ። የ18 ዓመት ወጣት ሳለ በጦር ሠራዊት ውስጥ ከማገልገል ይልቅ አማራጭ አገልግሎት መስጠት እንዲፈቀድለት ጠየቀ። በመጦሪያ ተቋም ውስጥ አረጋውያንን በመንከባከብ የሲቪል አገልግሎት ሰጠ

የሰጠው ሐሳብ

ይህ ፈተና ይሖዋን ለማገልገል ያለህን ቁርጠኝነት ያጠናከረው እንዴት ነው?

አንዳንዶች ‘ከዚህ ክስ ለማምለጥ ማድረግ የምትችለው ነገር ቢኖር አጋጣሚውን ትጠቀምበት ነበር?’ ብለው ብዙ ጊዜ ይጠይቁኛል። እኔ ግን ውስጤን ስመረምረው፣ ከደረሰብኝ ሁኔታ ጋር በተያያዘ ምንም የሚቆጨኝ ነገር የለም። . . . በሕይወቴ ውስጥ የይሖዋን እጅ ማየት ችያለሁ፤ የወንድሞችንና የእህቶችን ድጋፍም ተመልክቻለሁ።

ፈተናዎች ጽናት ለማዳበር፣ በይሖዋ ላይ ያለንን እምነት ለማጠናከርና ለእሱ ያለንን ፍቅር ለማሳደግ እንደሚረዱን ተገንዝቤያለሁ።

ፓቬል ሌኮንትሴቭ

የትውልድ ዘመን፦ 1981 (ኪታት፣ ክራስናያርስክ ክልል)

ግለ ታሪክ፦ ከልጅነቱ ጀምሮ በተፈጥሮ ይደመም ነበር። ተራራ መውጣት፣ ዓሣ ማጥመድና የዱር እንጉዳይ መፈለግ ያስደስተዋል። ከግንባታ ጋር የተያያዙ ሥራዎችን ሠርቷል። በ1990ዎቹ መጨረሻ ላይ ከይሖዋ ምሥክሮች ጋር መጽሐፍ ቅዱስን ማጥናት ጀመረ። ደስታ ለማግኘት ቁልፉ በመጽሐፍ ቅዱስ መሥፈርቶች መመራት እንደሆነ ተገነዘበ። በ1999 ተጠመቀ። በ2017 ከኦክሳና ጋር ትዳር መሠረተ

የሰጠው ሐሳብ

ቤትህ ሲፈተሽ፣ የወንጀል ምርመራ ሲደረግብህና ክስ ሲመሠረትብህ ምን አደረግክ?

ፖሊሶች ወደ ቤቴ ሲገቡ አጭር ጸሎት አቀረብኩ፤ በሕይወቴ ካቀረብኳቸው ሁሉ በጣም አጭር የሆነውን ጸሎት ይሖዋ የመለሰበት ፍጥነት አስገርሞኛል። የጸለይኩት እርጋታ እንዲሰጠኝ ነበር። ይሖዋ የመለሰልኝ ከሰዓታት ወይም ከደቂቃዎች በኋላ ሳይሆን በጥቂት ሴኮንዶች ውስጥ ነው። መረጋጋትና በሰከነ አእምሮ ማሰብ ቻልኩ።

የፍርድ ቤቱ ብይን ምንም ይሁን ምን ቁርጥ ውሳኔህ ምንድን ነው?

ፍርድ ቤቱ ምን ዓይነት ብይን እንደሚያስተላልፍ ማወቅ አይቻልም። ሆኖም ይሖዋ ምንጊዜም ብርታት እንደሚሰጠኝ እርግጠኛ ነኝ። ፍርድ ቤቱ ምንም ወሰነ ምን ድል አድራጊዎቹ እኛ ነን! የሚደርስብን ፈተና ምንም ያህል ከባድ ቢሆን ይሖዋ በሚያስፈልገን መጠን መንፈስ ቅዱስ ይሰጠናል። በይሖዋ አገልግሎት ባሳለፍኳቸው ዓመታት ይህን በተደጋጋሚ ተመልክቻለሁ! በመሆኑም ሩጫውን ለመጨረስ ቆርጫለሁ።—2 ጢሞቴዎስ 4:7

ሰርጌ ሎጉኖቭ

የትውልድ ዘመን፦ 1962 (ኦረንበርግ)

ግለ ታሪክ፦ ከባድ ማሽኖችን ለማንቀሳቀስ ልዩ ሥልጠና አግኝቷል። ጦር ሠራዊት ውስጥ ካገለገለ በኋላ ፕሮፌሽናል ፎቶግራፍ አንሺ ሆነ። በቅርቡ ደግሞ አትክልተኛ ሆኖ ይሠራ ነበር። አሁንም ፎቶግራፍ ማንሳትን እንደ ጊዜ ማሳለፊያ ይጠቀምበታል። ጊታርም ይጫወታል። በ1990ዎቹ መጀመሪያ ላይ ከይሖዋ ምሥክሮች ጋር መጽሐፍ ቅዱስን ማጥናት ጀመረ። በ1992 ተጠመቀ። በ1994 ከላሪሳ ጋር ትዳር መሠረተ

የሰጠው ሐሳብ

ሌሎች ወደፊት ሊያጋጥሟቸው ለሚችሉት ፈተናዎች ለመዘጋጀት ከአሁኑ ምን እንዲያደርጉ ትመክራለህ?

ታማኝ መሆን አለመሆናችን የሚታወቀው አስቸጋሪ ሁኔታዎች ሲያጋጥሙን እንደሆነ ግልጽ ነው። ለእነዚህ ፈተናዎች ለመዘጋጀት ከይሖዋ እና ከኢየሱስ ክርስቶስ ጋር ያለንን ዝምድና ከአሁኑ ማጠናከር ይኖርብናል። ሁኔታው ልክ እንደ ሰይፍ ነው። አንድ ሰይፍ በጦርነት ላይ እንዳይሰበር ጠንካራ ሆኖ መሠራት አለበት። አንድ ወታደር አስተማማኝ ሰይፍ ካለው በጦርነቱ ወቅት በልበ ሙሉነት መዋጋት ይችላል። ኢየሱስ “በትንሽ ነገር ታማኝ የሆነ ሰው በብዙ ነገርም ታማኝ ነው” ብሏል። (ሉቃስ 16:10) በመሆኑም አንድ ሰው ከአሁኑ አምላክን በሁሉም ነገር የሚታዘዝ ከሆነ ስደት ሲያጋጥመው ታማኝነቱን የመጠበቅ አጋጣሚው ሰፊ ይሆናል።

ኒኮላይ ዡጊን

የትውልድ ዘመን፦ 1976 (ካዛክስታን)

ግለ ታሪክ፦ በልጅነቱ ስፖርት ይወድ ነበር። የብረት በያጅ ሆኖ ይሠራል። በ1990ዎቹ አጋማሽ ላይ ከይሖዋ ምሥክሮች ጋር መጽሐፍ ቅዱስን ማጥናት ጀመረ። በ1996 ተጠመቀ። ባለቤቱ ገሊና እምነቱን ባትጋራም ደስተኛ ቤተሰብ አላቸው፤ አንድ ወንድና አንዲት ሴት ልጅ አፍርተዋል

የሰጠው ሐሳብ

በዚህ አስቸጋሪ ወቅት ይሖዋን ምን ለምነኸዋል?

ይሖዋ ከማንኛውም ችግር ወይም ከስደት ነፃ የሆነ ሕይወት እንድንመራ አያደርገንም። እነዚህ ነገሮች በአገልጋዮቹ ላይ እንዲደርሱ ይፈቅዳል። ከዚህ አንጻር፣ ይሖዋ የሚያጋጥሙኝን ፈተናዎች በሙሉ በጽናት መቋቋም እንድችል ቅዱስ መንፈሱን እንዲሰጠኝ ለምኜዋለሁ፤ አሁንም እየለመንኩት ነው። በወንጀል ምርመራውና በፍርድ ሂደቱ ወቅት ይሖዋ ደስታዬን እንዳላጣ እንደረዳኝ ይሰማኛል። እሱ ባይረዳኝ ኖሮ ይህን ፈተና መቋቋም እንደማልችል ምንም ጥያቄ የለውም!

ወንድሞቻችን በእምነታቸው ምክንያት ክስ ከተመሠረተባቸው ከሦስት ዓመት የሚበልጥ ጊዜ ቢያልፍም እነዚህ ወንድሞች ለይሖዋ ታማኝ ሆነው ለመቀጠል እንደቆረጡ ምንም አያሻማም። ይሖዋም ለእነሱ ታማኝ እንደሆነ በግልጽ ማየት ይቻላል።—2 ሳሙኤል 22:26

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች