የካቲት 13, 2023 | የታደሰው፦ ኅዳር 6, 2023
ሩሲያ

ወቅታዊ መረጃ—ይግባኝ | ስደት በያሮስላቭል የሚኖሩ ሦስት ቤተሰቦችን ቤት አንኳኳ

አጫውት

ጥቅምት 30, 2023 በያሮስላቭል የሚገኘው የዜርዢንስኪ አውራጃ ፍርድ ቤት፣ ወንድም ፕዮትር ፊሊዝኖቭ እና ወንድም አንድሬ ቭዩሺን ያቀረቡትን ይግባኝ በከፊል ተቀብሎታል። የተላለፈባቸው የስድስት ዓመት ተኩል የገደብ እስራት ወደ ሁለት ዓመት ተኩል የገደብ እስራት ተቀንሷል። የወንድም አሌክሳንደር ኩዝኔትሶቭ እና የባለቤቱ የማሪያ ብይን ግን በዚያው ይጸናል።

ነሐሴ 3, 2023 በያሮስላቭል የሚገኘው የዜርዢንስኪ አውራጃ ፍርድ ቤት፣ ወንድም ፕዮትር ፊሊዝኖቭ፣ ወንድም አሌክሳንደር ኩዝኔትሶቭ እና ባለቤቱ እህት ማሪያ ኩዝኔትሶቫ እንዲሁም ወንድም አንድሬ ቭዩሺን ጥፋተኛ እንደሆኑ ወስኗል። በሁሉም ላይ የገደብ እስራት ፍርድ አስተላልፏል። አንድሬ እና ፕዮትር የስድስት ዓመት ተኩል፣ አሌክሳንደር እና ማሪያ ደግሞ የሁለት ዓመት ተኩል የገደብ እስራት ተፈርዶባቸዋል። በአሁኑ ወቅት ወህኒ አይወርዱም።

አጭር መግለጫ

ፕዮትር ፊሊዝኖቭ

የትውልድ ዘመን፦ 1965 (ያሮስላቭል፣ ያሮስላቭል ክልል)

ግለ ታሪክ፦ በአንድ አፓርታማ ሕንፃ ላይ የጥገና ሥራ ይሠራል

በ1988 ከስቬትላና ጋር ተጋቡ። አንድ ወንድና አንዲት ሴት ልጅ አላቸው። በ1997 ተጠምቆ የይሖዋ ምሥክር ሆነ

የሰጠው ሐሳብ

ማረፊያ ቤት ያሳለፍከው ጊዜ ምን ስሜት አሳድሮብሃል?

ማረፊያ ቤት ያሳለፍኩት ጊዜ ለእኔ ረጅምና ውጥረት የሚፈጥር ነበር። ምን ማድረግ እንዳለብኝ ወይም እንደሌለብኝ ግራ የተጋባሁባቸው ወቅቶች ነበሩ፤ አጉል ነገር ብናገርስ ወይም ባደርግስ እያልኩም እጨነቅ ነበር። መለስ ብዬ ሳስበው፣ የመንፈስ ፍሬ ገጽታ የሆኑትን ባሕርያት ባሳይ እኮ በቂ ነበር ብዬ አስባለሁ፤ ለማንኛውም ሁኔታ ከሁሉ የተሻለው አካሄድ ይህ ነው። ሌላው የተገነዘብኩት ነገር ደግሞ እንዲህ ቢሆንስ እያሉ መስጋት ምንም ትርጉም እንደሌለው ነው። ከይሖዋ ቁጥጥር ውጭ የሆነ አንድም ነገር የለም።

አሌክሳንደር ኩዝኔትሶቭ

የትውልድ ዘመን፦ 1982 (ሞስኮ፣ ሞስኮ ክልል)

ግለ ታሪክ፦ የእንግሊዝኛና የሒሳብ አስጠኚ ሆኖ ይሠራ ነበር

ሚያዝያ 2000 መጽሐፍ ቅዱስን ማጥናት ጀመረ። የይሖዋ ምሥክሮች የሚያሳዩት ፍቅር ልቡን ነካው። በ2002 ተጠመቀ

በ2017 ከማሪያ ጋር ተጋቡ። ከማረፊያ ቤት ከተለቀቀ በኋላ ካንሰር እንዳለበት በምርመራ ታወቀ

የሰጠው ሐሳብ

ሕመምም ሆነ ስደት የሚያሳድሩት ጫና እያለ ደስታህን ጠብቀህ መኖር የቻልከው እንዴት ነው?

ተስፋ የምቆርጥባቸው በርካታ ጊዜያት አሉ፤ አንዳንዴ ከአቅሜ በላይ እንደሆነ ይሰማኛል። ይሖዋ ግን ሁልጊዜም “መውጫ መንገዱን” ያዘጋጅልኛል። (1 ቆሮንቶስ 10:13) የልቤን አውጥቼ አንዳንዴም እያለቀስኩ መጸለዬ ጠቅሞኛል። በተጨማሪም መዝሙሮቻችንን መዘመር፣ የግል ጥናት ማድረግ እንዲሁም በተስፋው ላይ ማሰላሰል ብርታት ከሚሰጡኝ ነገሮች መካከል የሚጠቀሱ ናቸው። እኔና ባለቤቴ ወንድሞቻችንን እና እህቶቻችንን ለማነጽ ጥረት እናደርጋለን። ይህም ስለ ራሳችን ችግር እያሰብን እንዳንቆዝም ረድቶናል። ይሖዋ ቅዱስ መንፈሱን ተጠቅሞ እያጽናናን እንዲሁም ውስጣዊ ሰላም እየሰጠን ነው፤ ለዚህ ወቅታዊ እገዛ በጣም አመስጋኞች ነን።

ማሪያ ኩዝኔትሶቫ

የትውልድ ዘመን፦ 1988 (ሻሪፖቮ፣ ክራስናያርስክ ግዛት)

ግለ ታሪክ፦ የግል አገልግሎት ሰጪ ሆና ትሠራለች

ያደገችው በይሖዋ ምሥክር ቤተሰብ ውስጥ ነው። የግል ጥናት ስታደርግ ለመጽሐፍ ቅዱስ ትንቢት ያላት አድናቆት ጨመረ። በ2002 ተጠመቀች

በ2017 ከአሌክሳንደር ጋር ተጋቡ

የሰጠችው ሐሳብ

ካለሽበት ሁኔታ አንጻር ልዩ ትርጉም የሰጠሽ ጥቅስ አለ?

በጣም ከምወዳቸው ጥቅሶች አንዱ ቆላስይስ 1:11 ነው፤ “በትዕግሥትና በደስታ ሁሉንም ነገር በጽናት እንድትቋቋሙ የአምላክ ታላቅ ኃይል የሚያስፈልጋችሁን ብርታት ሁሉ ይስጣችሁ” ይላል። ከራሴ ተሞክሮ በሚገባ እንዳረጋገጥኩት በይሖዋ ሙሉ በሙሉ ከታመንኩና እገዛውን ከጠየቅኩ መቼም ቢሆን እኔን ከመርዳት ወደኋላ አይልም። እሱ ለአገልጋዮቹ ታማኝ ፍቅሩን የሚያሳይባቸው መንገዶች እጅግ ብዙ ናቸው፤ ምሕረቱም ፈጽሞ አይነጥፍም።

አንድሬ ቭዩሺን

የትውልድ ዘመን፦ 1975 (ያሮስላቭል፣ ያሮስላቭል ክልል)

ግለ ታሪክ፦ ያሳደጉት እናቱና አያቱ ናቸው። የኮምፒውተር ኔትወርክ ተቆጣጣሪ ሆኖ ይሠራል። አካል ጉዳተኛ እናቱን ይንከባከባል

ከይሖዋ ምሥክሮች ጋር የተዋወቀው፣ የቅርብ ጓደኛው ከእነሱ ጋር መጽሐፍ ቅዱስን ማጥናት በጀመረበት ወቅት ነው። የይሖዋ ምሥክሮቹ፣ ለጥያቄዎቹ ሁሉ መልስ ሰጡት፤ ደግሞም የሚያስተምሩትን ነገር እንደሚኖሩበት ማየት ቻለ። በ1995 ተጠመቀ

በ2013 ከአናስታሲያ ጋር ተጋቡ። አንዲት ሴት ልጅ አለቻቸው

የሰጠው ሐሳብ

አንተና ባለቤትህ ተሞክሯችሁን ሌሎችን ለማበረታታት የተጠቀማችሁበት እንዴት ነው?

እኔና ባለቤቴ፣ ወንድም ዴኒስ ክሪስተንሰን ፈተናዎችን በጽናት በተወጣበት መንገድ በጣም ነው የተበረታታነው። መጀመሪያ ላይ ከታሰሩት ወንድሞች አንዱ ነው፤ ሆኖም ምንጊዜም የተረጋጋ ሰው ነው። እኛም እንደ እሱ መሆን እንደምንችል ተሞክሮው ብርታት ሰጥቶናል። አሁን እኛም ስደት የሚያስፈራቸው ወንድሞችና እህቶች ስናገኝ ለማበረታታት የቻልነውን ሁሉ እናደርጋለን፤ ነገሮች እንደሚታሰበው አስፈሪ እንዳልሆኑ እንነግራቸዋለን። ከወዲሁ ስለ ስደት መጥፎ መጥፎውን በማሰብ እንዳይጨነቁ ልናስታውሳቸው እንሞክራለን። እንዲያውም ስደት የእምነታችንን ጥራት የምንለካበት ጥሩ አጋጣሚ ሊሆንልን እንደሚችል እንነግራቸዋለን።

እንደ እነዚህ አራት ታማኝ የይሖዋ አገልጋዮች ሁሉ እኛም ‘በይሖዋ ከሚታመኑትና ፈጽሞ ከማይናወጡት’ አንዱ እንደምንሆን መተማመን እንችላለን።—መዝሙር 125:1

የክሱ ሂደት

ሚያዝያ 13, 2021

ቤታቸው በባለሥልጣናት ከተፈተሸ በኋላ ጣቢያ ተወሰዱ
ሚያዝያ 15, 2021

ወደ ማረፊያ ቤት ተላኩ
ሐምሌ 14, 2021

ከማረፊያ ቤት ተለቀቁ፤ ከዚያም የጉዞ ክልከላ ተጣለባቸው
መስከረም 9, 2022

ክሳቸው በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች