ኅዳር 24, 2019 አንጎላ ውስጥ በተካሄደ ልዩ ስብሰባ ላይ የይሖዋ ምሥክሮች አዲስ ዓለም ትርጉም መጽሐፍ ቅዱስን በኪኮንጎ ቋንቋ አወጡ።

በመላው አንጎላ የሚገኙ በኪኮንጎ ቋንቋ የሚመሩ ጉባኤዎች በዚህ ታሪካዊ ስብሰባ ላይ እንዲገኙ ተጋብዘው ነበር። የአንጎላ ቅርንጫፍ ቢሮ ኮሚቴ አባል የሆነው ወንድም ማቲው ስቴጌል በቪያና፣ አንጎላ በሚገኘው የትላልቅ ስብሰባዎች አዳራሽ ውስጥ ለተሰበሰቡት 2,053 ሰዎች ይህ አዲስ መጽሐፍ ቅዱስ መውጣቱን አብስሯል።

የትርጉም ቡድኑ የዚህን መጽሐፍ ቅዱስ የትርጉም ሥራ ለማጠናቀቅ ሰባት ዓመት ወስዶበታል። ይህ የኪኮንጎ አዲስ ዓለም ትርጉም ከመውጣቱ በፊት ወንድሞች በፖርቱጋልኛ የተዘጋጀውን አዲስ ዓለም ትርጉም ወይም በቀላሉ የማይገኙና ዋጋቸው ውድ የሆኑ ሌሎች የኪኮንጎ የመጽሐፍ ቅዱስ ትርጉሞችን ይጠቀሙ ነበር።

አሁን ግን አዲስ ዓለም ትርጉም በኪኮንጎ ቋንቋ ስለወጣ በርካታ አስፋፊዎች በሕይወታቸው ለመጀመሪያ ጊዜ በአፍ መፍቻ ቋንቋቸው መጽሐፍ ቅዱስን ማግኘት ይችላሉ። በሥራው ከተካፈሉት ተርጓሚዎች አንዱ እንዲህ ብሏል፦ “ይህ አዲስ መጽሐፍ ቅዱስ ወንድሞችና እህቶች መጽሐፍ ቅዱስን ይበልጥ መረዳትና ግልጽ በሆነ መንገድ እውነትን ለሌሎች ማስተማር እንዲችሉ ይረዳቸዋል።”

አንጎላ ውስጥ በኪኮንጎ ቋንቋ በሚመሩ ጉባኤዎች ውስጥ የሚያገለግሉ 1,524 አስፋፊዎች ይገኛሉ። በአገሪቱ ውስጥ የኪኮንጎ ቋንቋ ተናጋሪ የሆኑ ሁለት ሚሊዮን ገደማ ሰዎች አሉ።

በኪኮንጎ ቋንቋ የተዘጋጀው አዲስ ዓለም ትርጉም የይሖዋን ሕዝቦች ቃሉን በሙሉ ልባቸው እንዲጠብቁ እንደሚረዳቸው እርግጠኞች ነን።—መዝሙር 119:34