ነሐሴ 26, 2021 | የታደሰው፦ ጥር 12, 2024
ሩሲያ

ወቅታዊ መረጃ—ፍርዱ ተቀለበሰ | የሁለት ልጆች አባት የሆነ ወንድም በእምነቱ ምክንያት የ15 ዓመት እስራት ሊፈረድበት ይችላል

አጫውት

ጥር 11, 2024 በሃንቲ ማንሲስክ ራስ ገዝ ክልል በዩግራ የሚገኘው ክልላዊ ፍርድ ቤት በወንድም አንድሬ ሳዞኖቭ ላይ የተላለፈው ብይን እንዲቀለበስ ወስኗል። ጉዳዩ በድጋሚ እንዲታይ በሃንቲ ማንሲስክ ራስ ገዝ ክልል በዩግራ ወደሚገኘው የኡራይ ከተማ ፍርድ ቤት ተመልሷል።

የክሱ ሂደት

ታኅሣሥ 24, 2021 በሃንቲ ማንሲስክ ራስ ገዝ ክልል በዩግራ የሚገኘው የኡራይ ከተማ ፍርድ ቤት ወንድም አንድሬ ሳዞኖቭ ወንጀለኛ ነው በማለት 500,000 ሩብል (6,785 የዩናይትድ ስቴትስ ዶላር) እንዲከፍል በይኖበታል። አንድሬ እስከ 15 ዓመት የሚደርስ እስራት ሊፈረድበት ይችል ነበር። ወንድማችን ወንጀለኛ ነው ተብሎ የተፈረደበት መሆኑ ቢያሳዝነንም እስር ቤት የማይገባ በመሆኑ ደስተኞች ነን
ሰኔ 22, 2020

የአንድሬ ክስ በፍርድ ቤት መታየት ጀመረ
ነሐሴ 22, 2019

ከቁም እስር ተለቀቀ፤ ፍርድ ቤቱ የጉዞ ገደብና ሌሎች እገዳዎች ጣለበት
የካቲት 26, 2019

በቁም እስር እንዲቆይ ተደረገ
የካቲት 6, 2019

በቁጥጥር ሥር ዋለ፤ ከሁለት ቀናት በኋላ የሥራ ቦታውና መኪናው ከተፈተሸ በኋላ ወደ ማረፊያ ቤት ተወሰደ
ጥር 31, 2019

“የጽንፈኛ ድርጅትን እንቅስቃሴዎች በማደራጀትና በእንቅስቃሴዎቹ በመካፈል” ወንጀል ክስ ተመሠረተበት

አጭር መግለጫ

አንድሬ ሳዞኖቭ

የትውልድ ዘመን፦ 1980 (ሞስኮ)

ግለ ታሪክ፦ ማሞቂያ በሚያመርት ትልቅ ድርጅት ውስጥ ኃላፊ ነው። የእንግሊዝኛ አስተማሪ ከሆነችው ከቪክቶሪያ ጋር በ2002 ትዳር መሠረተ። ኢሪና (ኢራ) የተባለች ሴት ልጅ እና ቭያቼስላቭ (ስላቫ) የተባለ ወንድ ልጅ አላቸው

አንድሬ በ1990ዎቹ መጀመሪያ ላይ ከይሖዋ ምሥክሮች ጋር መጽሐፍ ቅዱስን ማጥናት ጀመረ፤ በ1997 ተጠመቀ

የሰጠው ሐሳብ

በጣም የከበደህ ፈተና ምንድን ነው?

ለእኔ በጣም የከበደኝ ከምወዳቸው ሰዎች መለየቴና እነሱን ለመርዳት ምንም ነገር ማድረግ አለመቻሌ ነው። ‘ቤተሰቦቼ ፈተናውን እንዴት ይቋቋሙታል?’ የሚለውን ሳስብ በጣም ያስጨንቀኝ ነበር። በተጨማሪም የተፈተሸው የእኛ ቤት ብቻ ስላልነበር የሌሎቹ ወንድሞችና እህቶች ጉዳይም በጣም አሳስቦኝ ነበር።

በማረፊያ ቤት በቆየህበት ወቅት አዎንታዊ እንድትሆን የረዳህ ምንድን ነው?

ታስሬ ባለሁበት ወቅት የሚያጋጥመኝን ነገር መቆጣጠር እንደማልችል ተገነዘብኩ። በቀጣዩ ደቂቃ ምን እንደሚያጋጥመኝ አላውቅም። አንዳንድ ጊዜ የታሰርኩበትን ክፍል በር ድንገት ይከፍቱና ወደ ሌላ ቦታ ይወስዱኝ ነበር። እንዲህ ዓይነት ሁኔታ ሲያጋጥመኝ ተገቢውን አመለካከት መያዝ እንዳለብኝ ተምሬያለሁ። ይህ ፈተና ሲያጋጥመኝ በሮም 12:21 ላይ የሚገኘውን ጥቅስ አስታወስኩ፤ ጥቅሱ “በክፉ አትሸነፍ፤ ከዚህ ይልቅ ምንጊዜም ክፉውን በመልካም አሸንፍ” ይላል። ይህ መሠረታዊ ሥርዓት ውጤታማ እንደሆነ በሕይወቴ ውስጥ ብዙ ጊዜ ተመልክቻለሁ። ስለዚህ ሰዎቹ ምንም ዓይነት በደል ቢያደርሱብኝ ምንጊዜም ደግነት ለማሳየት ወሰንኩ። ሁሉንም ሰው በትሕትና እና በደግነት ለመያዝ ጥረት አደረግኩ። ስደት በሚያደርሱብኝ ሰዎች ላለመበሳጨትም ጣርኩ። ሰዎች እንደምንበሳጭ ባሰቡበት ጊዜ ደግነት ስናሳያቸው አስገራሚ ለውጥ ያሳያሉ። ይህን ማየት በጣም ያስደስታል!

እነዚህ ፈተናዎች በቤተሰባችን ላይ መድረስ ከመጀመራቸው በፊትም “ተስፋ አልቆርጥም” እና “ድፍረት ስጠኝ” የተባሉትን መዝሙሮች በቃሌ ይዣቸው ነበር። እነዚህ መዝሙሮች ልቤን በጣም ይነኩኛል። በታሰርኩበት ወቅት አዘውትሬ እዘምራቸው ነበር። ይህም አበረታቶኛል፤ እንዲሁም መጽናት እንድችል ኃይል ሰጥቶኛል።

ሌሎች ወደፊት ሊያጋጥሟቸው ለሚችሉት ፈተናዎች ለመዘጋጀት ከአሁኑ ምን እንዲያደርጉ ትመክራለህ?

ከአሁኑ አቅማችሁ በፈቀደ መጠን መንፈሳዊነታችሁን አጠናክሩ፤ በይሖዋ ሥራ ሙሉ በሙሉ ተጠመዱ። . . . ይሖዋን በሚያስደስቱ እንቅስቃሴዎች ከተጠመዳችሁ እምነታችሁን በሚያዳክሙና ትኩረታችሁን በሚከፋፍሉ ነገሮች ላይ የምታሳልፉት ጊዜ አይኖራችሁም።

ስደቱ ቢቀጥልም በሩሲያ ያሉ ወንድሞቻችንና እህቶቻችን የተዉትን ግሩም ምሳሌ በጣም እናደንቃለን። ይሖዋ ምንጊዜም “ደፋርና ብርቱ” እንደሚያደርጋቸው እንተማመናለን።—መዝሙር 138:3

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች