ታኅሣሥ 8, 2022
ዓለም አቀፋዊ ዜና

ወንድም ዱቦቬንኮ እና ሊትቪንዩክ የስድስት ዓመት እስራት ተፈረደባቸው

አጫውት

ኅዳር 30, 2022 በክራይሚያ ሪፑብሊክ የሚገኘው የአርምያንስኪ ከተማ ፍርድ ቤት፣ በወንድም አሌክሳንደር ዱቦቬንኮ እና አሌክሳንደር ሊትቪንዩክ ላይ የጥፋተኝነት ብይን አስተላልፏል። ሁለቱም ወንድሞች የስድስት ዓመት እስራት ተፈርዶባቸው ወዲያውኑ ወደ ወህኒ ቤት ተወስደዋል።

አጭር መግለጫ

አሌክሳንደር ዱቦቬንኮ

የትውልድ ዘመን፦ 1973 (ኦቻኮቭ፣ ዩክሬን)

ግለ ታሪክ፦ በያጅ፣ የኤሌክትሪክ ባለሙያና አናጺ ሆኖ ሠርቷል። በ1999 ከኢሪና ጋር ተጋቡ

መጀመሪያ የይሖዋ ምሥክር የሆነችው እናቱ ናት፤ እውነትን ያስተዋወቀችው እሷ ነች። ምድር ገነት እንደምትሆን የሚገልጸው የመጽሐፍ ቅዱስ ተስፋ በጣም አስደሰተው። በ1999 ተጠመቀ

የሰጠው ሐሳብ a

ቁም እስር ላይ በነበርክበት ወቅት እንድትጸና የረዳህ ምንድን ነው?

ቁም እስር ላይ በነበርኩባቸው ከ13 የሚበልጡ ወራት ከመርማሪዎቹና ከጠበቆቼ ሌላ ከማንም የውጭ ሰው ጋር መነጋገር ተከልክዬ ነበር። አሁንም እንኳ በክሴ ላይ ምሥክር ሆነው የሚቀርቡ ወንድሞችንና እህቶችን ማነጋገር አልችልም። ይሁንና በኤልያስ ምሳሌ ላይ ማሰላሰሌ ጠቅሞኛል። ኤልያስ ብቻውን ምድረ በዳ ላይ ሳለ ተጨንቆ ነበር። ይሖዋ ኤልያስን አበረታቶታል፤ ብቻውን እንዳልሆነም ዋስትና ሰጥቶታል። ይሖዋ ኤልያስን አልተወውም፤ እኔንም ፈጽሞ እንደማይተወኝ እርግጠኛ ነኝ።

አሌክሳንደር ሊትቪንዩክ

የትውልድ ዘመን፦ 1960 (አማንጄልዲ፣ ካዛክስታን)

ግለ ታሪክ፦ በኬሚካል ፋብሪካ ውስጥ ሠርቷል፤ በያጅም ነበር። በ1979 ከናዴዥዳ ጋር ተጋቡ። አንድ ወንድ ልጅ አላቸው

አምላክ መከራንና ክፋትን ያላጠፋበት ምክንያት ያሳስበው ነበር። እሱና ናዴዥዳ ከይሖዋ ምሥክሮች ጋር መጽሐፍ ቅዱስ ማጥናት ሲጀምሩ መልሱን አገኘ። በ1993 ተጠመቀ

የሰጠው ሐሳብ b

ራስህን ለስደት ያዘጋጀኸው እንዴት ነው?

በወንድሞቼና በእህቶቼ ላይ የሚደርሰውን ነገር ስሰማ ‘እኔስ ለስደት ዝግጁ ነኝ?’ ብዬ ማሰብ ጀመርኩ። በበቂ ሁኔታ ዝግጁ እንዳልሆንኩ ተሰማኝ። ስለዚህ መከራን በጽናት ስላሳለፉ ሰዎች የሚገልጹ የመጽሐፍ ቅዱስ ዘገባዎችን ማንበብና ማሰላሰል ጀመርኩ። ይበልጥ ያተኮርኩት በጽናታቸውና በይሖዋ ላይ ባላቸው እምነት ላይ ነው። ዘገባዎቹ ይበልጥ ሕያው እንዲሆኑልኝ ለማድረግ ስል ምርምር አደረግኩ። ከዚህም በተጨማሪ በዘመናችን ያሉትን ታማኝ ወንድሞችና እህቶች የሕይወት ታሪክ ከባለቤቴ ጋር ከለስን። ይህም እምነታችንን አጠናክሮታል፤ ከፊታችን ለሚጠብቀን ነገርም ይበልጥ አዘጋጅቶናል።

ሌሎች ለአንተ የሚያቀርቡት ጸሎት እንደረዳህ ይሰማሃል?

ወንድሞችና እህቶች ስለ እኔ ምን ያህል አጥብቀው እንደሚጸልዩ ስሰማ እንባዬ ድቅን ይላል። እንድረጋጋ፣ ደፋር እንድሆንና እንድበረታ ይጸልዩልኛል። ሁልጊዜ ፍርድ ቤት ከመቅረቤ በፊት፣ ከችሎት ውሎዬ ጋር በተያያዘ በዕለቱ ምን ብዬ እንደለመንኩ የሚጠይቀኝ አንድ ወንድም አለ። ከዚያም ከፍርድ ቤቱ ውጭ ሆኖ እነዚያኑ ጉዳዮች ጠቅሶ ይጸልይልኛል። ይህ በጣም ነው ልቤን የሚነካው!

በፈተና ውስጥ ስናልፍ የትም እንሁን የት ይሖዋ ከጎናችን እንደሆነ ማወቃችን በጣም ያጽናናል።—መዝሙር 139:7-12

የክሱ ሂደት

ነሐሴ 2, 2021

የወንጀል ክስ ተመሠረተባቸው። ሁለቱም ወንድሞች፣ የጽንፈኛ ድርጅትን እንቅስቃሴ ለማራመድ የቪዲዮ ኮንፈረንስ ፕሮግራም ተጠቅማችኋል ተብለው ተከሰሱ
ነሐሴ 5, 2021

የሁለቱን ወንድሞች ጨምሮ በስምንት የይሖዋ ምሥክሮች ቤተሰቦች መኖሪያ ላይ ፍተሻ ተካሄደ። ወንድም ሊትቪንዩክ ተይዞ ወደ ጣቢያ ተወሰደ
ነሐሴ 6, 2021

ወንድም ሊትቪንዩክ ከጣቢያ ተለቅቆ የቁም እስረኛ ተደረገ
ነሐሴ 9, 2021

ፖሊሶች የአሌክሳንደር ዱቦቬንኮን መኖሪያ ቤት ለሁለተኛ ጊዜ ፈተሹ። አሌክሳንደር ምርመራ ከተደረገበት በኋላ የቁም እስረኛ ተደረገ
ነሐሴ 11, 2021

ወንድም ሊትቪንዩክ፣ የጽንፈኛ ድርጅትን እንቅስቃሴ አስተባብረሃል በሚል በይፋ ክስ ተመሠረተበት
የካቲት 8, 2022

ወንድም ዱቦቬንኮ፣ የጽንፈኛ ድርጅትን እንቅስቃሴ አስተባብረሃል በሚል በይፋ ክስ ተመሠረተበት
ሚያዝያ 29, 2022

ክሳቸው በፍርድ ቤት መታየት ጀመረ። ወንድም ሊትቪንዩክ የቁም እስር ላይ በነበረበት ወቅት ሐኪም ጋር ለመሄድ ያቀረበውን ጥያቄ ዳኛው ውድቅ አደረጉ
መስከረም 8, 2022

ሁለቱም ወንድሞች ከጠዋቱ 1:00 እስከ ምሽቱ 1:00 ከቤታቸው ውጭ መንቀሳቀስ ተፈቀደላቸው
ኅዳር 30, 2022

ሁለቱም ወንድሞች የስድስት ዓመት እስራት ተፈረደባቸው