ግንቦት 9, 2022
ዓለም አቀፋዊ ዜና

ወቅታዊ መረጃ—ወንድሞች ታሰሩ | በክራይሚያ ያሉ ቤተሰቦች በይሖዋ እርዳታ ጸንተዋል

አጫውት

ጥቅምት 6, 2022 በሴቫስቶፖል የሚገኘው የናኪሞቭስኪ አውራጃ ፍርድ ቤት በወንድም ቭላድሚር ማላዲካ፣ በወንድም ቭላድሚር ሳካዳ እና በወንድም ዬቭጌኒ ዡኮቭ ላይ ብይን አስተላልፏል። እያንዳንዳቸው የስድስት ዓመት እስራት ተፈርዶባቸዋል። ወዲያውኑ ወህኒ ወርደዋል።

የክሱ ሂደት

ጥቅምት 1, 2020

የፊዴራል ደህንነት አባላት የወንድም ማላዲካ የወንድም ሳካዳ እና የወንድም ዡኮቭ ቤት ጨምሮ በሴቫስቶፖል የሚኖሩ ዘጠኝ የይሖዋ ምሥክር ቤተሰቦችን ቤቶች ፈተሹ። የወንድም ማላዲካ ቤት በተፈተሸበት ወቅት ፖሊሶቹ በአንድ ትንሽ ዕቃ ውስጥ ዱቄት ወተት አገኙ። ፖሊሶቹ ዱቄቱ “አደንዛዥ ዕፅ” እንደሚመስል በመናገር ወንድም ማላዲካን እና ባለቤቱን ናታሊያን ለምርመራ ወደ አእምሮ ሐኪም ቤት ላኳቸው። ናታሊያ በዚያው ዕለት ተለቀቀች። ወንድም ማላዲካ እንዲሁም ወንድም ሳካዳ እና ወንድም ዡኮቭ ግን ወደ ጊዜያዊ ማቆያ ተወሰዱ። በቀጣዩ ቀን ወደ ማረፊያ ቤት ተላኩ
መጋቢት 23, 2021

ወንድም ሳካዳ ከማረፊያ ቤት ተለቆ በቁም እስር እንዲቆይ ተደረገ። የእንቅስቃሴ መቆጣጠሪያ መሣሪያ እንዲያደርግ የተገደደ ከመሆኑም ሌላ ኢንተርኔት እንዳይጠቀም፣ ስልክ እንዳይደውል እንዲሁም በክሱ ውስጥ ከተካተቱት ሌሎች ወንድሞች ጋር እንዳይነጋገር ተከለከለ
መጋቢት 30, 2021

ወንድም ማላዲካ ከማረፊያ ቤት ተለቆ በቁም እስር እንዲቆይ ተደረገ
ግንቦት 17, 2021

ወንድም ዡኮቭ ከሰባት ወር በላይ በማረፊያ ቤት ከቆየ በኋላ ተለቆ በቁም እስር እንዲቆይ ተደረገ
መስከረም 30, 2021

ጉዳያቸው በፍርድ ቤት መታየት ጀመረ

አጭር መግለጫ

ቭላድሚር ማላዲካ

የትውልድ ዘመን፦ 1963 (ዬናኪዬቮ፣ ዩክሬን)

ግለ ታሪክ፦ ለበርካታ ዓመታት የአውሮፕላን ቴክኒሽያንና ሜካኒክ ሆኖ ሠርቷል። በ1986 ከናታሊያ ጋር ትዳር መሠረተ

ቤተሰቦቹ የተለያየ ችግር ካጋጠማቸው በኋላ አምላክን መፈለግ ጀመረ። ታናሽ ወንድሙ ከይሖዋ ምሥክሮች ጋር አስተዋወቀው። በ1997 ከናታሊያ ጋር አብሮ ተጠመቀ

የሰጠው ሐሳብ

ይሖዋ በወንድሞችና በእህቶች አማካኝነት ቤተሰብህን የደገፈው እንዴት ነው?

ማረፊያ ቤት በነበርኩበት ወቅት ወንድሞችና እህቶች ለባለቤቴ ቁሳዊ፣ ስሜታዊና መንፈሳዊ ድጋፍ ሰጥተዋታል። ብዙ ጊዜ ስልክ በመደወል እንዲሁም የጽሑፍ መልእክትና ካርድ በመላክ ይጠይቋት ነበር። አንዳንዶች ደግሞ በአካል ሄደው ያበረታቷት ነበር።

ብዙዎቹ የጉባኤው ወንድሞችና እህቶች በማንኛውም መንገድ እኛን መርዳት መቻላቸውን እንደ መብት ይቆጥሩት ነበር። ሁሉም ተረባርበው ረድተውናል፤ “እጅ ለእጅ ተያይዘው” ደግፈውናል።—ሶፎንያስ 3:9

ቭላድሚር ሳካዳ

የትውልድ ዘመን፦ 1970 (ኪዬቭ፣ ዩክሬን)

ግለ ታሪክ፦ ከባድ ማሽን የማንቀሳቀስ ሥልጠና የወሰደ ሲሆን በጦር ሠራዊት ውስጥ አገልግሏል። በግንባታ ሙያ ተሰማርቷል። በ2005 ከስቬትላና ጋር ትዳር መሠረተ

በልጅነቱ አምላክ የለሽ ነበር። ጓደኛው የአምላክን ስም ካሳየው በኋላ ስለ መጽሐፍ ቅዱስ ለማወቅ ፍላጎት አደረበት። በአምላክ ቃል ውስጥ ያለው ጥበብ የሚንጸባረቅበት ምክር በጣም ጠቃሚ መሆኑን አስተዋለ። በ1991 ተጠመቀ

የሰጠው ሐሳብ

አንተና ባለቤትህ ጥሩ መንፈሳዊ ልማድ የመያዝን አስፈላጊነት በተመለከተ ምን ተገንዝባችኋል?

መንፈሳዊ እንቅስቃሴዎቻችን እርስ በርስ የተያያዙ ናቸው። እንደ አንድ “የጡንቻ ቡድን” አብረው ይሠራሉ። ለስብሰባዎች በመዘጋጀትና በስብሰባ ላይ በመገኘት፣ በአገልግሎት በመካፈል፣ በየዕለቱ በመጸለይና መጽሐፍ ቅዱስን በማጥናት እንዲሁም ከወንድሞቻችንና ከእህቶቻችን ጋር ጊዜ በማሳለፍ እነዚህን ጡንቻዎች ማሠራት እንችላለን። . . . በእንቅስቃሴዎቻችን ላይ እገዳ ቢጣልም ጥሩ መንፈሳዊ አቋም ለመያዝ የሚያስችሉ መንገዶችን እንፈልጋለን።

ዬቭጌኒ ዡኮቭ

የትውልድ ዘመን፦ 1969 (ሴቫስቶፖል፣ ክራይሚያ)

ግለ ታሪክ፦ የተወለደው ትልቅ ቤተሰብ ውስጥ ነው። ዬቭጌኒ 14 ዓመቱ እያለ አባቱ ሞተ

በልጅነቱ በሙዚቃ ትምህርት ቤት ውስጥ ፒያኖ ተምሯል። የቧንቧ ሥራ ሥልጠና የወሰደ ሲሆን በኋላም በፋብሪካ ውስጥ ሠርቷል

በጦር ሠራዊት ውስጥ ካገለገለ በኋላ ስለ ሕይወት ትርጉም ማሰብ ጀመረ። እናቱ ከመጽሐፍ ቅዱስ ጋር አስተዋወቀችው፤ ከዚያም ከመጽሐፍ ቅዱስ ለጥያቄዎቹ አጥጋቢ መልስ አገኘ። በ1997 ተጠመቀ

የሰጠው ሐሳብ

በማረፊያ ቤት በነበርክበት ወቅት ይሖዋ የረዳህ እንዴት ነው?

[በ2021 የጸደይ ወቅት ላይ] የመታሰቢያውን በዓል ማክበር መቻሌን ተጠራጥሬ ነበር። ከጉባኤው ተለይቼ የመታሰቢያውን በዓል ሳከብር የመጀመሪያዬ ነበር። ስለዚህ ጸለይኩ፤ ይሖዋም ብርታትና ጥበብ በመስጠት ጸሎቴን መለሰልኝ። በይሖዋ እርዳታ፣ አብረውኝ ለታሰሩት ሁለት ሰዎች የመታሰቢያውን በዓል ንግግር መስጠት ቻልኩ። ይህም ለእነሱ ጥሩ ምሥክርነት ሰጥቷቸዋል።

ይሖዋ እነዚህን ወንድሞች ጨምሮ በክራይሚያ ስደት እየደረሰባቸው ያሉትን ሁሉ ልባቸውን እንደሚያጸናላቸው እርግጠኞች ነን።—1 ተሰሎንቄ 3:12, 13