የካቲት 10, 2023 | የታደሰው፦ ሐምሌ 14, 2023
ሩሲያ

ወቅታዊ መረጃ—ወንድሞች ታሰሩ | ሦስት ወንድሞች ሞስኮ ውስጥ ፍርድ ቤት ቀረቡ

አጫውት

ሐምሌ 12, 2023 በሞስኮ የሚገኘው የሳቭዮሎቭስኪ አውራጃ ፍርድ ቤት፣ ወንድም ሮማን ማርዬቭ፣ ወንድም አናቶሊ ማሩኖቭ እና ወንድም ሰርጌ ቶሎኮኒኮቭ ጥፋተኛ ናቸው የሚል ብይን አስተላልፏል። ሮማን የአራት ዓመት ከስድስት ወር፣ አናቶሊ የስድስት ዓመት ከስድስት ወር፣ ሰርጌ ደግሞ የአምስት ዓመት እስራት ተፈርዶባቸዋል። አናቶሊ ከፍርድ ቤት ወዲያውኑ ወደ እስር ቤት ተወስዷል። ሮማን እና ሰርጌ ቀድሞውንም ማረፊያ ቤት ነበሩ።።

አጭር መግለጫ

ሮማን ማርዬቭ

የትውልድ ዘመን፦ 1978 (ሞስኮ)

ግለ ታሪክ፦ የሞስኮ የትራንስፖርት መሥሪያ ቤት ውስጥ ይሠራ ነበር። ማረፊያ ቤት ከመግባቱ በፊት፣ የአካል ጉዳተኛ ወላጆቹን በዋነኝነት የሚንከባከበው እሱ ነበር

መጽሐፍ ቅዱስን ማንበብ ከጀመረ በኋላ በዳንኤል መጽሐፍ ውስጥ የሚገኙ ትንቢቶች በትክክል መፈጸማቸው አስደነቀው። በ2002 ተጠምቆ የይሖዋ ምሥክር ሆነ

የሰጠው ሐሳብ

ማረፊያ ቤት በቆየህበት ረጅም ጊዜ አዎንታዊ ሆነህ እንድትቀጥል የረዳህ ምንድን ነው?

በእምነቴ የተነሳ ማረፊያ ቤት መግባቴ ያስገነዘበኝ ነገር ቢኖር ይሖዋን ማወደስ የምችልበት ቀዳሚው መንገድ ምግባሬ መሆኑን ነው። አብረውኝ የታሰሩ ሰዎች፣ ምግባሬንና ከሌሎች ጋር ያለኝን ግንኙነት ለወራት ሲመለከቱ ቆይተዋል። የነገሩን ክብደት ስለምገነዘብ፣ ይሖዋ የእሱን ባሕርያት ማንጸባረቅ እንድችል ቅዱስ መንፈሱን እንዲሰጠኝ በየቀኑ እለምነዋለሁ።

ብዙውን ጊዜ ከራሱ ከፈተናው ይልቅ ይበልጥ ከባዱ፣ ገና ለገና ፈተና ይደርስብኛል የሚለው ስጋት ነው። እኛ እምነት እናሳይ እንጂ አምላክ “ድቅድቅ ጨለማ በዋጠው ሸለቆ ውስጥ” እጃችንን ይዞ ያሳልፈናል። (መዝሙር 23:4) ከእኔ የሚጠበቀው ነገር ፈጽሞ እጁን አለመልቀቅ ነው። ይሖዋ ሁሌም በሆነ መንገድ ተስፋዬ እውን ሆኖ እንዲታየኝ ይረዳኛል፤ ሰላሜንና ደስታዬን ጠብቄ መኖር የቻልኩት ለዚህ ነው።

አናቶሊ ማሩኖቭ

የትውልድ ዘመን፦ 1953 (ኢዝማዪል፣ ዩክሬን)

ግለ ታሪክ፦ ጡረታ ከመውጣቱ በፊት የአንድ ጋዜጣ ግራፊክ ዲዛይነር ሆኖ ይሠራ ነበር

በ1975 ከአሌቭቲና ጋር ተጋቡ። ሁለት ወንዶች ልጆች አሏቸው

አሌቭቲና መጽሐፍ ቅዱስን ማጥናት ጀመረች፤ ከዚያም በ1994 ተጠመቀች። አናቶሊ በጋዜጣ ድርጅት ውስጥ ካለው የሥራ ተሞክሮ አንጻር መጀመሪያ ላይ ከይሖዋ ምሥክሮች የማረከው የጽሑፎቻቸው የሕትመት ጥራት ነው። በኋላ ላይ የመጽሐፍ ቅዱስ ትንቢት ትኩረቱን ሳበው፤ በ1999 ተጠመቀ

የሰጠው ሐሳብ

ለስደት የተዘጋጀኸው እንዴት ነው?

እኔና ባለቤቴ አንድ ቀን ስደት ሊደርስብን እንደሚችል እንጠብቅ ነበር። ስለዚህ እያንዳንዱን የዕለት ጥቅስ፣ እያንዳንዱን ርዕስ እንዲሁም ማስታወቂያዎችን ጨምሮ በጉባኤ ስብሰባዎች ላይ የምንባለውን እያንዳንዱን ነገር ትኩረት ሰጥተን ነበር የምንከታተለው። የሚሰጡንን መመሪያዎች በንቃት ለመከታተልና አንድም ሳይቀር ለመጠበቅ ጥረት እናደርጋለን።

እንድትጸና ብርታት የሆነህ ምንድን ነው?

የሚወደን የሰማዩ አባታችን እስካሁን ለእኔም ሆነ ለቤተሰቤ ላደረገልን ነገር ያለኝ አድናቆት ተስፋ እንዳልቆርጥ ብርታት ይሆነኛል። ይሖዋ ታዛዥ ለሆኑ የሰው ልጆች ሁሉ ወደፊት የሚያደርጋቸው ነገሮችም ልቤ በአድናቆት እንዲሞላ ያደርጋሉ። መጨረሻው እንደቀረበ ጥርጥር የለውም። እዚህ ደርሼ ተስፋ መቁረጥ ፈጽሞ የማላስበው ነገር ነው፤ በተለይ ደግሞ የሚደረግልኝን ያን ሁሉ ድጋፍ ሳስበው ተስፋ እንዳልቆርጥ ምክንያት ይሆነኛል።

ሰርጌ ቶሎኮኒኮቭ

የትውልድ ዘመን፦ 1972 (ሞስኮ)

ግለ ታሪክ፦ የጥበቃ ሥራ ይሠራ ነበር

በ2004 ከማሪያ ጋር ተጋቡ። ማሪያ በ2003 መጽሐፍ ቅዱስን ማጥናት ጀምራ ነበር። ሰርጌ ጥያቄዎቹ ከመጽሐፍ ቅዱስ ሲመለሱለት ተደሰተ፤ ብዙም ሳይቆይ እሱም ጥናቱን ተቀላቀለ። በ2005 ሁለቱም ተጠመቁ

የሰርጌ ባለቤት፣ እህት ማሪያ ፓንኮቫ የሰጠችው ሐሳብ a

ከባለቤትሽ ጋር የምትገናኙት እንዴት ነው?

ዋነኛው የምንገናኝበት መንገድ ደብዳቤ ነው። የተለያዩ የመጽሐፍ ቅዱስ ጥቅሶችና ታሪኮች የያዙ ደብዳቤዎች ይልክልኛል። ፈገግ የሚያሰኙ ካርዶችና ሥዕሎችም ይልክልኛል። በቅርቡ በወር ሁለቴ በአካል እንድጠይቀው ተፈቅዶልኛል፤ በአንድ ጊዜ ለ90 ደቂቃ ያህል መገናኘት ይፈቀድልናል። እስከ ማረፊያ ቤቱ ድረስ ጉዞው ሦስት ሰዓት ይፈጃል፤ ስለዚህ ደርሶ መልሱን ጨምሮ እያንዳንዱ ጥየቃ አንድ ሙሉ ቀን ይወስዳል።

ይህ ተሞክሮ ምን አስተምሮሻል?

እኔና ሰርጌ በግልጽ ያየነው ነገር ቢኖር፣ ማንም ሰው፣ አቃቤ ሕጉም ሆነ ዳኛው ወይም መርማሪው ይሖዋ ከፈቀደው ውጭ አንዳች ማድረግ እንደማይችል ነው። ከይሖዋ ቁጥጥር ውጭ ያለ አንድም ነገር የለም።

ሮማን፣ አናቶሊ እና ሰርጌ ሊኮረጅ የሚገባ ግሩም ምሳሌ ትተውልናል። ምንም ዓይነት ችግር ቢገጥመን ይሖዋ ከእኛ ጋር እንዳለ ስለምናውቅ ‘ጉዳት ይደርስብናል ብለን አንፈራም።’—መዝሙር 23:4

የክሱ ሂደት

ጥቅምት 20, 2021

ባለሥልጣናት ሞስኮ ውስጥ ስምንት የይሖዋ ምሥክሮች ቤቶችን ፈተሹ። ሮማን፣ አናቶሊ እና ሰርጌ ‘የጽንፈኛ ድርጅትን እንቅስቃሴ አስተባብረዋል፤ ሌሎችም በእንቅስቃሴው እንዲሳተፉ ቀስቅሰዋል’ በሚል የወንጀል ክስ ተመሠረተባቸው። ሦስቱም ወንድሞች ጣቢያ እንዲቆዩ ተደረገ
ጥቅምት 22, 2021

ሮማን እና ሰርጌ ማረፊያ ቤት ተላኩ። አናቶሊ የቁም እስረኛ ተደረገ
ሰኔ 17, 2022

ክሳቸው በፍርድ ቤት መታየት ጀመረ