ሰኔ 15, 2022 | የታደሰው፦ ታኅሣሥ 23, 2022
ሩሲያ

ወቅታዊ መረጃ—ይግባኝ | ጋሊና ኮቤሌቫ ችሎት ፊት ምሥክርነት ለመስጠት ቆርጣለች

አጫውት

ታኅሣሥ 21, 2022 የፕሪሞርይስ ክልል ፍርድ ቤት፣ እህት ጋሊና ኮቤሌቫ ያቀረበችውን ይግባኝ በከፊል ተቀብሎታል። አሁን የፍርድ ቤት ወጪዋን ከራሷ መክፈል አይጠበቅባትም። የተላለፈባት የስድስት ዓመት የገደብ እስራት ግን ይጸናል።

ጥቅምት 20, 2022 በፕሪሞርይስ ክልል የሚገኘው የሌሶዛቮድስኪ አውራጃ ፍርድ ቤት፣ በእህት ጋሊና ኮቤሌቫ ላይ ብይን አስተላልፏል። ጋሊና የስድስት ዓመት የገደብ እስራት ተፈርዶባታል። በእርግጥ በአሁኑ ወቅት ወህኒ አትወርድም።

የክሱ ሂደት

ግንቦት 12, 2020

የፕሪሞርይስ ክልል የደህንነት አባላት የአራት የይሖዋ ምሥክሮችን ቤቶች በረበሩ፤ ከእነዚህ አንዱ የጋሊና ቤት ነው። ጋሊና እና ሰርጌ ኮቤሌቭ የተባለው ልጇ ለምርመራ ተጠሩ፤ ክትትል ይደረግባቸውም ጀመር
መጋቢት 8, 2021

ባለሥልጣናቱ በጋሊና ላይ ክስ መሠረቱ። የተከሰሰችበት ወንጀል ‘በጽንፈኛ ድርጅት እንቅስቃሴ ተሳትፋለች’ የሚል ነው
ሚያዝያ 7, 2021

የጉዞ እገዳ ተጣለባት
ጥቅምት 29, 2021

ክሷ በፍርድ ቤት መታየት ጀመረ

አጭር መግለጫ

ጋሊና ኮቤሌቫ

የትውልድ ዘመን፦ 1956 (ቬርክኒዬ ሙሊ፣ ፐርም ግዛት)

ግለ ታሪክ፦ የሽያጭ እና የሒሳብ ሠራተኛ ነበረች። አትክልት መንከባከብ ትወዳለች

ስለ ይሖዋ ምሥክሮች የሰማችው ከእናቷ ነው። በጉባኤው ውስጥ ያሉ ወንድሞችና እህቶች ምን ያህል እንደሚዋደዱ ስታይ እውነትን እንዳገኘች እርግጠኛ ሆነች። በ1998 ተጠመቀች

የሰጠችው ሐሳብ

በድፍረት እንድትመሠክሪ የረዳሽ ምንድን ነው?

ፍርድ ቤቱን የግል የአገልግሎት ክልሌ አድርጌ እመለከተዋለሁ። ይሖዋና ኢየሱስ ችሎት ፊት እንድመሠክር እንደሚጠብቁብኝ ይሰማኛል።

ከዚህም በተጨማሪ ፍርድ ቤት በምቀርብበት ጊዜ ሁሉ ወንድሞችና እህቶች ሊያበረታቱኝ ይመጣሉ። እርግጥ ችሎቱ ከጀመረ በኋላ ብቻዬን ነው የምሆነው፤ ግን ወንድሞች በጸሎት አብረውኝ እንደሆኑ ስለማውቅ ከጎኔ ያሉ ያህል ሆኖ ይሰማኛል።

ለመጽናት የረዳሽ የመጽሐፍ ቅዱስ ጥቅስ የትኛው ነው?

ከምወዳቸው ጥቅሶች አንዱ ኢሳይያስ 48:17, 18 ነው፤ ጥቅሱ በከፊል እንዲህ ይላል፦ “የሚጠቅምህን ነገር የማስተምርህ፣ ልትሄድበትም በሚገባህ መንገድ የምመራህ እኔ ይሖዋ አምላክህ ነኝ።” . . . የእሱን መንገድ መከተሌ ምን ያህል እንደጠቀመኝና ምን ያህል ደስተኛ እንዳደረገኝ ብዙ ጊዜ አሰላስላለሁ። ከፊታችን ደግሞ አስደናቂ ጊዜ ይጠብቀናል፤ ገነት በምትሆነው ምድር ላይ ሁሉ ነገር ተሟልቶልን እንኖራለን። እስከዚያው ድረስም ብቻችንን አይደለንም፤ የሚደርስብን ፈተና፣ ሁሉን ቻዩ ወዳጃችንና አባታችን ከጎናችን ሆኖ ሲያበረታን ለማየትና ወደ እሱ ይበልጥ ለመቅረብ አጋጣሚ ይሰጠናል። . . . የእሱን መንገድ ብተውም እንኳ የኑሮ ውጣ ውረድ አይቀርልኝም፤ ግን ከጎኔ ሆኖ የሚያጽናናኝና የሚያግዘኝ አምላክ አይኖረኝም።

ይሖዋ አምላካችን፣ እንደ ጋሊና ያሉ ለስሙ በድፍረት ጥብቅና የሚቆሙ ታማኝ አገልጋዮቹን “ደህንነት ወደሚገኝበት ስፍራ” እንደሚያመጣቸው በማወቃችን ምንኛ አመስጋኞች ነን።—2 ሳሙኤል 22:18-21