ግንቦት 24, 2022
ሩሲያ

የሶቺ የይሖዋ ምሥክሮች ቢፈረድባቸውም በእምነታቸው ጸንተዋል

አጫውት

መጋቢት 28, 2022 በሶቺ የሚገኘው የኮስቲንስኪ አውራጃ ፍርድ ቤት የወንድም ቭላድሚር ዴሽኮን፣ ዩሪ ሎጂንስኪን፣ ዩሪ ሞስካሌቭን እና የእህት ታትያና ቬሊዣኒናን ክስ ተመልክቶ ብይን አስተላልፏል። ወንድም ዴሽኮ አንድ ዓመት ከአራት ወር፣ እህት ቬሊዣኒና ደግሞ አንድ ዓመት ከአምስት ወር እስራት ተፈርዶባቸዋል። ሁለቱም የተፈረደባቸውን ጊዜ ያህል ማረፊያ ቤት ስለቆዩ እስር ቤት አይገቡም። ወንድም ሎጂንስኪ እና ሞስካሌቭ ደግሞ የሁለት ዓመት የገደብ እስራት ተፈርዶባቸዋል። እነሱም ቢሆኑ እስር ቤት አይገቡም።

የክሱ ሂደት

መጋቢት 24, 2021

አራቱም ተይዘው ጣቢያ ተወሰዱ፤ ለጊዜው እዚያ እንዲቆዩ ተደረገ። በጽንፈኛ ድርጅት እንቅስቃሴዎች ተሳትፈዋል ተብለው ተከሰሱ
መጋቢት 26, 2021

ወንድም ዴሽኮ እና እህት ቬሊዣኒና 400 ኪሎ ሜትር ርቆ ወደሚገኝ ማረፊያ ቤት ተላኩ። ወንድም ሎጂንስኪ እና ሞስካሌቭ የቁም እስረኛ ተደረጉ
የካቲት 3, 2022

ወንድም ዴሽኮ ከማረፊያ ቤት ተለቅቆ የቁም እስረኛ ተደረገ
መጋቢት 3, 2022

ጉዳያቸው በፍርድ ቤት መታየት ጀመረ
መጋቢት 4, 2022

እህት ቬሊዣኒና ከማረፊያ ቤት ተለቅቃ የቁም እስረኛ ተደረገች

አጭር መግለጫ

ዩሪ ሎጂንስኪ

የትውልድ ዘመን፦ 1966 (ሶቺ፣ ክራስኖዳር ክልል)

ግለ ታሪክ፦ ሙያው ወለል ማነጠፍ ነው። በ1987 ከስቬትላና ጋር ተጋቡ። አንድ ልጅ አላቸው

በ1996 ባልና ሚስቱ ተጠመቁ

የሰጠው ሐሳብ

የቁም እስር፣ እንቅስቃሴህን ምን ያህል ገድቦታል?

በቀን ውስጥ ከቤት እንድወጣ የሚፈቀድልኝ ለሁለት ሰዓት ያህል ብቻ ነው፤ ከጠዋቱ 4 ሰዓት እስከ 6 ሰዓት። በመሆኑም ሥራ መሥራት አልችልም። ደብዳቤና መልእክት መላክም ሆነ መቀበል እንዲሁም ኢንተርኔትን ጨምሮ ማንኛውንም መገናኛ መሣሪያ መጠቀም አይፈቀድልኝም።

ይሖዋ ቤተሰባችሁን እየደገፈ እንደሆነ ይሰማሃል?

ይሖዋ ለእኔ ብቻ ሳይሆን ለባለቤቴና ለልጄም አሳቢነቱን እያሳያቸው ነው። . . . ይሖዋ የቤተሰብ አባላት እርስ በርስ እንዲተጋገዙ ይፈልጋል። በመንፈሳዊ ጠንካራ የሆነ ቤተሰብ ማንኛውንም ፈተና ማለፍ የሚችለው እንዲህ ካደረገ ነው።

ዩሪ ሞስካሌቭ

የትውልድ ዘመን፦ 1964 (ዬጂንሱ፣ ካዛክስታን)

ግለ ታሪክ፦ የይሖዋ ምሥክር ከመሆኑ በፊት በመጀመሪያ በጦር ሠራዊት ውስጥ፣ በኋላም በሶቺ የፖሊስ ኃይል ውስጥ አገልግሏል። ወላጆቹንና ሁለት ወንድሞቹን በሞት አጥቷል። በ1987 ከናድዤዳ ጋር ተጋቡ። አንዲት ሴት ልጅ አለቻቸው

የኦርቶዶክስ ቤተ ክርስቲያን የምታስተምራቸውን ትምህርቶች ከመጽሐፍ ቅዱስ ጋር ካነጻጸረ በኋላ ከይሖዋ ምሥክሮች ጋር መጽሐፍ ቅዱስ ማጥናት ጀመረ። በ2005 ተጠመቀ። ባለቤቱ ደግሞ ከአንድ ዓመት በኋላ ተጠመቀች

የሰጠው ሐሳብ

ይህ ፈተና ምን አስተምሮሃል?

ሕይወት ይቀጥላል፤ ዋናው ነገር ይሖዋን በሚያስደስት መንገድ መኖሬ ነው። ሽልማት የማገኝበት ጊዜ እስኪደርስ ድረስ ለመጽናት ቆርጫለሁ። ምን ይገጥመኝ ይሆን እያልኩ አልብሰለሰልም። ይሖዋ ከጎኔ እንደሆነ ሁልጊዜም አስታውሳለሁ። . . . ነገሮች እንዳሰብኳቸው ባይሆኑም እንኳ ከይሖዋ ቁጥጥር ውጭ የሆነ አንድም ነገር እንደሌለ እርግጠኛ ነኝ። የትም ቢልኩኝ ይሖዋ ፈጽሞ አይተወኝም።