የካቲት 20, 2023
ሩሲያ

“ይሖዋ ከእኔ ጋር እስካለ ድረስ የትም ቢሆን ቤቴ ያለሁ ያህል ይሰማኛል”

አጫውት

በአልታይ ሪፑብሊክ የሚገኘው የጎርኖ አልታይስኪ ከተማ ፍርድ ቤት የካቲት 17, 2023 በወንድም አሌክሳንደር ካሊስትራቶቭ ላይ የጥፋተኝነት ብይን አስተላልፏል፤ በስድስት ዓመት ተኩል የገደብ እስራት እንዲቀጣም ወስኗል። እርግጥ፣ በአሁኑ ወቅት ወህኒ አይወርድም።

አጭር መግለጫ

አሌክሳንደር ካሊስትራቶቭ

የትውልድ ዘመን፦ 1976 (ቢስክ፣ አልታይ ግዛት)

ግለ ታሪክ፦ የሦስት ዓመት ልጅ ሳለ አባቱ ሞተ። የልጆች የሥነ ልቦና ባለሙያ ሆኖ ይሠራ ነበር

በዝግመተ ለውጥ ጽንሰ ሐሳብ ያምን ነበር። እናቱ ከይሖዋ ምሥክሮች ጋር መጽሐፍ ቅዱስን ማጥናት ጀመረች። መጽሐፍ ቅዱስ ስለ ፍጥረት አጀማመር የሚሰጠው መግለጫ ቅልብጭ ያለና ግልጽ መሆኑ ትኩረቱን ሳበው

በ1994 ተጠመቀ። በ2020 ከዩሊያ ጋር ተጋቡ

ከዚህ በፊት ሁለት ጊዜ የወንጀል ክስ ተመሥርቶበታል። የመጀመሪያው በ2000 ሲሆን ጦር ሠራዊቱን ለመቀላቀል ፈቃደኛ ባለመሆኑ ነበር፤ ሁለተኛው ደግሞ በ2010 በጽንፈኝነት ሲከሰስ ነው

የሰጠው ሐሳብ

ከዚህ በፊት በእስራት ያሳለፍከው ጊዜ ምን አስተምሮሃል?

ለመጀመሪያ ጊዜ በወንጀል በተከሰስኩበት ወቅት ማረፊያ ቤት 21 ቀን ቆይቻለሁ፤ ውጭ ካለ ማንኛውም ሰው ጋር እንድገናኝም አልተፈቀደልኝም ነበር። ይህ ገጠመኝ፣ በይሖዋ ብቻ መታመንን አስተምሮኛል። አንድ የተገነዘብኩት ነገር ቢኖር፣ ይሖዋ ከእኔ ጋር እስካለ ድረስ የትም ቢሆን ቤቴ ያለሁ ያህል ይሰማኛል። አሁንም ስጋት ሲገባኝ፣ ይሖዋ ቀደም ሲል እንዴት እንደተንከባከበኝ ለማስታወስ እሞክራለሁ። ይህን ሳስብ ዛሬም ቢሆን ከይሖዋ ቁጥጥር ውጭ የሆነ ነገር እንደሌለ ልቤ ይተማመናል።

አንተም ሆንክ ባለቤትህ ብርታት የሆናችሁ የመጽሐፍ ቅዱስ ጥቅስ አለ?

ሁለተኛ ሳሙኤል ምዕራፍ 22 እኔንና ባለቤቴን ብዙ ጊዜ አበርትቶናል። ቁጥር 3 እንዲህ ይላል፦ “አምላኬ የምሸሸግበት ዓለቴ ነው፤ ጋሻዬ፣ . . . አስተማማኝ መጠጊያዬ . . . መሸሻዬና አዳኜ ነው።” ሁሌም ፍርድ ቤት ከመሄዳችን በፊት ይህን ጥቅስ አብረን እናነበዋለን። የብርታታችን ምንጭ ይሖዋ እንደሆነ ያስታውሰናል።

ይሖዋ፣ በጭንቅ ውስጥ ሆነው ለሚጠሩት ታማኝ አገልጋዮቹ አለኝታ መሆኑን እንደሚቀጥል እንተማመናለን።—2 ሳሙኤል 22:7

የክሱ ሂደት

2000

ወታደራዊ አገልግሎት ለመስጠት ፈቃደኛ ባለመሆኑ በቁጥጥር ሥር ዋለ። ለ21 ቀናት ማረፊያ ቤት ተላከ። በኋላ ላይ ከክስ ነፃ ተደረገ
2010

በጽንፈኝነት ተከሰሰ። ክሱ በሁለት ፍርድ ቤቶች ከታየ በኋላ በአልታይ ሪፑብሊክ ጠቅላይ ፍርድ ቤት ፊት ቀረበ፤ በመጨረሻም ከክስ ሙሉ በሙሉ ነፃ ተደረገ
ታኅሣሥ 16, 2021

የወንጀል ክስ ተመሠረተበት
ጥር 16, 2022

ባለሥልጣናት በአልታይ ሪፑብሊክ የሚገኙ አምስት የይሖዋ ምሥክሮች ቤቶችን ፈተሹ። የፌዴራል ደህንነት አባላት የእነ አሌክሳንደርን ቤት ሰብረው ከገቡ በኋላ ለምርመራ እንፈልግሃለን ብለው ወሰዱት። በዚያው ምሽት ለቀቁት፤ ሆኖም የጉዞ ክልከላዎች ተጣሉበት
ነሐሴ 25, 2022

ክሱ በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች