ጥቅምት 18, 2022
ሩሲያ

“የይሖዋን ስም በመሸከሜ እኮራለሁ!”

አጫውት

ጥቅምት 10, 2022 በክራስናያርስክ ክልል የሚገኘው የኬዤምስኪ አውራጃ ፍርድ ቤት፣ በወንድም ኢልዳር ኡራዝባኽቲን ላይ ጥፋተኛ ነው የሚል ብይን አስተላልፏል። የስድስት ዓመት የገደብ እስራት ተፈርዶበታል፤ አሁን ወህኒ አይወርድም።

የክሱ ሂደት

ሐምሌ 20, 2021

በኮዲንስክ ከተማ ውስጥ ቢያንስ የአምስት የይሖዋ ምሥክሮች ቤቶች ተበረበሩ፤ አንደኛው ቤት የኢልዳርና የቤተሰቡ መኖሪያ ነው። ኢልዳር ወደ ጣቢያ ተወሰደ
ሐምሌ 21, 2021

ከጣቢያ ተለቅቆ የቁም እስረኛ ተደረገ። ስልክም ሆነ ኢንተርኔት እንዳይጠቀም ታገደ
መስከረም 20, 2021

ከቁም እስር ተፈታና የጉዞ እገዳ ተጣለበት
ጥር 13, 2022

የቪዲዮ ኮንፈረንስ በማድረግ “ወንድሞችና እህቶች መጽሐፍ ቅዱስን በጥልቀት እንዲያጠኑና እርስ በርስ እንዲደጋገፉ አበረታቷል” ተብሎ ተከሰሰ
መጋቢት 30, 2022

ክሱ በፍርድ ቤት መታየት ጀመረ

አጭር መግለጫ

ኢልዳር ኡራዝባኽቲን

የትውልድ ዘመን፦ 1963 (ብራትስክ፣ ኢርኩትስክ ክልል)

ግለ ታሪክ፦ የኤሌክትሪክ ምሕንድስና አጥንቷል። የፋብሪካ ደህንነት ተቆጣጣሪ ሆኖ ይሠራል

በ1987 ከጉልኖራ ጋር ትዳር መሠረተ። የሕይወትን ትርጉም እንዲያሳውቀው ወደ አምላክ ይጸልይ ነበር። ከይሖዋ ምሥክሮች ጋር ተገናኘና መጽሐፍ ቅዱስ ማጥናት ጀመረ። በ1999 ተጠመቀ። ጉልኖራ በ2006 ተጠመቀች።

አንድ ወንድና አንዲት ሴት ልጅ እንዲሁም ሦስት የልጅ ልጆች አሏቸው

የሰጠው ሐሳብ

ጣቢያ ውስጥ በነበረህ ቆይታ ይሖዋ ያጠነከረህ እንዴት ነው?

ጣቢያ ሲወስዱኝ ምን እንደማደርግ ወይም ምን እንደሚጠብቀኝ የማውቀው ነገር አልነበረም። ይሖዋ አስደናቂ በሆነ መንገድ አጠናክሮኛል። አንደኛው ጠባቂ ወደታሰርኩበት ክፍል መስኮት መጣና “የምታነበው ነገር ላምጣልህ?” ብሎ ጠየቀኝ። እኔም “መጽሐፍ ቅዱስ አለ?” አልኩት። ቀጣዮቹን ሰዓታት ያሳለፍኩት የምወዳቸውን የመጽሐፍ ቅዱስ ታሪኮች ተመስጬ በማንበብ ነው። በኋላም መንፈሳዊ ነገር እንደምወድ የተረዳ ሌላ ጠባቂ የተለያዩ ጥያቄዎች ይጠይቀኝ ጀመር። ለሰዓታት ተወያየን። ይህ በወቅቱ በጣም ያስፈልገኝ ነበር።

እምነትህን ጠብቀህ ለመኖር ምን ረድቶሃል?

ምሳሌ 28:1 “ክፉዎች ማንም ሳያሳድዳቸው ይሸሻሉ፤ ጻድቃን ግን እንደ አንበሳ ልበ ሙሉ ናቸው” ይላል። ምንም የሠራሁት ወንጀል እንደሌለ እርግጠኛ ስለሆንኩ በተቃዋሚዎቼ ፊት አንገቴን አልደፋም። ምንም የሚያሸማቅቀኝ ነገር የለም። የይሖዋን ስም በመሸከሜ እኮራለሁ! ሩሲያ ውስጥ ያለው ስደት አጠነከረን እንጂ አቋማችንን አላስቀየረንም። ይሖዋ ሥልጠናችንን እንደሚያጠናቅቅና እንደሚያጠነክረን የገባውን ቃል ጠብቋል።—1 ጴጥሮስ 5:10

የኢልዳርም ሆነ የሌሎቹ የሩሲያ ወንድሞቻችንና እህቶቻችን ተሞክሮ እንደሚያጎላው አምላካችን ይሖዋ “በጭንቅ ጊዜ” የሚደርስልን አምላክ ነው።—መዝሙር 46:1