ግንቦት 20, 2022 | የታደሰው፦ ጥቅምት 17, 2023
ሩሲያ

ወቅታዊ መረጃ—ወንድሞች እስር ተፈረደባቸው | ቤተሰቦች በይሖዋ እገዛ ስደትን በጽናት እየተቋቋሙ ነው

አጫውት

ወቅታዊ መረጃ—ወንድሞች እስር ተፈረደባቸው | ቤተሰቦች በይሖዋ እገዛ ስደትን በጽናት እየተቋቋሙ ነው

ጥቅምት 13, 2023 በኦርዮል ከተማ የሚገኘው የሶቪየትስኪ አውራጃ ፍርድ ቤት ወንድም ቭላድሚር ሜልኒክ፣ ወንድም ቭላድሚር ፒስካሬቭ እና ወንድም አርተር ፑቲንሴቭ ጥፋተኞች ናቸው በማለት በእያንዳንዳቸው ላይ የስድስት ዓመት እስራት ፍርድ አስተላልፏል። ሦስቱም ወንድሞች ከታኅሣሥ 2020 ጀምሮ ማረፊያ ቤት የነበሩ ሲሆን አሁንም ወህኒ ይቆያሉ።

የክሱ ሂደት

ታኅሣሥ 8, 2020

በወንድም ሜልኒክ፣ በወንድም ፒስካሬቭ እና በወንድም ፑቲንሴቭ ላይ ክስ ተመሠረተ
ታኅሣሥ 9, 2020

ፖሊሶች በኦርዮል የሚገኙ ስምንት የይሖዋ ምሥክሮችን ቤቶች ፈተሹ፤ ከእነዚህ መካከል የሦስቱ ወንድሞች ቤቶች ይገኙበታል። በኋላም ወደ ጣቢያ ተወሰዱ
ታኅሣሥ 11, 2020

ወንድም ሜልኒክ እና ወንድም ፒስካሬቭ ማረፊያ ቤት እንዲገቡ ተደረገ
ታኅሣሥ 14, 2020

ወንድም ፑቲንሴቭ ማረፊያ ቤት እንዲገባ ተደረገ
ጥር 19, 2021

ወንድም ፒስካሬቭ አስቸኳይ ክትትል የሚፈልጉ የጤና እክሎች እንዳሉበት ለባለሥልጣናቱ ተነገራቸው፤ ሆኖም አስፈላጊውን ሕክምናም ሆነ መድኃኒት እንዳያገኝ ከለከሉት
ጥር 21, 2021

ወንድም ፒስካሬቭ ባለቤቱ ያመጣችለትን መድኃኒት እንዲቀበል ተፈቀደለት፤ የሕክምና ክትትል ለማድረግ ግን አልተፈቀደለትም
ሰኔ 24, 2021

ወንድም ፒስካሬቭ ለምርመራ ወደ ሆስፒታል ተወሰደ፤ ስትሮክ እንዳጋጠመው ታወቀ። ይህ የጤና ችግር እንዳጋጠመው እየታወቀም ወደ ማረፊያ ቤት እንዲመለስ ተደረገ
ጥቅምት 29, 2021

ወንድሞች ‘ጽንፈኛ ተብሎ የተፈረጀን ድርጅት እንቅስቃሴዎች አስተባብረዋል’ የሚል ክስ ተመሠረተባቸው
ጥር 31, 2022

ጉዳያቸው በፍርድ ቤት መታየት ጀመረ

አጭር መግለጫ

ቭላድሚር ሜልኒክ

የትውልድ ዘመን፦ 1965 (ዶኔስክ፣ ዩክሬን)

ግለ ታሪክ፦ ወታደር ነበር። በኋላም መሐንዲስ ሆኖ ሠርቷል

በ1987 ከኢሪና ጋር ተጋቡ። ሦስት ሴቶች ልጆች አሏቸው። ወንድ ልጃቸው በ1991 ሞቶባቸዋል

ያደገው በአምላክ በማያምን ቤተሰብ ውስጥ ነው። እሱም ሆነ ባለቤቱ ስለ ኢየሱስ ሕይወት ካጠኑ በኋላ መጽሐፍ ቅዱስን የመማር ፍላጎት አደረባቸው። በ1992 ተጠመቀ

የቭላድሚር ሚስት ኢሪና የሰጠችው ሐሳብ a

ቭላድሚር ማረፊያ ቤት ባለበት ወቅት ሌሎችን በመርዳት ላይ ያተኮረው እንዴት ነው?

ቭላድሚር ለእኔና ለልጆቻችን ለቤተሰብ አምልኮ የሚሆኑ ሐሳቦችን ያካፍለናል፤ ይህን የሚያደርገው በደብዳቤ አማካኝነት ነው። ለቤተሰብ አምልኮ የሚሆኑ ግጥሞች፣ ታሪኮች፣ ጨዋታዎችና የመጽሐፍ ቅዱስ ጥቅሶች ጽፎ ይልክልናል።

እንዲያውም አብሮት ለታሰረ አንድ ሰው የመጽሐፍ ቅዱስ ጥናት መምራት ችሏል። . . . ጥናት የጀመረው ይህ ወጣት በኋላ ላይ ወደ ሌላ ከተማ ተዛውሯል። ቭላድሚር እንደነገረኝ ከሆነ፣ ወጣቱ እዚያ ላሉት ሌሎች እስረኞች የተማረውን ነገር እያስተማራቸው ነው።

ቭላድሚር ፒስካሬቭ

የትውልድ ዘመን፦ 1956 (ካርፒንስክ፣ ስቬርድሎቭስክ ክልል)

ግለ ታሪክ፦ መሐንዲስ ሆኖ ይሠራ ነበር። በ1976 ከታትያና ጋር ተጋቡ። አንድ ወንድና አንዲት ሴት ልጅ አሏቸው። እሱም ሆነ ባለቤቱ ስለ ኢየሱስ እውነቱን ሲማሩ ከይሖዋ ምሥክሮች ጋር መጽሐፍ ቅዱስን ለማጥናት ተስማሙ። በ1995 ተጠመቀ

የቭላድሚር ሚስት ታትያና የሰጠችው ሐሳብ b

ባለቤትሽ ማረፊያ ቤት ውስጥ በጽናት እንዲቀጥል የረዳው ምንድን ነው?

ቭላድሚር ብዙ ጥያቄዎች ያሉት ሰው ሲያገኝ ደስ ይለዋል፤ ከእንዲህ ዓይነቱ ሰው ጋር የሚያደርገውን ውይይት በረከትና የብርታት ምንጭ አድርጎ ይመለከተዋል። እንዲህ ብሎኛል፦ “ማረፊያ ቤት ውስጥ ብሆን እንኳ በጌታ ሥራ መጠመድ ደስ የሚል ስሜት የሚፈጥር ነገር ነው!” ባለቤቴ የትም ቢሄድ የመንግሥቱን መዝሙሮች መዘመሩን አይተውም። በተለይ “ጸንተን እንጠብቃለን” የሚለውን መዝሙር ይወደዋል። እምነቱን ያጠናክርለታል፤ ለይሖዋ ያለውን ታማኝነት ለመጠበቅም ይረዳዋል። ብዙ ጊዜ የመዝሙሩን ስንኞች ጽፎ ልኮልኛል፦ መጽናት ያስፈልገናል፤/መቆም በ’ምነታችን።/ፍቅሩ ዋስትናችን ነው፤/ጸንቶ መኖር ነው ሁሌም ግባችን።”

አርተር ፑቲንሴቭ

የትውልድ ዘመን፦ 1970 (ቺታ፣ ትራንስ ባይካል ግዛት)

ግለ ታሪክ፦ ከስድስት ልጆች የመጀመሪያው ነው። የኤሌክትሪክ ባለሙያ፣ ገበሬና የታክሲ ሹፌር ሆኖ ሠርቷል። በ1993 ከልዩድሚላ ጋር ተጋቡ። በ2005 ተጠመቀ

የአርተር ሚስት ልዩድሚላ የሰጠችው ሐሳብ c

የይሖዋን ድጋፍ እንዳገኘሽ የተሰማሽ ልዩ አጋጣሚ አለ?

ባለቤቴን ይዘው ጣቢያ ሲያስገቡት መርማሪው ስልካችንን ጨምሮ ሁሉንም የኤሌክትሮኒክ መሣሪያዎቻችንን ወስዶብን ነበር። ብቻዬን ነበርኩ፤ [ጉዳዩን ለሌላ ሰው መናገር የምችልበት መንገድም አልነበረም]። በጣም ደንግጬ ነበር፤ ይሖዋ እንዲረዳኝ ጸለይኩ። ወንድሞችን ማግኘትና ስለተፈጠረው ነገር ለእነሱ መንገር የምችልበትን መንገድ እንዲጠቁመኝ ይሖዋን ጠየቅኩት። የሚገርመው፣ አርተርን ወደ ጣቢያ የሚወስደው መኪና እንደሄደ ወንድሞች ደረሱ። አበረታቱኝ፣ ስልክም ሰጡኝ። ዓመቱን ሙሉ ሲንከባከቡኝ ቆይተዋል፤ አሁንም እየተንከባከቡኝ ነው። ይሖዋ በትክክለኛው ጊዜ ላይ ለጸሎታችን መልስ እንደሚሰጥና ስሜቴን እንደሚረዳ ተገንዝቤያለሁ።

እነዚህ ቤተሰቦች ለጊዜው መለያየት ግድ ሆኖባቸዋል፤ ከይሖዋ ፍቅራዊ እንክብካቤና ጥበቃ ሊለያቸው የሚችል አንዳች ነገር እንደሌለ ማወቃችን ግን ያጽናናናል።—ሮም 8:38, 39

a b c ይህ ዜና በተጠናቀረበት ወቅት ወንድም ሜልኒክ፣ ወንድም ፒስካሬቭ እና ወንድም ፑቲንሴቭ ማረፊያ ቤት ስለነበሩ የእነሱን አስተያየት ማግኘት አልተቻለም።

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች