ሰኔ 27, 2023
ሩሲያ

ወንድም ስክቮርትሶቭ እና ወንድም ቲቢ ተፈረደባቸው

አጫውት

ሰኔ 20, 2023 በሮስቶቭ ክልል የሚገኘው የታጋንሮግ ከተማ ፍርድ ቤት፣ ወንድም አሌክሳንደር ስክቮርትሶቭ እና ወንድም ቫለሪ ቲቢ ጥፋተኛ ናቸው የሚል ብይን አስተላልፏል። አሌክሳንደር የሰባት ዓመት እስራት ተፈርዶበታል። ከታኅሣሥ 7, 2021 ጀምሮ ማረፊያ ቤት ቆይቷል፤ አሁንም እንደታሰረ ይቀጥላል። ቫለሪ የስድስት ዓመት የገደብ እስራት ተፈርዶበታል። ከግንቦት 18, 2022 ጀምሮ ማረፊያ ቤት የቆየ ሲሆን አሁን ተለቅቋል።

አጭር መግለጫ

አሌክሳንደር ስክቮርትሶቭ

ትውልድ፦ 1962 (ታጋንሮግ)

ግለ ታሪክ፦ በብየዳ ሥራ ተሰማርቶ ነበር

በ1983 ላሪሳን አገባ። ሁለት ሴቶች ልጆች አሏቸው

ላሪሳ ከይሖዋ ምሥክሮች ጋር መጽሐፍ ቅዱስን ማጥናት ጀመረች፤ በ1996 ተጠመቀች። አሌክሳንደር የፍትሕ መጓደል የሚወገድበት ጊዜ እንደሚመጣ የሚናገረውን የመጽሐፍ ቅዱስ ተስፋ ሲሰማ ተደሰተ። በ1997 ተጠመቀ

በ2015 የጥፋተኝነት ብይን ተላልፎበት የአምስት ዓመት ተኩል የገደብ እስራት ተፈርዶበት ነበር

የአሌክሳንደር ባለቤት ላሪሳ የሰጠችው ሐሳብ a

ባለቤትሽ ማረፊያ ቤት በነበረበት ወቅት ያጋጠሙትን ተፈታታኝ ሁኔታዎች ለመቋቋም የረዳው ምንድን ነው?

አሌክሳንደር በአንድ ዓመት ጊዜ ውስጥ ወደ 13 ማረፊያ ቤቶች ተዘዋውሯል። አብረውት ከታሰሩት ሰዎች ጋር ጥሩ ግንኙነት እንዲኖረው ማድረግ ቀላል ያልነበረባቸው ጊዜያት አሉ፤ እሱ ግን ከሁሉም ሰው ጋር ተስማምቶ ለመኖር ከፍተኛ ጥረት ያደርግ ነበር። አብዛኛውን ጊዜ እንደሚናገረው ወደ ይሖዋ መጸለዩ እንዲሁም መጽሐፍ ቅዱስንና የሚላኩለትን ደብዳቤዎች ማንበቡ ጠንካራ መንፈሳዊ አቋም ይዞ ለመቀጠል ረድቶታል። ከሁሉ ይበልጥ የከበደው ከቤተሰቡና ከወዳጆቹ መለየቱ ነው፤ ይሖዋ ግን ውስጣዊ ሰላም ሰጥቶታል።

ይህ ሁኔታ ከይሖዋ ጋር ባለሽ ግንኙነት ረገድ ምን ለውጥ አምጥቷል?

ከበፊቱ ይበልጥ አሁን በይሖዋ ላይ እተማመናለሁ። ይሖዋ ለእኔና ለባለቤቴ ያደረገልንን እንክብካቤ መመልከቴ እንደሚወደን እርግጠኛ እንድሆን አድርጎኛል። ወንድሞቻችንና እህቶቻችን ስለሚያደርጉልን እንክብካቤ እንዲሁም እኛን በተመለከተ ስለሚያቀርቡት ጸሎት ሳስብ ዓይኔ በእንባ ይሞላል።

ቫለሪ ቲቢ

ትውልድ፦ 1977 (ኖቮፖክሮቭካ፣ ክራይሚያ)

ግለ ታሪክ፦ የከባድ መኪና አሽከርካሪ ሆኖ ሠርቷል

የአምላክን ስም ሲያውቅ ከይሖዋ ምሥክሮች ጋር መጽሐፍ ቅዱስን ማጥናት ጀመረ። በ2004 ተጠመቀ

በ2012 ከክሪስቲና ጋር ትዳር መሠረተ

የቫለሪ ባለቤት ክሪስቲና የሰጠችው ሐሳብ b

ቫለሪ ማረፊያ ቤት በቆየበት ወቅት ነገ ምን እንደሚያመጣ አለማወቁ የሚፈጥረውን ጭንቀት መቋቋም የቻለው እንዴት ነው?

ቫለሪ ጫጫታ በበዛበትና በተጨናነቀ የእስር ቤት ክፍል ውስጥ በነበረበት ወቅት መረጋጋትና ብርታት እንዲሰጠው አዘውትሮ ወደ ይሖዋ ይጸልይ ነበር። አብረውት የታሰሩት ሰዎች፣ የተረጋጋና መንፈሰ ጠንካራ መሆኑን ማስተዋላቸው አልቀረም። “እንዴት ነው እንዲህ ልትረጋጋ የቻልከው?” እያሉ ብዙ ጊዜ ይጠይቁት ነበር። “እዚህ ካለነው ሁሉ ሳታማርር ደስተኛ ሆነህ የምትኖረው አንተ ነህ!” ይሉታል። ቫለሪ የመጽሐፍ ቅዱስን መሠረታዊ ሥርዓቶች በተግባር ለማዋል ይሖዋ ስለረዳው ከእነዚህ ሰዎች ጋር ጥሩ ውይይት ማድረግ ችሏል፤ በዚህም ደስተኛ ነው። አብረውት የታሰሩት ሰዎች ምክር እንኳ ይጠይቁታል። ሰዎቹ በአክብሮት ስለሚይዙት ይሖዋ ጥበቃ እንዳደረገለት ይሰማዋል።

በዚህ ተፈታታኝ ጊዜ ልዩ ትርጉም የሰጠሽ ጥቅስ አለ?

በዚህ የስደት ወቅት ምሳሌ 3:6 ከበፊቱ ይበልጥ በይሖዋ እንድታመን ረድቶኛል። ጥቅሱ “በመንገድህ ሁሉ እሱን ግምት ውስጥ አስገባ፤ እሱም ጎዳናህን ቀና ያደርገዋል” ይላል። ፍጹም የሆነ ጥበብ ያለው ይሖዋ ብቻ ነው። ማንኛውም ችግር ሲያጋጥመኝ ይሖዋ ስለ ጉዳዩ ያለውን አመለካከት ለማወቅ ወዲያውኑ ወደ መጽሐፍ ቅዱስ ዘወር ማለት ያለውን ጥቅም ተገንዝቤያለሁ። ምንም ነገር ቢፈጠር ይሖዋ ምንጊዜም እየተንከባከበኝ ነው።

ይሖዋን ለፍቅራዊ እንክብካቤውና ለሚሰጠን መመሪያ እናመሰግነዋለን፤ የሚያጋጥመንን ማንኛውንም ፈተና መወጣት የቻልነው በእሱ ነው።—መዝሙር 5:12

የክሱ ሂደት

መጋቢት 20, 2021

የአሌክሳንደር ስክቮርትሶቭ ቤት ተፈተሸ
ታኅሣሥ 7, 2021

የአሌክሳንደር ስክቮርትሶቭ ቤት ለሁለተኛ ጊዜ ተፈተሸ፤ በዚህ ወቅት በታጋንሮግ ያሉ ሌሎች 29 የይሖዋ ምሥክሮች ቤቶችም ተፈተሹ። አሌክሳንደር የወንጀል ክስ ተመሠረተበት፤ ጣቢያ እንዲቆይ ተደረገ
ታኅሣሥ 8, 2021

አሌክሳንደር ማረፊያ ቤት እንዲገባ ተደረገ
መጋቢት 29, 2022

ቫለሪ የክስ ፋይል ተከፈተበት
መጋቢት 31, 2022

መርማሪዎቹ የአሌክሳንደርና የቫለሪ ጉዳይ በአንድ የክስ መዝገብ እንዲካተት ወሰኑ
ግንቦት 18, 2022

ቫለሪ በቁጥጥር ሥር ውሎ ጣቢያ እንዲቆይ ተደረገ
ግንቦት 26, 2022

ቫለሪ ማረፊያ ቤት እንዲገባ ተደረገ
ታኅሣሥ 6, 2022

ክሱ በፍርድ ቤት መታየት ጀመረ
ሰኔ 20, 2023

አሌክሳንደር የሰባት ዓመት እስራት ተፈረደበት። ቫለሪ የስድስት ዓመት የገደብ እስራት ተፈረደበት