ከሦስት ዓመት ቆይታ በኋላ ጥር 2023 በዓለም ዙሪያ የወረዳ ስብሰባዎችን በአካል ማድረግ ጀምረናል። በብዙ አገሮች ደግሞ ቲኦክራሲያዊ ትምህርት ቤቶች በአካል መደረግ ጀምረዋል። ይሖዋ እነዚህን ልዩ ፕሮግራሞች እየባረከ እንዳለ በግልጽ ማየት ይቻላል።

በሜክሲኮ፣ የታባስኮ ግዛት በሚገኘው በቪዬርሞሳ ከተማ የወረዳ ስብሰባ እንዲካሄድ ታቅዶ ነበር፤ የስብሰባ አዳራሹን ለማጽዳት 200 ገደማ አስፋፊዎች በቦታው ተገኝተዋል። አንዳንዶቹ እዚያ የደረሱት እስከ ስድስት ሰዓት ተጉዘው ነው። አንዲት እህት እንዲህ ብላለች፦ “ከወንድሞችና እህቶች ጋር እንዲህ አንድ ላይ በብዛት ከተሰበሰብን ስንት ጊዜያችን ነው። ስለዚህ ይህ አጋጣሚ እንዲያመልጠን አልፈለግንም።”

ዩናይትድ ስቴትስ ውስጥ ክራውንስቪል፣ ሜሪላንድ በተካሄደ የወረዳ ስብሰባ ላይ የተገኘች አንዲት እህት እንዲህ ስትል ስሜቷን ገልጻለች፦ “ደስታዬ ወሰን የለውም። እዚህ ከደረስኩበት ሰዓት አንስቶ እያለቀስኩ ነው። ገና ፕሮግራሙ ሳይጀምር የያዝኩትን ሶፍት ሁሉ ጨርሻለሁ። ምንም ቢመጣ ይህ ስብሰባ እንዲያመልጠኝ አልፈለግኩም።”

በበርካታ ቅርንጫፍ ቢሮ ክልሎች፣ የመንግሥቱ ወንጌላውያን ትምህርት ቤት እንዲሁም ለወረዳ የበላይ ተመልካቾችና ለሚስቶቻቸው የተዘጋጀ ትምህርት ቤት በአካል በመጀመሩ ተማሪዎች ተደስተዋል። ዩናይትድ ስቴትስ ውስጥ ፓልም ኮስት፣ ፍሎሪዳ በሚገኘው ትምህርት ቤት አስተማሪ የሆነው ወንድም ጆቫኒ ካቤሳስ እንዲህ ብሏል፦ “ቲኦክራሲያዊ ትምህርት ቤት ዳግመኛ በአካል እንደሚጀመር ስሰማ በጣም ነው የተደሰትኩት! በሙሉ አእምሯቸውና በሙሉ ነፍሳቸው የይሖዋን ፈቃድ ለማድረግ እየተጉ ላሉት አስተማሪዎች፣ ተማሪዎችና ፈቃደኛ ሠራተኞች ምቹ ሁኔታ ይፈጥራል።”

እህት ሳቶኮ ናካታ እና ባለቤቷ ጥር 2023 ለወረዳ የበላይ ተመልካቾችና ለሚስቶቻቸው በተዘጋጀ ትምህርት ቤት ላይ ተካፍለዋል። እህት እንዲህ ብላለች፦ “በወረርሽኙ ወቅት ስብሰባዎችና የአቅኚነት አገልግሎት ትምህርት ቤቶች በዙምም ቢሆን መቀጠላቸው ደስ የሚል ነገር ነው። ያም ሆኖ በነፃነት ማውራት እንዲሁም የወንድሞችና እህቶችን ሳቅና መዝሙር መስማት ናፍቆን ነበር። በአካል በተደረገው በዚህ ትምህርት ቤት ላይ ስካፈል ይሖዋ ልዩ ስጦታ እንደሰጠኝ ነው የተሰማኝ። ከተማሪዎቹ ጋር እየተጨዋወትንና እየሳቅን ያሳለፍነው ጊዜ ደስ የሚል ነበር፤ አብረን ዘምረናል፤ አብረን ያለቀስንበት ጊዜም ነበር። ይሖዋና የበላይ አካሉ ላደረጉልን ነገር በጣም አመስጋኝ ነኝ።”

ይሖዋ፣ አገልጋዮቹ ለአምልኮና ለመለኮታዊ ትምህርት እንዲህ ተሰባስበው ሲያይ ምንኛ ይደሰት ይሆን! ንጉሥ ዳዊት የሁላችንንም ስሜት እንዲህ ሲል ግሩም አድርጎ ገልጾታል፦ “በታላቅ ጉባኤ መካከል አመሰግንሃለሁ፤ በብዙ ሕዝብ መካከል አወድስሃለሁ።”—መዝሙር 35:18