ጥር 24, 2022 | የታደሰው፦ ታኅሣሥ 29, 2023
ሩሲያ

ወቅታዊ መረጃ—ወንድሞች ተፈረደባቸው | ወንድም አሌክሳንደር ፖሎዞቭ እና ወንድም ስቴፓን ሼቬሌቭ ስደት ቢደርስባቸውም በእጅጉ ተባርከዋል

አጫውት

ታኅሣሥ 29, 2023 በክራስናያርስክ ክልል የሚገኘው የኖሪልስክ ከተማ ፍርድ ቤት፣ ወንድም አሌክሳንደር ፖሎዞቭ እና ወንድም ስቴፓን ሼቬሌቭ ጥፋተኛ ናቸው የሚል ውሳኔ አሳልፏል። ሁለቱም የስድስት ዓመት የገደብ እስራት ተፈርዶባቸዋል። በአሁኑ ወቅት ወህኒ አይወርዱም።

የክሱ ሂደት

ጥቅምት 20, 2019

ልዩ ኃይሎች በኖሪልስክ ከተማ አቅራቢያ የሚገኝን አንድ የድንኳን መትከያ ቦታ ከበቡ። ከ50 በላይ የይሖዋ ምሥክሮች በቁጥጥር ሥር ዋሉ
ጥቅምት 26, 2019

አሌክሳንደር ተይዞ ማረፊያ ቤት ገባ
ጥር 21, 2020

አሌክሳንደር ከሦስት ወር ገደማ በኋላ ከማረፊያ ቤት ተለቀቀ
የካቲት 19, 2020

አሌክሳንደር በጽንፈኞች ዝርዝር ውስጥ ተካተተ፤ የባንክ ሒሳቦቹም ታገዱ
ግንቦት 6, 2021

ስቴፓን ከአሌክሳንደር ጋር “በወንጀል ሴራ በመተባበር” ተከሰሰ። ስቴፓን ከተከሰሰባቸው “ወንጀሎች” መካከል መጸለይና መስበክ ይገኙበታል

አጭር መግለጫ

አሌክሳንደር ፖሎዞቭ

የትውልድ ዘመን፦ 1970 (ቶርዞክ፣ ትቬር ክልል)

ግለ ታሪክ፦ በወጣትነቱ ሆኪ እና ዋና ይወድ ነበር። በድንገተኛ አደጋ እርዳታና ሕይወት አድን ሥራ ተካፍሏል። በ1998 ከስቬትላና ጋር ትዳር መሠረተ። ብስክሌት መንዳትና ጉዞ ይወዳሉ

በ1990ዎቹ ከይሖዋ ምሥክሮች ጋር መጽሐፍ ቅዱስን ማጥናት ጀመረ። በ1995 ተጠመቀ

የሰጠው ሐሳብ

ማረፊያ ቤት በነበርክበት ወቅት ይሖዋ የረዳህ እንዴት ነው?

ለመጀመሪያ ጊዜ ምርመራ ከተደረገብኝ በኋላ ወደምታሰርበት ክፍል ተወሰድኩ። . . . አብሮኝ የታሰረው ሰው ለምን እንደታሰርኩ ጠየቀኝ። እኔም የተከሰስኩት በአምላክ ላይ ባለኝ እምነት የተነሳ እንደሆነ ነገርኩት። . . . እሱም “እስቲ ጠረጴዛው ሥር ተመልከት” አለኝ። ጠረጴዛው ሥር ሳይ መደርደሪያ ላይ ሁለት መጽሐፍ ቅዱሶች ተቀምጠው አየሁ። ዓይኔን ማመን አቃተኝ! . . . ከመጀመሪያው ቀን አንስቶ የአምላክ ቃል ነበረኝ። ይሖዋ እንዲህ ባለ አስደናቂ መንገድ ድጋፉን ስላሳየኝ በጣም አመስጋኝ ነኝ።

ወንድሞችና እህቶች ካደረጉልህ ድጋፍ የተጠቀምከው እንዴት ነው?

ወንድሞችና እህቶች ያደረጉልኝ ድጋፍ ምን ያህል እንደጠቀመኝ ለመግለጽ ቃላት ያጥረኛል። አንድ ጠዋት ከማረፊያ ቤት ወደ ፍርድ ቤት በተወሰድኩበት ወቅት ወንድሞች እያጨበጨቡ ተቀበሉኝ፤ አየሩ በጣም ቀዝቃዛ ነበር። ከዚያም ከምሽቱ 12:00 ወደ ማረፊያ ቤት ወደሚወስደው መኪና ስወሰድ ድጋሚ አጨበጨቡልኝ። ይህ በጣም አበረታቶኛል፤ እንዲሁም ግሩም ምሥክርነት ሰጥቷል።

ስቴፓን ሼቬሌቭ

የትውልድ ዘመን፦ 1982 (ማስልያኒኖ፣ ኖቮሲቢርስክ ክልል)

ግለ ታሪክ፦ የኤሌክትሪክ ገመድ ዝርጋታ ባለሙያ ነው። በ2013 ከኦክሳና ጋር ትዳር መሠረተ። ንባብ እና ጉዞ ይወዳሉ

በ1996 የስቴፓን እናትና እህት መጽሐፍ ቅዱስን ማጥናት ጀመሩ። ሁለቱም እውነትን ባይቀበሉም ስቴፓን ማጥናት ጀመረ፤ የይሖዋ ምሥክሮች የሚያስተምሩት ትምህርት በጣም አስደነቀው። መጽሐፍ ቅዱስ የሰዎችን ሕይወት የሚያሻሽል መሆኑ አስገረመው። በ2001 ተጠመቀ

የሰጠው ሐሳብ

ጥሩ መንፈሳዊ ልማድ አንተንና ባለቤትህን የረዳችሁ እንዴት ነው?

ለቤተሰብ አምልኳችን ትልቅ ቦታ እንሰጣለን። ለቤተሰብ አምልኳችን ቀን የመደብነው ከብዙ ዓመታት በፊት ነበር፤ ይህን ፕሮግራማችንን ምንም ነገር እንዲያስተጓጉልብን አንፈቅድም። በዚህም ምክንያት ውዷ ባለቤቴ ጠንካራ እምነት ይዛ እንደምትቀጥል እርግጠኛ ነኝ። በተጨማሪም የመጽሐፍ ቅዱስ ንባቤን ሁልጊዜ አዲስ ለማድረግ እሞክራለሁ። ለምሳሌ አንድ ዓመት ላይ ከዳር እስከ ዳር በቀጥታ አነበብኩት። በቀጣዩ ዓመት ደግሞ ክንውኖቹ በተፈጸሙበት የጊዜ ቅደም ተከተል አነበብኩ። ቀጥሎም መጽሐፎቹን በጸሐፊ ከፋፍዬ አነበብኳቸው። በዚህ መንገድ የመጽሐፍ ቅዱስ ንባቤ ሁልጊዜ አንድ ዓይነት እንዳይሆን አደርጋለሁ፤ የማውቃቸውንም ሐሳቦች ከአዲስ አቅጣጫ ማየት እችላለሁ።

ለሚያሳድዱህ ሰዎች ያለህ አመለካከት የተቀየረው እንዴት ነው?

ይሖዋ [ለእነሱ] ተገቢ አመለካከት እንድይዝ ረድቶኛል። ብዙውን ጊዜ እነዚህ ሰዎች እንደ ማንኛውም ሰው እንደሆኑና ሥራቸውን ለማከናወን ጥረት እያደረጉ እንደሆነ እኔና ባለቤቴ ማየት ችለናል። ከራሳቸው ችግሮች ጋር እየታገሉ ነው፤ እንዲሁም እኛ የምንሰብከው አጽናኝ ተስፋ ያስፈልጋቸዋል።

ይሖዋ ስደት ቢደርስባቸውም በታማኝነት ጽድቅን ‘እያሳደዱ’ ያሉትን ውድ ወንድሞቻችንን መደገፉን እንደሚቀጥል እርግጠኞች ነን።—መሳፍንት 8:4

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች