ሐምሌ 25, 2023
ሩሲያ

ጸሎትና አዎንታዊ አመለካከት በቭላዲቮስቶክ ያሉ የይሖዋ ምሥክሮች እንዲጸኑ ረድቷቸዋል

አጫውት

በቭላዲቮስቶክ የፕዬርቮርዬችዬንስኪ አውራጃ ፍርድ ቤት ከእህት ኒና አስትቫትስቱሮቫ፣ ከእህት ኤሌና ባርማኪና፣ ከእህት ልዩድቪጋ ካታናዬቫ፣ ከእህት ዬካትዬሪና ትርዬጉባ እና ከእህት ዬልዬና ትሶርን እንዲሁም ከወንድም ኢጎር ሎንቻኮቭ እና ከወንድም ዩሪ ርዬዶዙቦቭ ጉዳይ ጋር በተያያዘ በቅርቡ ፍርድ እንደሚያስተላልፍ ይጠበቃል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም።

አጭር መግለጫ

ኤሌና ባርማኪና

ትውልድ፦ 1967 (ቺሪፓኖቫ፣ ኖቮሲቢርስክ ክልል)

ግለ ታሪክ፦ የፎቶግራፍ ባለሙያ ናት

ከይሖዋ ምሥክሮች ጋር የተዋወቀችው እናቷና ወንድሟ መጽሐፍ ቅዱስ ማጥናት ሲጀምሩ ነው። በ2000 ተጠመቀች

በ2006 ዲሚትሪን አገባች። ዲሚትሪ በ2023 የስምንት ዓመት እስራት ተፈርዶበታል

የሰጠችው ሐሳብ

በዚህ አስቸጋሪ ጊዜ ያጽናናሽና ያበረታታሽ ምንድን ነው?

ቤታችን ከተፈተሸ በኋላ እኔና ባለቤቴ በቁጥጥር ሥር ዋልን፤ ከዚያም ዲሚትሪ ታሰረ። ባለቤቴ ከጎኔ ባለመኖሩ ምን እንደማደርግና እሱን እንዴት ልረዳው እንደምችል ግራ ገባኝ። በመጀመሪያዎቹ ጥቂት ቀናት በጣም ስለተረበሽኩ መጸለይ እንኳ ከብዶኝ ነበር። በኋላ ላይ ግን አንድ ነገር አስታወስኩ፤ ነገሮች ከአቅሜ በላይ ሲሆኑብኝና ምን ብዬ እንደምጸልይ ግራ ሲገባኝ በመጽሐፍ ቅዱስ ውስጥ የተመዘገቡትን በመንፈስ መሪነት የተጻፉ የአምላክ አገልጋዮች ጸሎት ሳነብ ይሖዋ እንደ እኔ ጸሎቶች አድርጎ ይቀበላቸዋል። (ሮም 8:26) በጣም ከባድ ሁኔታ ውስጥ በነበርኩበት ወቅት ይህ ሐሳብ አጽናንቶኛል።

ኢጎር ሎንቻኮቭ

ትውልድ፦ 1977 (ሳራቶቭ፣ ሳራቶቭ ክልል)

ግለ ታሪክ፦ ፖስታ ቤት ውስጥ የስልክ ጥሪዎችን ያስተናግዳል

እናቱ የይሖዋ ምሥክር የሆነችው የኮሌጅ ተማሪ እያለ ነው። የእናቱን ደስታ ሲመለከት መጽሐፍ ቅዱስን ለማጥናት ተነሳሳ። በ2008 ተጠመቀ

የሰጠው ሐሳብ

ካለህበት ሁኔታ አንጻር ልዩ ትርጉም የሰጠህ ጥቅስ አለ?

የክሱ ሂደት ያስከተለብኝ አካላዊ፣ ስሜታዊና ኢኮኖሚያዊ ችግር የቀድሞ ሕይወቴን እንድናፍቅ አድርጎኝ ነበር። ይህን ስሜቴን ለይሖዋ በጸሎት ነገርኩት። ከዚያም በመክብብ 7:10 ላይ አሰላሰልኩ፤ ጥቅሱ “‘የቀድሞው ዘመን ከአሁኑ ዘመን ለምን ተሻለ?’ አትበል፤ እንዲህ ብሎ መጠየቅ ጥበብ አይደለምና” ይላል። ይህ ጥቅስ በሕይወቴ ውስጥ ስላገኘኋቸው በረከቶች ቆም ብዬ እንዳስብ አደረገኝ፤ ለምሳሌ እናቴ፣ እጮኛዬ እንዲሁም በጉባኤ ውስጥ ያሉ ወንድሞቼና እህቶቼ። ሁሉም ይደግፉኛል። ከሁሉ በላይ ደግሞ ይሖዋ ከእኔ ጋር እንደሆነ አውቃለሁ። አሁን ስጸልይ ስለ ችግሮቼ ብቻ ከማውራት ይልቅ ስላሉኝ በረከቶች ይሖዋን ሁልጊዜ አመሰግነዋለሁ።

ዩሪ ርዬዶዙቦቭ

ትውልድ፦ 1972 (ኮምሶሞልስክ ና አሙሪ፣ ካባረቭስክ ክልል)

ግለ ታሪክ፦ በልጅነቱ ሥዕል መሣል ተምሯል። የሥነ ሥዕል አስተማሪ ሆነ

በ1998 ከአናስታሲያ ጋር ትዳር መሠረተ። ሦስት ሴቶች ልጆች አሏቸው

መጽሐፍ ቅዱስን አብረው ማንበብ ጀመሩ። ከይሖዋ ምሥክሮች ጋር ተገናኙ፤ ለጥያቄዎቻቸው ከመጽሐፍ ቅዱስ መልስ ማግኘታቸው አስደሰታቸው። አናስታሲያ በ2003 ዩሪ ደግሞ በ2004 ተጠመቁ

የሰጠው ሐሳብ

ጸሎት ለመጽናት የረዳህ እንዴት ነው?

ይህ ስደት ከጀመረ ወዲህ በጸሎቴ ላይ፣ የምፈልገውን ነገር ለይቼ መጥቀስ ጀምሬያለሁ። ደግሞም ምንም ነገር ቢያጋጥመኝ አዘውትሬ ለመጸለይ ቁርጥ ውሳኔ አድርጌያለሁ። ይሖዋን ከጠየቅሁት ነገሮች አንዱ ልቤን እንዲያረጋጋልኝ ነው። እንዲህ ያለ ጸሎት ማቅረቤ እኔም ሆንኩ ቤተሰቤ ተስፋ እንዳንቆርጥና ከሚገባው በላይ እንዳንጨነቅ ረድቶናል። እንዲያውም ያለሁበትን ሁኔታ ይሖዋን ለማገልገል እንደሚያስችለኝ ጥሩ አጋጣሚ አድርጌ እመለከተዋለሁ። ከይሖዋ ጋር ያለኝ ወዳጅነት ከምንጊዜውም የበለጠ ተጠናክሯል።

ዬካትዬሪና ትርዬጉባ

ትውልድ፦ 1991 (ቭላዲቮስቶክ፣ ፕሪሞርይስ ግዛት)

ግለ ታሪክ፦ የእንግሊዝኛ መምህርት ናት

ልጅ እያለች አያቷ የመጽሐፍ ቅዱስ ታሪኮች መማሪያ መጽሐፌ የሚለውን መጽሐፍ ታነብላት ነበር። ዕድሜዋ 15 ዓመት ሲሆን መጽሐፍ ቅዱስን ማጥናት ጀመረች። በ2008 ተጠመቀች

የሰጠችው ሐሳብ

ካጋጠመሽ ነገር ምን ትምህርት አግኝተሻል?

በጣም ከከበዱኝ ነገሮች አንዱ፣ ፈተናዎች እያጋጠሙኝ ደስተኛ ሆኜ መቀጠል ነበር። ማረፊያ ቤት ወይም እስር ቤት ስላሉ ወንድሞችና እህቶች ሳነብ አንድ ነገር አስተዋልኩ፤ ያሉበት ሁኔታ እየከፋ በሄደ መጠን ደስታቸው ይበልጥ እየጨመረ ነበር። እኔ ግን በአስቸጋሪ ሁኔታ ውስጥ ሆኜ ሊያስደስተኝ የሚችለው ምን እንደሆነ ሊገባኝ አልቻለም። “ለደስታችን ምክንያት የሆኑ ነገሮች” የሚል ርዕስ ባለው በመዝሙር 111 ላይ ማሰላሰሌ ጠቅሞኛል። መዝሙሩ “ደስታችን መሠረት ያለው ነው፤/ከቃሉ የመነጨ ነው” የሚል ስንኝ አለው። ስለዚህ የአምላክን ቃል መጽሐፍ ቅዱስን በማንበብ ራሴን በመንፈሳዊ መመገብና ይሖዋ ደስተኛ እንዲያደርገኝ አዘውትሬ መጸለይ እንዳለብኝ ተገነዘብኩ፤ አሁን እያደረግሁ ያለሁትም ይህንን ነው።

ዬልዬና ትሶርን

ትውልድ፦ 1972 (ቭላዲቮስቶክ፣ ፕሪሞርይስ ግዛት)

ግለ ታሪክ፦ በመምህርነትና በትናንሽ ልጆች ትምህርት ቤት አስተዳዳሪነት ሠርታለች

መከራንና ሞትን አስመልክቶ ለነበሯት ጥያቄዎች የይሖዋ ምሥክር ከነበረ ጎረቤቷ መልስ አገኘች። በ2011 ተጠመቀች

የሰጠችው ሐሳብ

አዎንታዊ አመለካከት ይዘሽ መቀጠል የቻልሽው እንዴት ነው?

ያለፉትን ዓመታት መለስ ብዬ ሳስብ ከይሖዋ ቁጥጥር ውጭ የሆነ ምንም ነገር እንደሌለ ተገንዝቤያለሁ። እየተከናወነ ያለውን ሁሉንም ነገር ያውቃል። ይሖዋ በኢሳይያስ 54:17 ላይ የገባውን ቃል ለማስታወስ እጥራለሁ፤ ጥቅሱ “አንቺን ለማጥቃት የተሠራ ማንኛውም መሣሪያ ይከሽፋል፤ . . . የይሖዋ አገልጋዮች ውርሻ ይህ ነው” ይላል። ይህን ማድረጌ በወደፊቱ ተስፋ ላይ እንዳተኩርና አሁን ይሖዋና ወንድሞቼ ለሚያሳዩኝ ፍቅር አመስጋኝ እንድሆን ረድቶኛል።

ይሖዋ ጻድቅ አገልጋዮቹን ምንጊዜም እንደሚባርካቸውና እንደሚንከባከባቸው ማወቃችን በጣም ያጽናናናል፤ “[ሞገሱ] እንደ ትልቅ ጋሻ ይሆንላቸዋል።”—መዝሙር 5:12

የክሱ ሂደት

ነሐሴ 6, 2019

ኤሌና ባርማኪና የወንጀል ክስ ተመሠረተባት
ሰኔ 8, 2020

ኒና፣ ልዩድቪጋ እና ዬልዬና የክስ ፋይል ተከፈተባቸው
ሰኔ 17, 2020

የኤሌና ባርማኪና ጉዳይ በፍርድ ቤት መታየት ጀመረ
ሐምሌ 9, 2020

የኒና፣ የልዩድቪጋ፣ የዬልዬና እና የዩሪ ቤት ተፈተሸ። ዩሪ ለምርመራ ተወሰደ። ኒና፣ ልዩድቪጋ እና ዬልዬና የጉዞ እገዳ ተጣለባቸው
መስከረም 4, 2020

ኢጎር የወንጀል ክስ ተመሠረተበት
መስከረም 8, 2020

ዬካትዬሪና የወንጀል ክስ ተመሠረተባት
መስከረም 29, 2020

ኤሌና ባርማኪና በተከሰሰችበት የጽንፈኝበት ወንጀል በቂ ማስረጃ ስላልቀረበ ጉዳዩ ወደ አቃቤ ሕጉ ተመለሰ
ነሐሴ 11, 2021

ዩሪ የወንጀል ክስ ተመሠረተበት። የኤሌና ባርማኪና ክስ በድጋሚ መታየት ጀመረ፤ የሁሉም ጉዳይ በአንድ የክስ ፋይል ውስጥ ተጠቃለለ
መስከረም 28, 2022

ክሱ በፍርድ ቤት መታየት ጀመረ

a b የእህት ኒና አስትቫትስቱሮቫን እና የእህት ልዩድቪጋ ካታናዬቫን ሐሳብ ማግኘት አልተቻለም።

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች