መስከረም 24, 2021
ሩሲያ

ወንድም ማክሲም ቤልቲኮቭ አዘውትሮ በመንፈሳዊ እንቅስቃሴዎች መካፈሉ ብርታት ሰጥቶታል

አጫውት

ወቅታዊ መረጃ | የሩሲያ ፍርድ ቤት ወንድም ማክሲም ቤልቲኮቭ ጥፋተኛ ነው የሚል ብይን አስተላለፈ

ጥር 17, 2022 በክራስኖዳር ክልል የሚገኘው የፓቭሎቭስኪ አውራጃ ፍርድ ቤት ወንድም ማክሲም ቤልቲኮቭ ጥፋተኛ ነው በማለት የሁለት ዓመት እስራት በየነበት። በመሆኑም ወዲያውኑ እስር ቤት እንዲገባ ተደርጓል።

የክሱ ሂደት

ሰኔ 29, 2020

ከአካባቢው እንዳይወጣ እገዳ ተጣለበት
ሰኔ 23, 2020

የወንጀል ክስ ተመሠረተበት። የተከሰሰው “በሃይማኖታዊ ትምህርት ፕሮግራም ላይ ተካፍሏል” በሚል ነው፤ ይህም “በሃይማኖታዊ ጽሑፎች ላይ የተመሠረቱ ንግግሮችን ማቅረብንና ማዳመጥን” ይጨምራል
ሚያዝያ 29, 2020

ባለሥልጣናቱ የማክሲምን ቤት ፈተሹ። በኋላም ማክሲም ምርመራ ተደረገበት

አጭር መግለጫ

ማክሲም ቤልቲኮቭ

የትውልድ ዘመን፦ 1980 (ባልቲስክ፣ ካሊኒንግራድ ክልል)

ግለ ታሪክ፦ በልጅነቱ ባሕላዊ ሙዚቃ መጫወት ይወድ ነበር። ግንበኛ ሆኖ ሠርቷል። ስለ መጽሐፍ ቅዱስ መጀመሪያ የነገረው ዘመዱ ነው። የአምላክ ስም ይሖዋ መሆኑን ሲማር በጣም ተገረመ። የመጽሐፍ ቅዱስ ትንቢቶች ፍጻሜያቸውን ማግኘታቸውና በውስጡ የሚገኘው ጠቃሚ ምክር አስደነቀው። በ2001 ተጠምቆ የይሖዋ ምሥክር ሆነ። በ2005 ከማሪያ ጋር ትዳር መሠረተ። ሦስት ትናንሽ ልጆች አሏቸው

የሰጠው ሐሳብ

ይሖዋ በዚህ ፈተና ወቅት አንተንም ሆነ ቤተሰቦችህን የደገፋችሁ እንዴት ነው?

ይሖዋ ለቤተሰባችን በመንፈሳዊም ሆነ በሥጋዊ የሚያስፈልገንን ሁሉ አሟልቶልናል። ባለቤቴና ልጆቼ ስሜቴን ለመረዳት እንዲሁም በሐዘን እንዳልዋጥ ለመርዳት የተቻላቸውን ሁሉ ጥረት አድርገዋል። አንድ ወንድም መዝሙር 23 በመጥቀስ አበረታቶኛል። እንዲህ አለኝ፦ “ከይሖዋና ከድርጅቱ ራስህን አታግልል። ይሖዋ እንዲንከባከብህ ፍቀድለት።”

አዘውትረህ በመንፈሳዊ እንቅስቃሴዎች መካፈልህ ደስታህን ለመጠበቅ የረዳህ እንዴት ነው?

አዘውትሬ መጽሐፍ ቅዱስን ማንበቤና በሁሉም ስብሰባዎች ላይ መገኘቴ ደስታዬን ለመጠበቅ እንዲሁም ይሖዋ እየረዳኝ እንዳለ ለመተማመን ረድቶኛል። እኔና ባለቤቴ በ2018 በሶል፣ ደቡብ ኮሪያ በተካሄደው ትልቅ ስብሰባ ላይ ተገኝተን ነበር። የእሁዱ ፕሮግራም ላይ ተናጋሪው ስብሰባው በኮሪያኛ ወደሚካሄድበት ክፍል ዞር ብሎ በእምነታቸው ምክንያት የታሰሩ ወንድሞች በሙሉ እንዲነሱ ጠየቀ። በሺዎች የሚቆጠሩ ወንድሞች ተነሱ። ያንን ጊዜ እያስታወስኩ ‘እነሱ ከተሳካላቸው እኔም ይሳካልኛል’ ብዬ አስባለሁ።

በዚህ ፈተና ወቅት ከይሖዋ ጋር ያለህ ዝምድና የተጠናከረው እንዴት ነው?

ከይሖዋ ጋር ያለኝ ዝምድና መጠናከር ብቻ ሳይሆን መልኩንም ቀይሯል። አሁን በጸሎቴ ላይ ብዙ ነገሮችን ለይቼ በዝርዝር እጠቅሳለሁ። ለይቼ የምጠቅሰው የምፈልገውን ነገር ብቻ አይደለም፤ ለይሖዋ የማቀርበው ምስጋናም ዝርዝር ጉዳዮችን ያካተተ ሆኗል። መጽሐፍ ቅዱስን የማነብበት መንገድ ተቀይሯል፤ አሁን መጽሐፍ ቅዱስን ሳነብ ከእኔ ሁኔታ ጋር ተመሳሳይ የሆኑ ምሳሌዎችን ለማግኘት እሞክራለሁ።

በሩሲያ ያሉ ወንድሞቻችንና እህቶቻችን፣ አዘውትረው በመንፈሳዊ እንቅስቃሴዎች በመካፈላቸው እንዲሁም ከሚወዷቸው ወንድሞቻቸው በሚያገኙት ድጋፍ እንዲበረታቱ እንመኛለን። “የፍቅርና የሰላም አምላክ” ከእነዚህ ውድ የእምነት ባልንጀሮቻችን ጋር እንደሚሆን እርግጠኞች ነን።—2 ቆሮንቶስ 13:11

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች