መስከረም 12, 2023
ሩሲያ

“ይሖዋ ሁልጊዜም ረዳታችን ነው!”

አጫውት

ነሐሴ 18, 2023 በፐርም ክልል የሚገኘው የሶሊካምስክ ከተማ ፍርድ ቤት ወንድም ቭላዲሚር ፖልቶራድኔቭ 638,000 ሩብል (6,787 የአሜሪካ ዶላር)፣ ወንድም አሌክሳንደር ሶብያኒን 494,000 ሩብል (5,255 የአሜሪካ ዶላር) እንዲሁም ወንድም ቭላዲሚር ቲሞሽኪን 512,000 ሩብል (5,447 የአሜሪካ ዶላር) ቅጣት እንዲከፍሉ ፍርድ አስተላለፈ። ፍርድ ቤቱ ጥፋተኞች ናቸው የሚል ብያኔ ያስተላለፈ ቢሆንም አሁን ወደ ወህኒ አይወርዱም።

አጭር መግለጫ

ቭላዲሚር ፖልቶራድኔቭ

ትውልድ፦ 1962 (ክራስኖሼኮቮ፣ ኦረንበርግ ክልል)

ግለ ታሪክ፦ የስፌት መኪኖች ጥገና ባለሙያ ነበር

ፍጻሜያቸውን እያገኙ ስላሉ ትንቢቶች ሲያውቅ መጽሐፍ ቅዱስን የማጥናት ፍላጎት አደረበት። በ2001 ተጠምቆ የይሖዋ ምሥክር ሆነ

የሰጠው ሐሳብ

በይሖዋ ላይ ያለህ እምነት እንዲጠናከር የረዳህ የትኛው የመጽሐፍ ቅዱስ ታሪክ ነው?

አንደኛ ሳሙኤል ምዕራፍ 17⁠ን ማንበቤና በታሪኩ ላይ ማሰላሰሌ ረድቶኛል። ዳዊት ጎልያድን ለመጋፈጥ ድፍረት የሰጠው ይሖዋ ከዚያ በፊት እንዴት እንደረዳው ማስታወሱ ነበር። ቁጥር 37 ላይ “ከአንበሳና ከድብ ጥፍር የታደገኝ ይሖዋ አሁንም ከዚህ ፍልስጤማዊ እጅ ይታደገኛል” ብሏል። መርማሪው አሥር ዓመት ልታሰር እንደምችል ሲነግረኝ መጀመሪያ ላይ ፈርቼና ግራ ተጋብቼ ነበር። ነገር ግን ባለፉት ዓመታት ይሖዋ እንዴት እንደረዳኝ ማሰብ ጀመርኩ፤ ከይሖዋ ጋር ያሳለፍነውን ጊዜ በፎቶ አልበም እንደመመልከት ማለት ነው። እነዚህ ትዝታዎች በእሱ ላይ ያለኝን እምነት አጠናክረውታል። ይሖዋ ፈጽሞ ከአቅሜ በላይ እንድፈተን ፈቅዶ አያውቅም። እሱ ሊቆጣጠረው የማይችል ምንም ነገር እንደሌለ አውቃለሁ።

አሌክሳንደር ሶብያኒን

ትውልድ፦ 1973 (ክራስኖቪሼርስክ፣ ፐርም ክልል)

ግለ ታሪክ፦ አንጥረኛ ነው። ልጅ ሳለ ሰዎች የሚሞቱት ለምን እንደሆነ ያሳስበው ነበር። በመጽሐፍ ቅዱስ ላይ ስለተገለጸው የዘላለም ሕይወት ተስፋ ሲማር ተደሰተ። በ1992 ተጠመቀ

በ2020 ማሪያን አገባ

የሰጠው ሐሳብ

በይሖዋ ላይ ያለህን እምነት ይዘህ እንድትቀጥል የረዳህ ምንድን ነው?

አንዳንድ ጊዜ ጥርጣሬ ሲያድርብኝ በዘፍጥረት 31:12 ላይ ይሖዋ ለያዕቆብ ያለውን ነገር ለማስታወስ እሞክራለሁ፤ ይሖዋ “ላባ እየፈጸመብህ ያለውን ነገር ሁሉ ተመልክቻለሁ” ብሎታል፤ ትኩረት ሰጥቶ እንደሚመለከተው፣ አብሮት እንደሆነና እንደሚጠብቀው ለያዕቆብ አረጋግጦለታል። ይሖዋ ለእኔም እንዲሁ እያደረገልኝ እንደሆነ አውቃለሁ። አቅሜ እንደተሟጠጠ በተሰማኝ ጊዜ ሁሉ ለመጽናት የሚያስፈልገኝን ኃይል ሰጥቶኛል። የሚያጋጥመኝ እያንዳንዱ ፈተና አንድ ትምህርት ሰጥቶኝ ያልፋል፦ ይሖዋ ሁልጊዜም ረዳታችን ነው!