መስከረም 23, 2021
ሩሲያ

ወቅታዊ መረጃ—ይግባኙ ውድቅ ተደረገ | ስድስት እህቶችና አንድ ወንድም ክስ ቢመሠረትባቸውም እንኳ በይሖዋ እና በወንድሞቻቸው ታምነዋል

አጫውት

መስከረም 26, 2022 የፕሪሞርይስ ክልላዊ ፍርድ ቤት እህት ናዴዥዳ አኖይኪና፣ እህት ልዩቦቭ ጋላክቲዮኖቫ፣ እህት ናይልያ ኮጋይ፣ እህት ኒና ፑርጌ፣ እህት ራይሳ ኡሳኖቫ እና ወንድም ቫለንቲን ኦሳድቹክ ያቀረቡትን ይግባኝ ውድቅ አደረገ። እርግጥ በአሁኑ ወቅት ወህኒ አይወርዱም።

ሰኔ 1, 2022 በቭላዲቮስቶክ የሚገኘው የሌኒንስኪ አውራጃ ፍርድ ቤት ናዴዥዳ፣ ልዩቦቭ፣ ናይልያ፣ ኒና፣ ራይሳ እና ቫለንቲን ጥፋተኛ ናቸው የሚል ብይን አስተላልፏል። ሁሉም እህቶች የሁለት ዓመት የገደብ እስራት ተፈርዶባቸዋል። ቫለንቲን ደግሞ የስድስት ዓመት የገደብ እስራት ተበይኖበታል። እርግጥ አሁን እስር ቤት አይገቡም። የ87 ዓመት አረጋዊት የሆኑት እህት የሌና ዛይሹክ በጠና ስለታመሙ ክሳቸው ለጊዜው ተቋርጧል።

የክሱ ሂደት

ጥር 19, 2021

ክሱ በቭላዲቮስቶክ ወደሚገኘው የሌኒንስኪ አውራጃ ፍርድ ቤት ተመራ
ኅዳር 12, 2019

ክሱ ወደ አቃቤ ሕግ ቢሮ ተመለሰ
ሚያዝያ 5, 2019

በዚህ ክስ ውስጥ የተካተተው ብቸኛ ወንድም ማለትም ቫለንቲን ከ274 ቀን የማረፊያ ቤት ቆይታ በኋላ ተለቀቀ። ከዚያም በቁም እስር እንዲቆይ ተደረገ
ሚያዝያ 19, 2018

የፌዴራል ደህንነት አባላት የሰባቱን የይሖዋ ምሥክሮች ቤት በረበሩ
ሚያዝያ 9, 2018

የፕሪሞርስኪ ክልል የፌዴራል ደህንነት ቢሮ የወንጀል ምርመራ ክፍል በቫለንቲን እና በስድስቱ እህቶች ላይ ክስ መሠረተ

አጭር መግለጫ

ልዩቦቭ ጋላክቲዮኖቫ

የትውልድ ዘመን፦ 1942 (ቭላዲቮስቶክ)

ግለ ታሪክ፦ ጡረታ እስከወጣችበት ጊዜ ድረስ በጸሐፊነት ሙያ ትሠራ ነበር። በ1962 ትዳር መሠረተች። ለ14 ዓመት በትዳር ከቆየች በኋላ ባለቤቷን በሞት አጣች። ወንድ ልጇን ያሳደገችው ብቻዋን ነው። ለዓመታት የዘለቀ የጤና ችግር ስላለባት የአካል ጉዳተኛ ሆናለች

‘የሕይወት ዓላማ ምንድን ነው?’ እና ‘ሰዎች የሚሞቱት ለምንድን ነው?’ የሚሉት ጥያቄዎች ያሳስቧት ነበር። ከይሖዋ ምሥክሮች ጋር መጽሐፍ ቅዱስን ስታጠና ለጥያቄዎቿ አጥጋቢ መልስ አገኘች። በ1998 ተጠመቀች

የሰጠችው ሐሳብ

በዚህ አስቸጋሪ ወቅት ይሖዋን ምን ለምነሽዋል?

ለመረጋጋት እንዲረዳኝ ጸልያለሁ። ግፍ ቢደርስብኝም እንደ አንድ ክርስቲያን መጠን በትሕትና ምላሽ መስጠት እንድችል እንዲረዳኝ ይሖዋን ጠይቄዋለሁ፤ በተጨማሪም የሚደርስብኝን ስደት መቋቋም የሚያስችል አካላዊ ጥንካሬ እንዲሰጠኝ ጸልያለሁ።

ናይልያ ኮጋይ

የትውልድ ዘመን፦ 1951 (ታሽኬንት፣ ኡዝቤኪስታን)

ግለ ታሪክ፦ ሁለት ወንድሞች አሏት። በልጅነቷ ስፖርት ትወድ ነበር። ኮሌጅ ተምራ የሲቪል መሐንዲስ ሆነች። አሁን ጡረታ ወጥታለች። በ1975 ከሮበርት ጋር ትዳር መሠረተች። ሁለት ልጆች አሏቸው። በ1989 ሮበርት የጤና እክል እንዳለበት ታወቀ፤ በመሆኑም የሙሉ ጊዜ እንክብካቤ ያስፈልገዋል። በ2003 ወደ ቭላዲቮስቶክ ተዛወሩ

ከይሖዋ ምሥክሮች ጋር ስታጠና መጽሐፍ ቅዱስ የአምላክ ቃል መሆኑን አመነች። መጽሐፍ ቅዱስ አሳማኝ በሆነ መንገድ መጻፉ ማረካት፤ አምላክ የሚወደን መሆኑም ልቧን ነካት። በ1997 ተጠመቀች

የሰጠችው ሐሳብ

በጉባኤያችሁ ያለ አስፋፊ የደረሰብሽን ፈተና ለመቋቋም የሚረዳ ሐሳብ በመናገር አበረታቶሽ ያውቃል?

ብዙ እህቶች እንዲህ ብለውኛል፦ ‘አርዓያ ሆነሽልናል። በጣም እንኮራብሻለን። አንቺ ስደትን መቋቋም ከቻልሽ እኛም እንችላለን ማለት ነው!’

ቫለንቲን ኦሳድቹክ

የትውልድ ዘመን፦ 1976 (ዩክሬን)

ግለ ታሪክ፦ የሽያጭ ክፍል ኃላፊ ሆኖ ይሠራል። ሐቀኛ፣ ታታሪና ትጉ ሠራተኛ በመሆኑ ይታወቃል። ከቤት ውጭ በሚካሄዱ እንቅስቃሴዎች መካፈል ያስደስተዋል

በ1998 ተጠምቆ የይሖዋ ምሥክር ሆነ

የሰጠው ሐሳብ

በዚህ ፈተና ወቅት ከይሖዋ ጋር ያለህ ዝምድና የተጠናከረው እንዴት ነው?

የይሖዋን ኃያል እጅና የወንድማማች ማኅበራችንን ድጋፍ ይበልጥ ማየት ችያለሁ። . . . ከቤተሰቦቼ መለየትን፣ ንብረቴን ማጣትን ወይም በማኅበረሰቡ ውስጥ ያለኝን መልካም ስም ማጣትን መፍራት እንደሌለብኝ ከረጅም ጊዜ በፊት ተገንዝቤ ነበር። ሆኖም እስር ቤት ገብቼ እነዚህ ሁሉ ነገሮች ሲደርሱብኝ አምላኬ ይሖዋ ያደረገልኝን ልዩ እንክብካቤ [በራሴ ሕይወት መመልከት ችያለሁ።]

ኒና ፑርጌ

የትውልድ ዘመን፦ 1940 (ፒሶክ፣ ፓስኮቭ ክልል)

ግለ ታሪክ፦ አንድ ታናሽ ወንድም አላት። ያደገችው በሁለተኛው የዓለም ጦርነት ወቅት ነው። በ1942 የጀርመን ወታደሮች የምትኖርበትን መንደር ተቆጣጥረውት ነበር። ቤተሰቧ በናዚዎች ከመገደል ያመለጠው ለጥቂት ነው

ከባለቤቷ ጋር የተጋቡት በኢስቶኒያ የባሕር ትራንስፖርት ትምህርት ቤት እየተማረ በነበረበት ወቅት ነው። ሁለት ልጆች አፍርተዋል። ባለቤቷ በቭላዲቮስቶክ እንዲሠራ ስለተመደበ ቤተሰቡ በዚያ መኖር ጀመረ

በ1990ዎቹ መጨረሻ ላይ ከይሖዋ ምሥክሮች ጋር መጽሐፍ ቅዱስን ማጥናት ጀመረች። አምላክ ምንጊዜም እንደሚረዳት ተማረች። በ1999 ተጠመቀች

የሰጠችው ሐሳብ

በዚህ ፈተና ወቅት ከይሖዋ ጋር ያለሽ ዝምድና የተጠናከረው እንዴት ነው?

በይሖዋ ይበልጥ መታመን ጀመርኩ። እስከ መጨረሻው ለመጽናትና ታማኝነቴን ለመጠበቅ የሚያስችል ብርታት እንዲሰጠኝ ጸለይኩ። ኢሳይያስ 41:13 ደፋር እንድሆን ረድቶኛል፤ [የሰማዩ] አባቴ እጄን እንደያዘኝ ሆኖ ይሰማኛል። የፍርድ ቤቱ ውሳኔ ምንም ቢሆን አልፈራም።

ራይሳ ኡሳኖቫ

የትውልድ ዘመን፦ 1947 (ኩዝኒትሶቫ)

ግለ ታሪክ፦ አንዲት እህትና ሦስት ወንድሞች አሏት። የሁለተኛ ደረጃ ትምህርቷን ካጠናቀቀች በኋላ የባቡር ቴክኒሺያንነት ሥልጠና ለማግኘት ወደ ቭላዲቮስቶክ ሄደች። ትዳር መሥርታ ሁለት ልጆች አፍርታለች። ለ25 ዓመታት ያህል የከተማ ባቡር ሹፌር ሆና ሠርታለች። አሁን ጡረታ ወጥታለች

በ2000 እናቷን፣ እህቷንና አንዱን ወንድሟን በሞት ካጣች በኋላ ሰዎች የሚሞቱት ለምን እንደሆነ እንዲሁም የሞቱ ሰዎች ምን ተስፋ እንዳላቸው ማሰብ ጀመረች። ከይሖዋ ምሥክሮች ጋር መጽሐፍ ቅዱስን ስታጠና ለጥያቄዎቿ አሳማኝ መልስ አገኘች። በ2002 ተጠመቀች

የሰጠችው ሐሳብ

በዚህ ፈተና ውስጥ ስታልፊ፣ ወደፊት ለሚያጋጥሙሽ ፈተናዎች የሚረዳሽ ምን ትምህርት አግኝተሻል?

በተለይ ከንግግሬ ጋር በተያያዘ ራሴን መግዛት እንዳለብኝ ተምሬያለሁ፤ በተጨማሪም ጽናትንና በይሖዋ መታመንን ተምሬያለሁ። መንፈሳዊ ምግብ ይበልጥ አዘውትሬ መመገብ ጀመርኩ። . . . እስከ መጨረሻው ታማኝ መሆን እፈልጋለሁ።

ሊያጋጥምሽ ለሚችለው ስደት እየተዘጋጀሽ ያለሽው እንዴት ነው?

ብዙ ጥቅሶች ላይ ለማሰላሰል [ጥረት እያደረግኩ ነው]፤ ይህም ወደፊት በሚያስፈልገኝ ጊዜ በመንፈስ ቅዱስ እርዳታ ጥቅሶቹን ‘እንዳስታውስ’ ይረዳኛል።—ዮሐንስ 14:26

የሌና ዛይሹክ

የትውልድ ዘመን፦ 1934 (የማሪ ኤል ሪፑብሊክ)

ግለ ታሪክ፦ ያደገችው በሕፃናት ማሳደጊያ ውስጥ ነው። ከሙያ ትምህርት ቤት ከተመረቀች በኋላ የብረት ቅርጽ ማውጫ ማሽን ባለሙያ ሆና ሠርታለች። በ17 ዓመቷ መንግሥት በቭላዲቮስቶክ እንድትሠራ መደባት። የባሕር ኃይል ሥልጠና ወስዳለች። ጡረታ እስከወጣችበት ጊዜ ድረስ ሸርጣን የተባለውን ዓሣ በማጥመድ ሥራ ተሰማርታ ነበር። አንዲት ልጅ አለቻት

በ1990ዎቹ መጨረሻ ላይ ከይሖዋ ምሥክሮች ጋር መጽሐፍ ቅዱስን ማጥናት ጀመረች። የመጽሐፍ ቅዱስ ምክር የሚያጋጥሟትን ችግሮች ለመቋቋም ረዳት። በ1998 ተጠመቀች

በሩሲያ ያሉ ውድ ወንድሞቻችንና እህቶቻችን ምሳሌ ምንጊዜም ያበረታታናል። በሕይወት የሚያኖር እምነት እንዳላቸው እያሳዩ ነው።—ዕብራውያን 10:39

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች