በኑናቩት፣ ካናዳ በምትገኘው የኢካሉዊት ከተማ አዲስ የተገነባ የስብሰባ አዳራሽ ግንቦት 20, 2023 ለይሖዋ አገልግሎት ተወስኗል፤ የበላይ አካል አባል የሆነው ወንድም ማርክ ሳንደርሰን የውሰና ንግግር አቅርቧል። በውሰና ፕሮግራሙ ላይ 44 ሰዎች በአካል የተገኙ ሲሆን ሌሎች 388 ሰዎች ደግሞ ፕሮግራሙን በቪዲዮ ኮንፈረንስ ተከታትለዋል። ኑናቩት 1,837,000 ካሬ ኪሎ ሜትር ስፋት ያለው ሲሆን የነዋሪዎቹ ብዛት ከ40,000 አይበልጥም፤ ይህም በሰፊ መሬት ላይ በጣም ጥቂት ሰዎች ተበታትነው ከሚኖሩባቸው የምድራችን ክፍሎች መካከል አንዱ ያደርገዋል። ከዚህ በፊት በ​jw.org ላይ እንደተገለጸው ወንድሞቻችን የመሰብሰቢያ አዳራሽ ለመገንባት ለየት ያሉ ፈተናዎችን መወጣት አስፈልጓቸዋል። እውነትን ወደዚህ አካባቢ ያስተዋወቁት ደፋር ወንድሞች አስቸጋሪ የአየር ሁኔታዎችንና ወጣ ገባውን መልክዓ ምድር መቋቋም ነበረባቸው። እነዚህ ወንድሞች የተዉት የጽናት ምሳሌ በውሰና ፕሮግራሙ ላይ ተወስቷል።

በ1976 እህት ማርጋሬት ጋሊ ከሞንትሪያል፣ ኩዊቤክ ተነስታ 2,052 ኪሎ ሜትሮችን በመጓዝ ኑናቩት ውስጥ አሁን ኢካሉዊት ተብሎ ወደሚጠራው ቦታ ሄደች። በዚያ ሰፊና ጠፍ አገር የሰበከች የመጀመሪያዋ የይሖዋ ምሥክር እሷ ናት። በኋላ ላይ በዚያው ዓመት ወንድም ሃንስ ፒንታር የተባለ የወረዳ የበላይ ተመልካችና ሚስቱ ሚኔርቫ እህት ጋሊን ለማበረታታትና አብረዋት ለማገልገል ለአንድ ሳምንት የቆየ ልዩ ጉብኝት አድርገውላታል።

ቆየት ብሎም በ1983 ቀናተኛ ምሥክሮችን ያቀፈ አንድ አነስተኛ ቡድን ወደ ኢካሉዊት ተጓዘ። በስብከቱ ሥራ ላይ በትብብር ያደረጉት ጥረት ተሳክቶ ለመጀመሪያ ጊዜ የአካባቢው ነዋሪ የሆኑ የአንድ ቤተሰብ አባላት ሊጠመቁ ችለዋል። በቀጣዮቹ 20 ዓመታት ደፋር የመንግሥቱ አዋጅ ነጋሪዎች ወደዚህ ገለልተኛ አካባቢ በተደጋጋሚ ጉዞ በማድረግ ምሥራቹን ለሌሎች አካፍለዋል። በ2008 በኢካሉዊት አንድ ቡድን ተቋቋመ። በ2010 ይህ ቡድን ወደ ጉባኤ አድጎ በአንድ የትምህርት ቤት የስፖርት ማዘውተሪያ ውስጥ መሰብሰብ ጀመረ። ወንድሞችና እህቶች ጥቅምት 2022 አዲስ በተገነባላቸው የስብሰባ አዳራሽ መሰብሰብ ሲጀምሩ እጅግ ተደሰቱ።

ልዩ አቅኚዎች ከሌሎች አስፋፊዎች ጋር በመሆን ከኢካሉዊት በተጨማሪ በመላው ኑናቩት በሚገኙ ገለልተኛ ክልሎች ውስጥ ሰብከዋል። ወንድም ጆወል ቴርየ እና ባለቤቱ ሸሪል ከእነዚህ ሰባኪዎች መካከል ይገኙበታል። ከኢካሉዊት በስተ ምዕራብ 1,329 ኪሎ ሜትሮች ርቆ ወደሚገኘው ወደ ቤከር ሌክ ተዛውረው መስበክ ጀመሩ። ወንድም ጆወል ሁኔታውን ሲያስታውስ እንዲህ ይላል፦ “ብርዱ፣ ከሰዎች ርቆ መኖሩና የጠየቀብን ወጪ እንዳለ ሆኖ የከፈልነው መሥዋዕትነት ግን ክሶናል። የቤከር ሌክ ነዋሪዎች የሰጡት ምላሽ ይሖዋ እንደባረከን የሚያሳይና ልብን በደስታ የሚያሞቅ ነበር። በዚያ ለሚኖሩ ሰዎች የመጽሐፍ ቅዱስን መልእክት የማካፈል አጋጣሚ በማግኘታችን አመስጋኞች ነን።”

ጆሴፍ ኡታትናክ የቤከር ሌክ ነዋሪ ነው፤ ለመንግሥቱ ምሥራችም አዎንታዊ ምላሽ ሰጥቷል። ከወንድም ጆወል ጋር መጽሐፍ ቅዱስን ለማጥናት የተስማማ ሲሆን በ2021 ተጠምቋል። በአሁን ወቅት በቤከር ሌክ የሚኖረው አስፋፊ ወንድም ጆሴፍ ብቻ ነው። ግንቦት 2023 በኢካሉዊት የስብሰባ አዳራሽ ውሰና ፕሮግራም እንደሚደረግ ሲሰማ በዝግጅቱ ላይ ለመገኘት ከፍተኛ ጥረት አድርጓል። ከተጠመቀ ወዲህ ከወንድሞችና ከእህቶች ጋር በአካል በስብሰባ አዳራሽ ውስጥ ሲሰበሰብ ይህ የመጀመሪያው ነበር። እንዲህ ብሏል፦ “የስብሰባ አዳራሹ ተጠናቅቆ ሳየው በጣም ነው የተገረምኩት። በግንባታ ሥራው ከተካፈሉት መካከል ብዙዎቹ የአካባቢው ነዋሪዎች አልነበሩም፤ የአየር ጠባዩንም ሆነ የአካባቢውን ሁኔታ አያውቁትም። ይህን ለማድረግ ያነሳሳቸው ለይሖዋና ለሌሎች ያላቸው ፍቅር እንደሆነ በግልጽ ይታይ ነበር።”

በአሁኑ ወቅት በካናዳ ሰሜናዊ ክልሎች ውስጥ 178 ወንድሞችና እህቶችን ያቀፉ አራት ጉባኤዎች አሉ፤ በኑናቩት አንድ ጉባኤ፣ በሰሜን ምዕራባዊ ክልሎች ሁለት ጉባኤዎች እና በዩኮን አንድ ጉባኤ ይገኛሉ። እነዚህ ክልሎች ከካናዳ የመሬት ስፋት ውስጥ ወደ 40 በመቶ የሚጠጋውን ይሸፍናሉ። በካናዳ ሰሜናዊ ጫፍ ከባድ ቅዝቃዜ ያለ ሲሆን መልክዓ ምድሩም አባጣ ጎርባጣ ነው፤ ይህም በዚህ ገለልተኛ ክልል ውስጥ የሚኖሩ ሰዎችን ማግኘት ከባድ እንዲሆን ያደርጋል። በእርግጥም በዚህ ርቆ በሚገኝ ክልል ምሥራቹን ለመስበክ ራሳቸውን ያቀረቡት ወንድሞችና እህቶች የሚያደርጉት ጥረት የሚደነቅ ነው።—የሐዋርያት ሥራ 1:8