ጥቅምት 27, 2021
ሩሲያ

ወቅታዊ መረጃ—ይግባኙ ውድቅ ሆነ | “ይሖዋ ጠባቂዬ ሆኖልኛል”

አጫውት

ኅዳር 1, 2022 የፕሪሞርይስ ክልል ፍርድ ቤት የእህት ሊያ ማልትሴቫን ይግባኝ ውድቅ አድርጎታል። በእርግጥ በአሁኑ ወቅት ወህኒ አትወርድም።

መስከረም 20, 2022 በፕሪሞርይስ ክልል የሚገኘው የፓርቲዛንስክ ከተማ ፍርድ ቤት ሊያ ጥፋተኛ ናት የሚል ብይን አስተላልፏል። እህት ሊያ የሁለት ዓመት ከሦስት ወር የገደብ እስራት ተበይኖባታል።

የክሱ ሂደት

ሰኔ 22, 2021

የሊያ ጉዳይ በፍርድ ቤት መታየት ጀመረ
ነሐሴ 18, 2020

የሩሲያ ደህንነት (የሩሲያ የሚስጥር ፖሊስ) አባላት የሊያን ቤት ከፈተሹ በኋላ በርካታ መጽሐፍ ቅዱሶችን፣ የማመሣከሪያ መጻሕፍትን እና ስልኳን ወረሱ። ከዚያም ወደ ወንጀል ምርመራ ዲፓርትመንት ለምርመራ ተወሰደች
ሐምሌ 9, 2020

የሩሲያ ፌዴሬሽን የገንዘብ ዝውውር ቁጥጥር አገልግሎት ሊያን በአሸባሪዎችና በጽንፈኞች ዝርዝር ውስጥ አካተታት
ሰኔ 1, 2020

በሩሲያ ፌዴሬሽን የወንጀለኛ መቅጫ ሕግ መሠረት በሊያ ላይ የወንጀል ክስ ተመሠረተባት። እገዳ የተጣለበት ሃይማኖታዊ ድርጅት በሚያካሂዳቸው እንቅስቃሴዎች በመካፈል ወንጀል ተከሰሰች

አጭር መግለጫ

ሊያ ማልትሴቫ

የትውልድ ዘመን፦ 1969 (አንዤሮ-ሱድዤንስክ፣ ኬሜሮቮ ክልል)

ግለ ታሪክ፦ በልጅነቷ መደነስ እና ከቤተሰቧ ጋር ወደተለያዩ ቦታዎች መጓዝ ትወድ ነበር። በሙያ ትምህርት ቤት የምግብ ዝግጅት ሥልጠና ወስዳለች። ደጅ በድንኳን ማደር እንዲሁም ከቤቷ አቅራቢያ ያሉ ውብ ቦታዎችን ማየት ትወዳለች

ካደገች በኋላ ከእናቷ ስለ ይሖዋ ምሥክሮች ሰማች። በአካባቢዋ የሚኖሩትን የይሖዋ ምሥክሮች ፈልጋ መጽሐፍ ቅዱስን እንዲያስጠኗት ጠየቀች። መጽሐፍ ቅዱስ ሙታን የሚገኙበትን ሁኔታ በተመለከተ የሚሰጠው ቀላል ማብራሪያ አጽናናት። በጦር ሠራዊት ውስጥ የነበራትን ሥራ ለቀቀች። በ1999 ተጠመቀች

የሰጠችው ሐሳብ

ከወንድማማች ማኅበሩ ምን ዓይነት እርዳታ አግኝተሻል?

ከወንድሞቼ ያገኘሁት ፍቅር ከጠበቅኩት እጅግ የሚበልጥ ነው። ወንድሞችና እህቶች እኔን በቁሳዊም ሆነ በስሜታዊ ለመደገፍ እንዲሁም በመንፈሳዊ ለማጠንከር የቻሉትን ሁሉ ያደርጋሉ።

በዚህ ፈተና ወቅት ከይሖዋ ጋር ያለሽ ዝምድና የተጠናከረው እንዴት ነው?

ይሖዋ ጠባቂዬ ሆኖልኛል። አንዳንዴ ነገሮች የሚሄዱበት አቅጣጫ ጥሩ ባይመስልም እንኳ ይሖዋ ሁሉንም ነገር እንደሚቆጣጠር ያጋጠመኝ ሁኔታ አስተምሮኛል። ፍርሃት ሲሰማኝ ተስፋ ከመቁረጥ ይልቅ ይሖዋ በሚሰጠኝ ብርታት እታመናለሁ። ይሖዋ አቅሜን እና ምን ያህል ፈተና መቋቋም እንደምችል ያውቃል።

ሊያ ባሳየችው ጽናት ተበረታተናል፤ ይሖዋ ለታማኝነቷ እንደሚባርካት ሙሉ በሙሉ እንተማመናለን።—1 ሳሙኤል 26:23