ግንቦት 22, 2023
ሩሲያ

“ፍርሃት ተፈጥሯዊ ምላሽ ነው፤ ድፍረት ግን የምርጫ ጉዳይ ነው”

አጫውት

በክራስናያርስክ የሚገኘው የዠለዝኖዶሮዥኒ አውራጃ ፍርድ ቤት መጋቢት 24, 2023 በእህት ናታሊያ ቮሮፓዬቫ ላይ ብይን አስተላልፏል። እህታችን 360,000 ሩብል (4,730 የአሜሪካ ዶላር) የገንዘብ መቀጮ እንዲጣልባት ፍርድ ቤቱ ወስኗል።

አጭር መግለጫ

ናታሊያ ቮሮፓዬቫ

የትውልድ ዘመን፦ 1971 (ክራስናያርስክ)

ግለ ታሪክ፦ ፀጉር ሠሪ ነች

‘አምላክ ካለ ዓለም ላይ ይህን ያህል መከራ የበዛው ለምንድን ነው?’ የሚለው ጉዳይ ያሳስባት ነበር። የይሖዋ ምሥክሮች ለጥያቄዎቿ ከመጽሐፍ ቅዱስ ላይ መልስ ሰጧት። በ1996 ተጠመቀች

የሰጠችው ሐሳብ

ወንድሞችና እህቶች ምን ድጋፍ እያደረጉልሽ ነው?

ወንድም ፊሊክስ ማክሃማዲየቭ ለችሎቱ በሰጠው የመጨረሻ ቃል ላይ “ሕይወት ያለወዳጅ ማለት ዓለም ያለፀሐይ ብርሃን እንደ ማለት ነው” ብሎ ነበር። ይህ በጣም የምስማማበት ሐሳብ ነው። ወዳጆቼ ለእኔ ልክ እንደ ፀሐይ የማይነጥፍ የብርሃንና የሙቀት ምንጭ ሆነውልኛል። ምርመራ እየተካሄደብኝ በነበረበት ወቅት ወድቄ እግሬ ተሰብሮ ነበር። ቀዶ ጥገና ከተደረገልኝ በኋላ እግሬ ለሁለት ወር ያህል በጀሶ ታስሮ ነበር። በዚህ ወቅት ከቦታ ወደ ቦታ የሚወስዱኝ፣ አስቤዛ የሚገዙልኝና ምግብ የሚያዘጋጁልኝ የእምነት አጋሮቼ ነበሩ፤ ለእኔ ስሜታዊም ሆነ ቁሳዊ ድጋፍ ለማድረግ ተረባርበዋል። ከዚህም ሌላ የፍርድ ቤቱን ብይን በምሰማበት ዕለት ከ100 በላይ ወንድሞች መጥተው ነበር። ይሖዋ እንዲህ ያሉ ወዳጆች በመስጠት ስለባረከኝ አመሰግነዋለሁ። ይሖዋ ለእኔ ያለውን ፍቅር ከማሳየት የሚያግደው አንዳች ነገር እንደሌለ እነሱ ካደረጉልኝ ድጋፍ ተረድቻለሁ።

ይህ ገጠመኝ ምን አስተምሮሻል?

አንድ የተገነዘብኩት ነገር አለ፤ ይኸውም ፍርሃት ተፈጥሯዊ ምላሽ ነው፤ ድፍረት ግን የምርጫ ጉዳይ ነው። ይሖዋ እንደሚደሰትብኝ ባሰብኩ ቁጥር ድፍረቴ ይጨምራል። ከእሱ ጋር ያለኝን ወዳጅነት ለማጠናከርና ቃሉን በየቀኑ ለማንበብ ጥረት አደርጋለሁ፤ ይህም የእሱን እጅ በራሴ ሕይወት እንድመለከት አስችሎኛል። ምንጊዜም ከጎኔ እንደሚሆንና እንደማይተወኝ እርግጠኛ እንድሆን ያደረገኝ ይህ ነው።

እንደ ናታሊያ ሁሉ እኛም “በሙሉ ልብ ‘ይሖዋ ረዳቴ ነው፤ አልፈራም’” እንላለን።—ዕብራውያን 13:6

የክሱ ሂደት

ከኅዳር 2017–ኅዳር 2020

ክትትል ይደረግባት ጀመር፤ መኖሪያ ቤቷ ተፈተሸ። በወንድም አንድሬ ስቱፕኒኮቭ ላይ ከሚደረገው የወንጀል ምርመራ ጋር ተያይዞ ምርመራ ተደረገባት
መስከረም 5, 2022

የክስ ፋይል ተከፈተባት
መስከረም 6, 2022

የጉዞ ክልከላዎች ተጣሉባት
ጥቅምት 20, 2022

በወንጀል ተከሰሰች
የካቲት 27, 2023

ክሷ በፍርድ ቤት መታየት ጀመረ
መጋቢት 24, 2023

ፍርድ ቤቱ 360,000 ሩብል (4,730 የአሜሪካ ዶላር) የገንዘብ መቀጮ ጣለባት

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች