ታኅሣሥ 27, 2023 | የታደሰው፦ መጋቢት 6, 2024
ሩሲያ

ወቅታዊ መረጃ—ወንድሞች ታሰሩ | ወንድሞች የእስራት ጊዜ መራዘምም ሆነ የቁም እስር አዎንታዊ አመለካከታቸውን አልነጠቃቸውም

አጫውት

መጋቢት 5, 2024 በኢርኩትስክ የሚገኘው የኦክትያቢርስኪ አውራጃ ፍርድ ቤት ወንድም ኒኮላይ ማርቲኖቭ፣ ሰርጌ ኮስቴዬቭ፣ ያሮስላቭ ካሊን፣ ሚካኼል ሞይሽ፣ ኢጎር ፖፖቭ፣ ዴኒስ ሳራዣኮቭ፣ አሌክሲ ሶልኔችኒ፣ አንድሬ ቶልማቼቭ እና ሰርጌ ቫሲሊዬቭ ጥፋተኛ ናቸው የሚል ፍርድ አስተላልፏል። ኒኮላይ፣ ሰርጌ ኮስቴዬቭ፣ ያሮስላቭ፣ ሚካኼል፣ አሌክሲ እና አንድሬ የሰባት ዓመት እስራት ተፈርዶባቸዋል። ኢጎር እና ዴኒስ የስድስት ዓመት ከአራት ወር እስራት ተፈርዶባቸዋል። ሰርጌ ቫሲሊዬቭ ደግሞ የሦስት ዓመት እስራት ተፈርዶበት ወዲያውኑ ከፍርድ ቤት ወደ ማረሚያ ቤት ተወስዷል። ሌሎቹ ወንድሞች ማረፊያ ቤት የነበሩ ሲሆን እስራታቸው በዚሁ ይቀጥላል።

አጭር መግለጫ

ኒኮላይ ማርቲኖቭ

ትውልድ፦ 1958 (ባንዳርካ፣ ኢርኩትስክ ክልል)

ግለ ታሪክ፦ ሹፌር ሆኖ ይሠራ ነበር

በ1982 ከኢሪና ጋር ተጋቡ። ሁለት ልጆች አሏቸው

በ1997 ኢሪና ከይሖዋ ምሥክሮች ጋር ማጥናት ጀመረች። ኒኮላይ፣ የመጽሐፍ ቅዱስ ትንቢቶች በትክክል እንደሚፈጸሙ ሲረዳ እውነትን እንዳገኘ እርግጠኛ ሆነ። በ1998 ሁለቱም ተጠመቁ

የኒኮላይ ባለቤት ኢሪና የሰጠችው ሐሳብ a

ባለቤትሽ ማረፊያ ቤት ከገባ ሁለት ዓመት ቢያልፍም አዎንታዊ ሆኖ እንዲቀጥል የረዳው ምንድን ነው?

ኒኮላይ መጽሐፍ ቅዱስን የማንበብና የማሰላሰል ልማዱን ቀጥሏል፤ ይሖዋ ጸሎቱን እንዴት እንደመለሰለት ብዙ ጊዜ ይናገራል። እርግጥ ነው፣ ከእኛ መለየቱ በጣም ከብዶታል። ኒኮላይ ጥሩ ባልና አባት ነው። እንደ ቀድሞው ለእኛ የሚያስፈልገውን ማቅረብ አለመቻሉ ያሳዝነዋል። ይሁንና ይሖዋ በወንድሞቻችን እና በእህቶቻችን አማካኝነት ምን ያህል እየተንከባከበን እንዳለ እንነግረዋለን፤ ይህም የአእምሮ ሰላም ሰጥቶታል። ቤተሰባችን አዲሱ ዓለም ሲገባ የሚኖረውን ሁኔታ በዓይነ ሕሊናው መሣሉ እንደረዳውም ይናገራል። ያን ጊዜ ምን ዓይነት ቤት እንደሚሠራ ወይም ምን ዓይነት የፍራፍሬ ዛፍ እንደሚተክል ገና ከአሁኑ አስቦበታል።

ያሮስላቭ ካሊን

ትውልድ፦ 1969 (ፒቮቫሪካ፣ ኢርኩትስክ ክልል)

ግለ ታሪክ፦ ያደገው በይሖዋ ምሥክር ቤተሰብ ውስጥ ነው። ወላጆቹና አያቶቹ በ1951 ወደ ሳይቤሪያ ተግዘው ነበር

የቴሌቪዥን እና የሬዲዮ ጥገና ባለሙያ ነበር

በ1987 ተጠምቆ የይሖዋ ምሥክር ሆነ

በ1991 ከታትያና ጋር ተጋቡ። ሁለት ወንዶችና ሁለት ሴቶች ልጆች አፍርተዋል። የመጨረሻው ልጃቸው በ2007 ሕይወቱ አልፏል

የያሮስላቭ ባለቤት ታትያና የሰጠችው ሐሳብ b

ባለቤትሽ ማረፊያ ቤት ምን ዓይነት ከባድ ሁኔታዎችን እየተጋፈጠ ነው? እንዲጸና እየረዳው ያለውስ ምንድን ነው?

ያሮስላቭ ከሁለት ዓመት በላይ ከሌሎች ተገልሎ ብቻውን ታስሮ ቆይቷል፤ ይህ ለእሱ በጣም ከባድ ነው። በባሕሪው ከሰው ጋር መሆን የሚያስደስተው ሰው ነው። ብቻውን መታሰሩ በስሜቱም ሆነ በጤንነቱ ላይ ጫና ፈጥሮበታል። ሆኖም ለተስፋ መቁረጥ እጅ አይሰጥም፤ ችግሩን እያሰበም አይቆዝምም። ቆላስይስ 1:11⁠ን ብዙ ጊዜ ደብዳቤው ላይ ይጠቅሰዋል፤ ጥቅሱ “በትዕግሥትና በደስታ ሁሉንም ነገር በጽናት እንድትቋቋሙ የአምላክ ታላቅ ኃይል የሚያስፈልጋችሁን ብርታት ሁሉ ይስጣችሁ” ይላል። እስከ መጨረሻው ንጹሕ አቋሙን ለመጠበቅና በይሖዋ ለመታመን ቆርጧል። ያሮስላቭ፣ አሁንም ሆነ ወደፊት ለዘላለም የይሖዋን ፈቃድ ማድረግ አብዝቶ እንደሚክስ እርግጠኛ ነው።

ሚካኼል ሞይሽ

ትውልድ፦ 1987 (ዩክሬን)

ግለ ታሪክ፦ የግንባታ እና የሽያጭ ባለሙያ ሆኖ ይሠራ ነበር

በ2009 ከዬሌና ጋር ተጋቡ። ሁለት ወንዶች ልጆች አሏቸው

ዬሌና በ2010 ተጠመቀች። ሚካኼል በስብሰባዎች ላይ አብሯት መገኘት ጀመረ። በ2016 ተጠመቀ

የሚካኼል ባለቤት ዬሌና የሰጠችው ሐሳብ c

ሚካኼል ማረፊያ ቤት ከገባ ከሁለት ዓመት በላይ ቢሆነውም አንቺንም ሆነ ልጆቻችሁን በመንፈሳዊ መንከባከቡን የቀጠለው እንዴት ነው?

ትልቁ ልጃችን 12 ዓመቱ ነው። ትንሹ ልጃችን ደግሞ አሁን ሁለት ዓመት ተኩል ነው፤ ሚካኼል ተይዞ ወደ ማረፊያ ቤት በተላከበት ወቅት ገና የስድስት ወር ልጅ ነበር። ሁለቱም ልጆቻችን አባታቸውን ይናፍቃሉ። በተለይ ትንሹ ልጃችን አባቱ ለምን ቤት እንደሌለ አይገባውም። ሚካኼል አዘውትሮ ይጽፍላቸዋል፤ ግጥም ይልክላቸዋል፣ ስለ እንስሳት እና ስለ ወፎች ያስተምራቸዋል፣ የቃላት ጨዋታ ሠርቶ ይልክላቸዋል፣ ምርምር የሚጠይቁ ቀለል ያሉ የቤት ሥራዎችም ሳይቀር ይሰጣቸዋል። እኔም ተስፋ ስቆርጥ ያበረታታኛል። አንዳንድ ጊዜ ‘ለምን እኛ? ይሄ ነገር ለምን በእኛ ቤተሰብ ላይ ደረሰ?’ የሚል ሐሳብ ይመጣብኝ ነበር። ሚካኼል በጻፈልኝ በአንደኛው ደብዳቤው ላይ እነዚህ ጥያቄዎች በራሳቸው የመንፈሳዊ ድክመት ምልክት እንዳልሆኑ በመግለጽ አረጋጋኝ። እንዲህ አለኝ፦ “ዋናው ነገር እንዲህ ዓይነቱ ሐሳብ ሲመጣ የምንወስደው እርምጃ ነው። ልክ እንደ ኢዮብ፣ ይሖዋ አስተሳሰባችንን እንዲያርመው የምንፈቅድ ከሆነ እምነታችን እንዲታደስ ይረዳናል፤ ትክክለኛው እይታ እንዲኖረንም ያግዘናል።” ይህ ደብዳቤ በጣም አበረታቶኛል።

ኢጎር ፖፖቭ

ትውልድ፦ 1987 (ካዛክስታን)

ግለ ታሪክ፦ ሰባት ወንድሞችና እህቶች አሉት። የ11 ዓመት ልጅ ሳለ አባቱ ሞተ

የቤት ፊኒሺንግ ባለሙያ እና የቧንቧ ሠራተኛ ነበር

አባቱ ከሞተ በኋላ የኢጎር እናት እና ታላቅ ወንድሙ መጽሐፍ ቅዱስን ማጥናት ጀመሩ። ኢጎርም አብሯቸው ማጥናት ጀመረ፤ በተለይ የትንሣኤ ተስፋን ሲማር ልቡ ተነካ። ኢጎር ከሰባት የቤተሰቡ አባላት ጋር በ2006 ተጠመቀ

በ2013 ከማንጂራ ጋር ተጋቡ

የኢጎር ባለቤት ማንጂራ የሰጠችው ሐሳብ d

አንቺም ሆንሽ ባለቤትሽ እነዚህን ከባድ ሁኔታዎች በጽናት እንድትቋቋሙ የረዳችሁ የመጽሐፍ ቅዱስ ጥቅስ አለ?

ኢጎር ረዘም ላለ ጊዜ ብቻውን ታስሮ ነበር። በአንደኛው ደብዳቤው ላይ መዝሙር 118:5⁠ን ጠቅሶልኝ ነበር፤ “በተጨነቅኩ ጊዜ ያህን ተጣራሁ፤ ያህም መለሰልኝ፤ ደህንነት ወደማገኝበት ስፍራም አመጣኝ” ይላል። ከዚያም እንዲህ ሲል ጻፈልኝ፦ “‘ደህንነት ወደማገኝበት ስፍራ’ የሚለው አባባል ‘ሰፊ ወደሆነ ስፍራ’ ተብሎም ሊተረጎም ይችላል። መፈናፈኛ እንዳጣን ሲሰማን ወይም አሉታዊ ስሜቶች እስርስር አድርገው ሲይዙን ይሖዋ በምሳሌያዊ አነጋገር ነፃ በማውጣት ጸሎታችንን ይመልስልናል፤ ይኸውም የአእምሮና የልብ ሰላም ይሰጠናል።” ያሳለፍነው ተሞክሮ በተደጋጋሚ ያስገነዘበን ነገር ቢኖር ይሖዋ እኛን ለመደገፍ ሁልጊዜ አጋጣሚ እንደሚፈልግ ነው፤ የትም እንሁን የት ፈጽሞ አይተወንም።

ዴኒስ ሳራዣኮቭ

ትውልድ፦ 1988 (ሳያኖጎርስክ፣ የካካሲያ ሪፑብሊክ)

ግለ ታሪክ፦ በማስታወቂያ ዘርፍ ይሠራ ነበር

ያደገው በይሖዋ ምሥክር ቤተሰብ ውስጥ ነው። ወላጆቹ ለመንፈሳዊ ነገሮች አድናቆት እንዲኖረው አድርገው አሳድገውታል። የመጽሐፍ ቅዱስን መመሪያዎች ማክበር ያለውን ጥቅም አመነበት። በ2004 ተጠመቀ

በ2007 ከኦሌስያ ጋር ተጋቡ

የዴኒስ ባለቤት ኦሌስያ የሰጠችው ሐሳብ e

ዴኒስ እንዴት እያበረታታሽ ነው?

እኔና ዴኒስ በአብዛኛው የምንገናኘው በደብዳቤ አማካኝነት ነው። በሳምንት አንዴ በስልክ ለአምስት ደቂቃ ማውራት ይፈቀድልናል። በወር ሁለቴ ደግሞ በአካል ሄጄ ለአንድ ሰዓት ያህል እንዳነጋግረው ተፈቅዶልኛል። በመስታወት ግድግዳ በኩል በስልክ እንነጋገራለን። ዴኒስ በተገናኘን ቁጥር አንድ መንፈሳዊ ሐሳብ ያካፍለኛል። ያለንበትን ሁኔታ ተስፋ ቢስ አድርገን መመልከት እንደሌለብን ያስታውሰኛል። ማድረግ በቻልነው ነገር የምንደሰትበት በቂ ምክንያት አለን። ፈተናው አጠነከረን እንጂ ቅስማችንን አልሰበረውም።

አሌክሲ ሶልኔችኒ

ትውልድ፦ 1976 (አባካን፣ ክራስኖያርስክ ግዛት)

ግለ ታሪክ፦ የኤሌክትሪክ ባለሙያ ነበር

አሌክሲ ጦር ሠራዊት ውስጥ በነበረበት ወቅት እናቱ እና ታናሽ እህቱ ከይሖዋ ምሥክሮች ጋር ማጥናት ጀመሩ። ወደ ቤት ሲመለስ መጽሐፍ ቅዱስን የማወቅ ፍላጎት ስላደረበት ማጥናት ጀመረ። በ2004 ተጠመቀ

በ2011 ከአልዮና ጋር ተጋቡ

የአሌክሲ ባለቤት አልዮና የሰጠችው ሐሳብ f

ባለቤትሽ በእስር ላይ ቢሆንም አዎንታዊ አመለካከት ይዞ እንዲቀጥል የረዳው ምንድን ነው?

አሌክሲ አዘውትሮ ይጸልያል፤ ይህም ይሖዋ እንደሚኮራበት ለማስታወስ ረድቶታል። ፖሊሶችና የፍርድ ቤት ባለሥልጣናት ሥራቸው ሆኖባቸው እንጂ ሆን ብለው በክፋት እንዳልሆነ ለማስታወስም ጥረት ያደርጋል። ይህም በራሱና በሚደርስበት ችግር ላይ እንዳያተኩር ረድቶታል፤ ከዚህ ይልቅ ሁኔታው ባስገኘለት ለይሖዋ ስም ጥብቅና የመቆም መብት ላይ ያተኩራል። እርግጥ ነው፣ ናፍቆት የሚያስቸግረው ጊዜ አለ፤ እኔን ቤተሰቡንና ጓደኞቹን ይናፍቃል። ሆኖም ሁሌም አዎንታዊ ለመሆን ጥረት ያደርጋል፤ አሁንም እንደ ቀድሞው ይቀልዳል እንዲሁም ይጫወታል።

ሰርጌ ቫሲሊዬቭ

ትውልድ፦ 1951 (ኢርኩትስክ፣ ኢርኩትስክ ክልል)

ግለ ታሪክ፦ ፋርማሲ ውስጥ ይሠራ ነበር

የሕይወትን ትርጉም በተመለከተ ለነበሩት ጥያቄዎች ከመጽሐፍ ቅዱስ ላይ አጥጋቢ መልስ አገኘ። በ2002 ተጠመቀ

የሰጠው ሐሳብ

ያሳለፍከው ነገር ስለ ይሖዋ ምን አስተምሮሃል?

ባለሥልጣናቱ በሬን በርግደው ገብተው ቤቱን መበርበር ሲጀምሩ ይሖዋ በሚገርም ሁኔታ እንድረጋጋ ረዳኝ። ሐዋርያው ጳውሎስ በፊልጵስዩስ 4:13 ላይ “ኃይልን በሚሰጠኝ በእሱ አማካኝነት ለሁሉም ነገር የሚሆን ብርታት አለኝ” ሲል ምን ማለቱ እንደሆነ አሁን በደንብ ገብቶኛል። ይሖዋ ልክ በሚያስፈልገኝ ወቅት የአእምሮ ሰላም እንደሚሰጠኝ አንዳች ጥርጣሬ የለኝም።

ውድ ወንድሞቻችን ለጊዜውም ቢሆን ከቤተሰቦቻቸው መለየት ግድ ሆኖባቸዋል፤ እስከጸኑ ድረስ ግን ከአምላክ ፍቅር ሊለያቸው የሚችል አንዳች ነገር እንደሌለ እርግጠኞች ነን።—ሮም 8:35-39

የክሱ ሂደት

ጥቅምት 4, 2021

በኢርኩትስክ ክልል የሚኖሩ የይሖዋ ምሥክሮች ቤታቸው ተፈተሸ። ኒኮላይ፣ ሰርጌ ኮስቴዬቭ፣ ያሮስላቭ፣ ሚካኼል፣ አሌክሲ፣ አንድሬ እና ሰርጌ ቫሲሊዬቭ የክስ ፋይል ተከፈተባቸው። ሰባቱም ወንድሞች ወደ ጣቢያ ተወሰዱ
ጥቅምት 5, 2021

ያሮስላቭ፣ ሚካኼል እና አሌክሲ ማረፊያ ቤት ተላኩ
ጥቅምት 6, 2021

ሰርጌ ኮስቴዬቭ፣ ኒኮላይ እና አንድሬ ማረፊያ ቤት ተላኩ። ሰርጌ ቫሲሊዬቭ ከጣቢያ ተለቅቆ በቁም እስር እንዲቆይ ተወሰነ
ኅዳር 30, 2021

ተጨማሪ ቤቶች ተፈተሹ። ዴኒስ እና ኢጎር ተይዘው ከ1500 ኪሎ ሜትር በላይ ርቆ ወደሚገኘው ወደ ኢርኩትስክ ተወሰዱ
ታኅሣሥ 1, 2021

ኢጎር ማረፊያ ቤት እንዲገባ ተደረገ
ታኅሣሥ 2, 2021

ዴኒስ ማረፊያ ቤት እንዲገባ ተደረገ
ታኅሣሥ 29, 2022

ክሳቸው በፍርድ ቤት መታየት ጀመረ

a b c d e f ወንድም ኒኮላይ፣ ያሮስላቭ፣ ሚካኼል፣ ኢጎር፣ ዴኒስ እና አሌክሲ ይህ ዜና በተጠናቀረበት ወቅት ማረፊያ ቤት ስለነበሩ ቃለ መጠይቅ ልናደርግላቸው አልቻልንም።

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች