ሐምሌ 7, 2022
ሩሲያ

ዬቭጌኒ ዚኒች የቤተሰቡን የታማኝነት ጎዳና ተከትሏል

አጫውት

ሰኔ 27, 2022 በክራስኖያርስክ የሚገኘው የኦክትያቢርስኪ አውራጃ ፍርድ ቤት በወንድም ዬቭጌኒ ዚኒች ላይ የስድስት ዓመት እስራት በይኗል። ዬቭጌኒ ወዲያውኑ ከፍርድ ቤት ወደ እስር ቤት ተወስዷል።

የክሱ ሂደት

ታኅሣሥ 11, 2020

የዬቭጌኒ ቤት ተፈተሸ
ጥር 21, 2021

የወንጀል ክስ ተመሠረተበት
ጥቅምት 19, 2021

የጽንፈኛ ድርጅትን እንቅስቃሴዎች አስተባብሯል በሚል ክስ ተመሠረተበት
ጥቅምት 20, 2021

የጉዞ ክልከላዎች ተጣሉበት
ታኅሣሥ 14, 2021

ጉዳዩ በፍርድ ቤት መታየት ጀመረ

አጭር መግለጫ

ዬቭጌኒ ዚኒች

የትውልድ ዘመን፦ 1966 (ናዛሮቮ፣ ክራስኖያርስክ ግዛት)

ግለ ታሪክ፦ በሶቪየት መንግሥት ዘመን፣ ወላጆቹና አያቶቹ በእምነታቸው ምክንያት ስደት ደርሶባቸዋል

በ1982 ተጠምቆ የይሖዋ ምሥክር ሆነ። በ1988 ከማሪያ ጋር ተጋቡ፤ ለአካለ መጠን የደረሰች አንዲት ልጅም አለቻቸው። ማሪያ ክሱ ከመዘጋቱ በፊት ሕይወቷ አልፏል

የሰጠው ሐሳብ

የአንተም ሆነ የባለቤትህ ወላጆችና አያቶች ለእምነታቸው ሲሉ ስደትን ተጋፍጠዋል። የእነሱ ምሳሌነት ምን በጎ ተጽዕኖ አሳድሮብሃል?

በዚያን ጊዜ ስደት የተለመደ ነገር ነበር። እነሱ ለስደት ከነበራቸው አመለካከት ብዙ ተምሬያለሁ። በደረሰባቸው ነገር የተነሳ ቁጣቸውን ወይም ምሬታቸውን ሲገልጹ ሰምቼ አላውቅም። ሁሉም ያመኑበት ነገር ቢኖር፣ ስደት የክርስትና ሕይወት ክፍል እንደሆነ ነው። ወላጆቼ የተዉትን ምሳሌ መለስ ብዬ ሳስብ እምነታቸው ስለ እውነት ባላቸው ጥልቅ ግንዛቤና ከአምላክ ጋር በመሠረቱት ወዳጅነት ላይ የተመሠረተ እንደነበር መናገር እችላለሁ። ከልጅነት ሕይወቴ በደንብ የማስታውሰው አንድ ትዝታ፣ አባቴ ሁልጊዜም ተንበርክኮ በትሕትና ይጸልይ እንደነበር ነው።

የባለቤቴ የማሪያ ወላጆችም ግሩም ምሳሌ የሚሆኑ ናቸው። እውነት የሕይወታቸው አንዱ ክፍል ብቻ ሳይሆን ሕይወታቸው ነበር። ባለቤቴን ጠንካራ እምነት፣ ጥሩ መንፈሳዊ ልማዶች እንዲሁም በጉባኤ ላሉ ወንድሞችና እህቶች ልባዊ አሳቢነት እንዲኖራት አድርገው ነው ያሳደጓት። ማሪያ እስከ መጨረሻው፣ ታማ ሕክምና ትወስድ በነበረበት ጊዜም እንኳ የሌሎችን መንፈሳዊነት ለማጠናከር የምትችለውን ሁሉ ታደርግ ነበር። ማበረታቻ የሚያስፈልጋቸውን ሰዎች ታስታውሰኝ ነበር።

ይህን በጣም ከባድ ሁኔታ በጽናት ለመቋቋም የረዳህ ምንድን ነው?

ይሖዋን እንዲሁም ወንድሞቼንና እህቶቼን ለማገልገል ያለኝ ፍላጎት ተስፋ እንዳልቆርጥ ብርታት ይሰጠኛል። ወህኒ ቤት ውስጥ አቅሜ በፈቀደ መጠን ብዙ ወንድሞችን ለማገዝ ጥረት አድርጌያለሁ። ይሖዋ ወንድሞችን የሚጠቅም ነገር ለማድረግ እንደተጠቀመብኝ ማወቄ ልዩ ስሜት ይፈጥርብኛል፤ እንደምፈለግ እንዲሰማኝ ያደርጋል። ይሖዋ እያንዳንዳችንን በግለሰብ ደረጃ እንደሚንከባከበንም አስተምሮኛል።

የወንድሞችና የእህቶች ደግነትና ልግስና ይሖዋ እንደሚወደኝና ደስ እንደሚሰኝብኝ ያለኝን እምነት አጠናክሮልኛል። ያለፉትን ጥቂት ወራት ባለቤቴን ማሪያን በሞት በማጣቴ ከባድ ሐዘን ውስጥ ነበርኩ፤ በመሆኑም ወንድሞቼ በዚህ ወቅት ያሳዩኝ ደግነት ለእኔ ልዩ ትርጉም አለው።

ዬቭጌኒ ከባድ ፈተናዎችን ተጋፍጦ የቤተሰቡን የድፍረትና የጽናት ምሳሌ ለመከተል ጥረት ሲያደርግ ይሖዋ ፍቅሩን እንደሚያሳየውና እንደሚያጽናናው እንተማመናለን።—መዝሙር 86:17