ከኅዳር 13 እስከ 15, 2021 ባለው ጊዜ ውስጥ በምዕራብ ካናዳ በሚገኙ የብሪቲሽ ኮሎምቢያ አካባቢዎች ከባድ ዝናብ ጥሏል። ሃያ አካባቢዎች እስካሁን ድረስ ታይቶ የማያውቅ ከፍተኛ ዕለታዊ ዝናብ ያስመዘገቡ ሲሆን በአንዳንዶቹ አካባቢዎች በሦስቱ ቀናት ውስጥ ብቻ ከ250 ሚሊሜትር በላይ ዝናብ ጥሏል። ዝናቡ ያስከተለው ጎርፍና የመሬት መንሸራተት መንገዶች እንዲዘጉ፣ ሰዎች ከመኖሪያቸው እንዲፈናቀሉና መንገደኞች ወዳሰቡበት ቦታ እንዳይደርሱ ምክንያት ሆነዋል።

• ከወንድሞቻችን መካከል የአካል ጉዳት የደረሰበት የለም

• 144 አስፋፊዎች መኖሪያቸውን ለቀው ለመውጣት ተገደዋል

• ቢያንስ 35 ቤቶች ጉዳት ደርሶባቸዋል

• የካናዳ ቅርንጫፍ ቢሮ የአደጋ ጊዜ እርዳታ አስተባባሪ ኮሚቴ አቋቁሟል

• ከመኖሪያቸው የተፈናቀሉት ወንድሞችና እህቶች ከአደጋው ቀጠና ውጭ ባሉ አካባቢዎች የሚኖሩ ዘመዶቻቸውና ሌሎች የይሖዋ ምሥክሮች ጋ በመሄድ ጊዜያዊ መጠለያ አግኝተዋል

• የወረዳ የበላይ ተመልካቾችና የጉባኤ ሽማግሌዎች አደጋው በደረሰበት አካባቢ ያሉ ቤተሰቦችን እያጽናኑ ነው

• የአደጋ ጊዜ እርዳታ አስተባባሪ ኮሚቴው ከአካባቢ ንድፍና ግንባታ ቡድን ጋር በመተባበር ባለሥልጣናቱ ፈቃድ ወደሰጡባቸው አካባቢዎች በመሄድ በቤቶች ላይ የደረሰውን ጉዳትና ቤቶቹን ለማደስ መደረግ ያለበትን ነገር እየገመገመ ነው

• የእርዳታ እንቅስቃሴው በሙሉ የሚካሄደው ከኮቪድ-19 ጋር በተያያዘ የወጡትን የደህንነት ደንቦች ባገናዘበ መልኩ ነው

አደጋው በደረሰበት አካባቢ ካሉት የይሖዋ ምሥክር ቤተሰቦች መካከል አብዛኞቹ ከሦስት ወራት በፊት ማለትም ነሐሴ 2021 ከቁጥጥር ውጭ በሆነ ሰደድ እሳት ምክንያት ቤታቸውን ለቀው እንዲወጡ ታዘው ነበር። ከባድ የአየር ሁኔታዎችና የተፈጥሮ አደጋዎች ከዕለት ወደ ዕለት እየጨመሩ ባሉበት በዛሬው ጊዜ የይሖዋ ሕዝቦች የአደጋ ጊዜ ሻንጣና ምግብ እንዲያዘጋጁ የተሰጣቸውን መመሪያ ተግባራዊ በማድረጋቸው ጥቅም እያገኙ ነው።

አደጋዎች የሚከሰቱበት ፍጥነትም ሆነ የሚያስከትሉት ጉዳት ከጊዜ ወደ ጊዜ እየጨመረ ቢሄድም በይሖዋ የማዳን ኃይል ላይ ያለን እምነት ፈጽሞ አይናወጥም።—ዕንባቆም 3:17, 18