ግንቦት 19, 2022 | የታደሰው፦ የካቲት 6, 2023
ሩሲያ

ወቅታዊ መረጃ—የጥፋተኝነት ብይን | በእምነታቸው ምክንያት ችሎት ፊት የቆሙ የሌሶዛቮድስክ የይሖዋ ምሥክሮች

አጫውት

የካቲት 3, 2023 በፕሪሞርይስ ክልል የሚገኘው የሌሶዛቮድስኪ አውራጃ ፍርድ ቤት ወንድም ዬቭጌኒ ግሪኔንኮ፣ ወንድም ሰርጌ ኮቤሌቭ እና እህት ስቬትላና ዬፍሬሞቫ ጥፋተኛ ናቸው የሚል ብይን አስተላልፏል። ዬቭጌኒ እና ሰርጌ እያንዳንዳቸው የስድስት ዓመት የገደብ እስራት፣ ስቬትላና ደግሞ የሦስት ዓመት የገደብ እስራት ተፈርዶባቸዋል። በእርግጥ በአሁኑ ወቅት ወህኒ አይወርዱም።

የክሱ ሂደት

ግንቦት 12, 2020

ዬቭጌኒ “ጽንፈኛ” ተብሎ የተፈረጀን ድርጅት እንቅስቃሴዎች አስተባብሯል የሚል የወንጀል ክስ ተመሠረተበት። የፌዴራል ደህንነት አባላት የዬቭጌኒን እና የሰርጌን ቤት እንዲፈትሹ ተላኩ። ሌሎች ፖሊሶች ደግሞ ሰርጌ ወደሚሠራበት ቦታ ሄደው ያዙት። ለአራት ሰዓታት ምርመራ ካደረጉበት በኋላ ተለቀቀ። ዬቭጌኒም ተይዞ ማረፊያ ቤት ተወሰደ
ግንቦት 14, 2020

ፍርድ ቤቱ፣ ዬቭጌኒ ማረፊያ ቤት እንዲቆይ ትእዛዝ ሰጠ
ግንቦት 29, 2020

ባለሥልጣናቱ፣ ዬቭጌኒን ስፓስክ ዳልኒ ውስጥ ወደሚገኝ ማረፊያ ቤት አዛወሩት
ሐምሌ 8, 2020

ዬቭጌኒ ከማረፊያ ቤት ወጥቶ የቁም እስረኛ እንዲሆን ፍርድ ቤቱ ትእዛዝ ሰጠ
የካቲት 6, 2021

ዬቭጌኒ ከቁም እስር ተለቀቀ፤ ሆኖም አካባቢውን ለቆ እንዳይሄድ ታገደ
መጋቢት 8, 2021

ሰርጌ “ጽንፈኛ” ተብሎ የተፈረጀ ድርጅት ባካሄዳቸው እንቅስቃሴዎች ተሳትፏል የሚል ክስ ተመሠረተበት
ሚያዝያ 6, 2021

ስቬትላና ክሱ ላይ ተካተተች

አጭር መግለጫ

ዬቭጌኒ ግሪኔንኮ

የትውልድ ዘመን፦ 1970 (ሌሶዛቮድስክ)

ግለ ታሪክ፦ ሙያው አናጢነት ነው። ከ1994 አንስቶ ተይዞ እስከታሰረበት ጊዜ ድረስ የእንጨት ማቀነባበሪያ ተቆጣጣሪ ሆኖ ይሠራ ነበር። ዓሣ ማጥመድና እንጉዳይ መሰብሰብ ይወዳል። በ1997 መጽሐፍ ቅዱስን ማጥናት ጀመረ። በ1999 ተጠምቆ የይሖዋ ምሥክር ሆነ

የሰጠው ሐሳብ

ማረፊያ ቤት ሳለህ ደስታህን እንዳታጣ የረዳህ ምንድን ነው?

የተለያዩ ጥቅሶችን ማስታወሴና ለእኔ ሁኔታ የሚሠሩት እንዴት እንደሆነ ማሰላሰሌ ደስታዬን እንዳላጣ ረድቶኛል። እየደረሰብን ያለው ስደት ከባድ ቢሆንም የመጽሐፍ ቅዱስ ትንቢት ፍጻሜ እንደሆነ እረዳለሁ። ደግሞም ብዙ ወንድሞችና እህቶች ተመሳሳይ መከራ ቢደርስባቸውም እምነታቸውንና ለይሖዋ ያላቸውን ታማኝነት መጠበቅ እንደቻሉ ከግል ጥናቴ ተምሬያለሁ። ይህ እኔም ስደቱን በጽናት ማለፍ እንደምችል ያረጋግጥልኛል።

ተስፋ እንዳትቆርጥ የሚረዳህ ምንድን ነው?

በዓለም ላይ እየተፈጸሙ ያሉት ነገሮች የዚህ ሥርዓት ፍጻሜ በጣም እንደቀረበ ያሳያሉ። መጽናት የሚያስፈልገኝ ለጥቂት ጊዜ ብቻ ነው፤ በዚህ ዓለም ላይ ስለሚደርሰው ጥፋት የሚገልጹት ትንቢቶች ተፈጽመው የማይበት ጊዜ በጣም ቀርቧል።

ሰርጌ ኮቤሌቭ

የትውልድ ዘመን፦ 1975 (ኩርስኮዬ፣ ፕሪሞርይስ ክልል)

ግለ ታሪክ፦ ባቡር ጣቢያ ውስጥ ቴክኒሽያን ሆኖ ይሠራ ነበር። በ1997 ከልዩድሚላ ጋር ተጋቡ። መጽሐፍ ቅዱስን አጥንቶ በ2007 ተጠመቀ። ልዩድሚላም የይሖዋ ምሥክር ሆናለች

የሰጠው ሐሳብ

በዚህ ጊዜ ውስጥ ለሌሎች ለመመሥከር የሚያስችል ምን አጋጣሚ አግኝተሃል?

ለሌሎች ስለ እምነቴም ሆነ ስለ ይሖዋ ለመናገርና ለመስበክ የሚያስችሉኝ ብዙ አጋጣሚዎች አግኝቻለሁ። ለመርማሪዎቹ ብቻ ሳይሆን ለሥራ ባልደረቦቼም እሰብክ ነበር። ፍርድ ቤት የቀረብኩትና ከሥራ የተባረርኩት ለምን እንደሆነ ሲጠይቁኝ ምክንያቱን እነግራቸዋለሁ። . . . አሁን ያለሁበት ሁኔታ ምንም ያህል አስቸጋሪ ቢሆን ለይሖዋ የማቀርበውን አገልግሎት ከፍ ማድረግ እንደምችል ከዚህ ተምሬያለሁ።

ስቬትላና ዬፍሬሞቫ

የትውልድ ዘመን፦ 1950 (ብላጎቭዬሸዬንስክ፣ አሙር ክልል)

ግለ ታሪክ፦ በ1991 እስከተዘጋበት ጊዜ ድረስ በአልባሳት ፋብሪካ ውስጥ ትሠራ ነበር። በ1996 በማኅበራዊ አገልግሎት ቢሮ ውስጥ መሥራት ጀመረች። ከዘጠኝ ዓመት በኋላ ጡረታ ወጣች። በ1992 መጽሐፍ ቅዱስ ማጥናት ጀመረች። ሁሉንም ነገር የፈጠረው አምላክ እንደሆነ አመነች። በ1993 ተጠመቀች

የሰጠችው ሐሳብ

በዚህ የስደት ጊዜ አዎንታዊ ሆነሽ እንድትቀጥዪ የረዳሽ ምንድን ነው?

ኢየሱስ ማቴዎስ 10:18 ላይ “ደግሞም በእኔ ምክንያት በገዢዎችና በነገሥታት ፊት ያቀርቧችኋል፤ በዚያ ጊዜ ለእነሱም ሆነ ለአሕዛብ መመሥከር ትችላላችሁ” ብሏል። በዚህ ትንቢት ፍጻሜ ላይ እኔም የበኩሌን ድርሻ ማበርከት ችያለሁ፤ እንዲህ ዓይነት ትልቅ መብት በማግኘቴ ደስተኛ ነኝ።

ታማኝ ወንድሞቻችንና እህቶቻችን ‘ወደ አምላክ መንግሥት ለመግባት ሲሉ በብዙ መከራ እያለፉ’ ነው፤ ይህ የድፍረት ምሳሌያቸው እኛንም ያበረታታናል።—የሐዋርያት ሥራ 14:22