ጥር 31, 2022 | የታደሰው፦ መጋቢት 27, 2023
ሩሲያ

ወቅታዊ መረጃ—ፍርዱ ተቀነሰላት | እህት ልዩድሚላ ሳሊኮቫ ከይሖዋ ብርታትና ማጽናኛ አግኝታለች

አጫውት

ወቅታዊ መረጃ—ፍርዱ ተቀነሰላት | እህት ልዩድሚላ ሳሊኮቫ ከይሖዋ ብርታትና ማጽናኛ አግኝታለች

መጋቢት 23, 2023 የቼልያቢንስክ ክልላዊ ፍርድ ቤት እህት ልዩድሚላ ሳሊኮቫ ለሁለተኛ ጊዜ ያቀረበችውን ይግባኝ ሰምቶ ውሳኔ አስተላልፏል። ፍርድ ቤቱ፣ ቀደም ሲል የተፈረደባት የገደብ እስራት ከስድስት ዓመት ወደ ሁለት ዓመት ተኩል እንዲቀነስ ወስኗል። በአሁኑ ወቅት ወህኒ አትወርድም።

መጋቢት 17, 2022 የቼልያቢንስክ ክልላዊ ፍርድ ቤት ልዩድሚላ ያቀረበችውን ይግባኝ ውድቅ አድርጓል።

ጥር 20, 2022 በቼልያቢንስክ ክልል የሚገኘው የስኔዢንስክ ከተማ ፍርድ ቤት ልዩድሚላ ጥፋተኛ ነች በማለት የስድስት ዓመት የገደብ እስራት ፈረደባት።

የክሱ ሂደት

ኅዳር 2020

በስኔዢንስክ የሚገኙ የደህንነት ኃይሎች ልዩድሚላን ጨምሮ የአራት የይሖዋ ምሥክር ቤተሰቦችን ቤቶች ፈተሹ። ፖሊሶች የሥራ ቦታዋንም ፈተሹ። በኋላም ሥራዋን ለመልቀቅ ተገደደች
ነሐሴ 26, 2021

ልዩድሚላ እገዳ የተጣለበትን ሃይማኖታዊ ድርጅት እንቅስቃሴ በማደራጀትና የታገዱ ጽሑፎችን ወደ አገሪቱ በማስገባት ወንጀል ተከሰሰች
ታኅሣሥ 8, 2021

ጉዳይዋ በፍርድ ቤት መታየት ጀመረ

አጭር መግለጫ

ልዩድሚላ ሳሊኮቫ

የትውልድ ዘመን፦ 1951 (ሲሰርት)

ግለ ታሪክ፦ በ1971 ትዳር መሠረተች። ሦስት ወንዶች ልጆችን አሳድጋለች። ባሏ በ2009 አረፈ። ለስኔዢንስክ ከተማ የኃይል አጠቃቀም መሐንዲስ ሆና ሠርታለች። ጉዞ ማድረግ ትወዳለች

ታላቅ እህቷ በ1999 መጽሐፍ ቅዱስን ማጥናት ጀመረች። ከስድስት ወር በኋላ ልዩድሚላም ማጥናት ጀመረች። ስለ ሕይወት ዓላማ እንዲሁም የፍትሕ መጓደል፣ ዓመፅና ጦርነት ስለተስፋፋበት ምክንያት አጥጋቢ ማብራሪያ አገኘች። በ2002 ተጠመቀች

የሰጠችው ሐሳብ

በዚህ ፈተና ወቅት ከይሖዋ ጋር ያለሽ ዝምድና የተጠናከረው እንዴት ነው?

ስደቱ ከመጀመሩ በፊት ራሴን የመኮነን ልማድ ነበረኝ፤ ይሖዋ ቦታ እንደማይሰጠኝ ይሰማኝ ነበር። . . . አሁን አስተሳሰቤ ተቀይሯል፤ ይሖዋ ከፍ አድርጎ እንደሚመለከተኝ ራሴን ማሳመን ቀላል ሆኖልኛል። ይሖዋ በስኔዢንስክ በሚገኘው ፍርድ ቤት ፊት ስሙን የማስቀደስ መብት ሰጥቶኛል፤ ይህም እንደሚወደኝና እንደሚተማመንብኝ ያሳምነኛል። ይሖዋ እንዲደርስብኝ የፈቀደውን ማንኛውንም ሁኔታ እሱን ላለማሳፈር እንደሚያስችል አጋጣሚ አድርጌ እመለከተዋለሁ።

አንድ ወንድም ወይም አንዲት እህት የተናገሩት ነገር ለመጽናት ረድቶሽ ያውቃል?

ለመጀመሪያ ጊዜ ፍርድ ቤት ከመቅረቤ በፊት በጣም ተጨንቄ ነበር። . . . በዚህ ጊዜ፦ “. . . እባክህ ቅዱስ መንፈስህን ስጠኝ። እባክህ ይሖዋ” ብዬ ጸለይኩ። ብዙም ሳይቆይ አንዲት እህት የጽሑፍ መልእክት ላከችልኝ። መልእክቱ እንዲህ ይላል፦ “. . . የእምነት ፈተና ልክ እንደ ልብስ ማጠቢያ ማሽን ነው። ‘ያሽከረክረናል፣ ያጦዘናል፣ ይጨምቀናል።’ ግን ይህ መሆኑ ከቀድሞው ይበልጥ እንድንጠራ እና የተሻልን ሰዎች እንድንሆን ያደርገናል። አንቺም ፍተሻውና ምርመራው እንደተጨመቀ ልብስ እንድትሆኚ አድርጎሻል። ያም ቢሆን የደረሰብሽ ጭንቀትና ፈተና በይሖዋም ሆነ በእኛ ዓይን ይበልጥ ውድ አድርጎሻል። . . . ነገ ጠዋት ፍርድ ቤት ስትቀርቢ በይሖዋ እቅፍ ውስጥ ነሽ።” ይሖዋ ስሜቴን አይቶ በዚያች እህት አማካኝነት ለእኔ ያለውን ስሜት እንደገለጸልኝ ተሰምቶኛል።

በሩሲያ ያሉ ወንድሞቻችንና እህቶቻችን ከይሖዋ ብርታትና ማጽናኛ ማግኘታቸውን ቀጥለዋል። አፍቃሪው አምላካችን “በምድር ላይ ያለ ሟች የሆነ ሰው ከእንግዲህ እንዳያሸብራቸው፣ አባት ለሌለው ልጅና ለተደቆሱ ሰዎች ፍትሕ” እንደሚያሰፍን ዋስትና ሰጥቶናል።—መዝሙር 10:18

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች