ነሐሴ 3, 2021
ሩሲያ

ወንድም አንድሬ ኦክሪምቹክ ይሖዋ በሚሰጠው ብርታት ታምኗል

አጫውት

ወቅታዊ መረጃ | የካቲት 3, 2022 አራተኛው ጠቅላይ ይግባኝ ሰሚ ፍርድ ቤት፣ ወንድም አንድሬ ኦክሪምቹክ ያቀረበውን አቤቱታ ውድቅ አድርጎታል። መጀመሪያ ላይ የተላለፈበት የአራት ዓመት የገደብ እስራት ብይን ይጸናል። እርግጥ ወንድም አንድሬ አሁን ወህኒ አይወርድም።

የክሱ ሂደት

ግንቦት 22, 2019

ጭምብል ያጠለቁ ፖሊሶች በማለዳ የአንድሬን ቤትና መኪና ፈተሹ
ጥቅምት 29, 2020

የወንጀል ክስ ተመሠረተበት። ሕገ ወጥ በሆነ ሃይማኖታዊ ስብሰባ ላይ በመገኘትና ጽንፈኛ የሆነ ድርጅት የሚያካሂዳቸውን እንቅስቃሴዎች በመደገፍ ወንጀል ተከሰሰ
ሚያዝያ 5, 2021

ክሱ በፍርድ ቤት መታየት ጀመረ
ነሐሴ 2, 2021

በሮስቶቭ-ኦን-ዶን ከተማ የሚገኘው የሌኒንስኪ አውራጃ ፍርድ ቤት፣ አንድሬ ጥፋተኛ ነው የሚል ውሳኔ አሳለፈ። ፍርድ ቤቱ የአራት ዓመት የገደብ እስር ፈርዶበታል
ጥቅምት 4, 2021

የሮስቶቭ ክልላዊ ፍርድ ቤት አንድሬ ያቀረበውን ይግባኝ ውድቅ አደረገ። መጀመሪያ ላይ የተላለፈበት ብይን በዚያው ይጸናል

አጭር መግለጫ

አንድሬ ኦክሪምቹክ

የትውልድ ዘመን፦ 1979 (ኮሮስተን፣ ዩክሬን)

ግለ ታሪክ፦ መካኒካል ምሕንድና ተምሯል። የይሖዋ ምሥክር ከመሆኑ በፊት በጦር ሠራዊት ውስጥ አገልግሏል

በ2006 ከዬካተሪና ጋር ትዳር መሠረተ። የመጽሐፍ ቅዱስ ትንቢቶች በትክክል መፈጸማቸው እሱንና ባለቤቱን አስገረማቸው። በ2007 ተጠመቁ። አንዲት ትንሽ ልጅ አለቻቸው

የሰጠው ሐሳብ

በደረሰብህ ፈተና ወቅት ከይሖዋ ጋር ያለህ ዝምድና የተጠናከረው እንዴት ነው?

ይሖዋ ባይረዳኝ ኖሮ ይህን ፈተና በጽናት መቋቋም የምችል አይመስለኝም። በሕይወቴ የአሁኑን ያህል ጸልዬ አላውቅም። ስለሚያስጨንቁኝ ነገሮች ይሖዋን አነጋግሬዋለሁ፤ እንዲሁም ማንንም ሰው ወይም ምንም ነገር እንዳልፈራ እምነትና ድፍረት እንዲሰጠኝ ጠይቄዋለሁ። ይሖዋ ጸሎቴን እንደሰማኝና ሁሉንም ነገር እንደሚቆጣጠር ማስተዋል ችያለሁ።

በዚህ ፈተና ውስጥ ለይሖዋ ታማኝ ሆነህ እንድትቀጥል የሚያነሳሳህ ምንድን ነው?

ዮሐንስ 6:67, 68 ምን እንደሚል አስታውሳለሁ። ጥቅሱ ላይ ኢየሱስ ደቀ መዛሙርቱን እነሱም ትተውት መሄድ ይፈልጉ እንደሆነ ጠይቋቸው ነበር፤ ጴጥሮስ ግን ‘ወደ ማን እንሄዳለን?’ በማለት መለሰ። የእኔም ስሜት ተመሳሳይ ነው። ወደ ማን እሄዳለሁ? የዘላለም ሕይወት ቃል ያለው በይሖዋ ቃል ውስጥ ብቻ ነው፤ እውነተኛ ፍትሕ ሊያሰፍን የሚችለውም እሱ ብቻ ነው። ኢሳይያስ 30:15ም ረድቶኛል። ከቁጥጥሬ ውጭ የሆኑ ተስፋ አስቆራጭ ሁኔታዎች ሲያጋጥሙኝ ይህ ጥቅስ እንዳልረበሽና በይሖዋ እንድተማመን ይረዳኛል።

ወደፊት ለሚያጋጥማቸው ስደት እየተዘጋጁ ላሉ ሰዎች ምን ምክር ትሰጣለህ?

በራሳችሁ ብርታት አትመኩ። ከዚህ ይልቅ ይሖዋ እምነትና ድፍረት እንዲጨምርላችሁ ጸልዩ። አስቸጋሪ ሁኔታ ውስጥ ስትሆኑ ጭንቀታችሁን የምታካፍሉት ሰው እንዲኖራችሁ ከወንድሞቻችሁና ከእህቶቻችሁ ጋር ያላችሁን ወዳጅነት አጠናክሩ።

በሩሲያ ያሉ ወንድሞቻችንና እህቶቻችን የሚያሳዩት ጠንካራ እምነት ለሁላችንም ግሩም ምሳሌ ይሆናል። አንድሬና ቤተሰቡ በሰማዩ አባታችን በይሖዋ ሙሉ በሙሉ በመታመን ይህን ፈተና በጽናት እንደሚወጡት እርግጠኞች ነን።—መዝሙር 37:5

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች