መጋቢት 21, 2023
ዓለም አቀፋዊ ዜና

JW.ORG አሥር ዓመት አስቆጠረ—ክፍል 3

ለአገልግሎቱ ድጋፍ ማድረግ

አጫውት

ከዚህ በፊት በዚህ ዓምድ ሥር በወጡት ርዕሶች ላይ jw.org በዲጂታል ፎርማት የተዘጋጁ ጽሑፎቻችንን እና ቪዲዮዎቻችንን ለሰዎች ለማድረስ እንዲሁም በዓለም ዙሪያ ስላለው የወንድማማች ማኅበራችን አስተማማኝ የዜና ዘገባ ለማቅረብ ያገለገለው እንዴት እንደሆነ ተገልጿል። ይህ የመጨረሻው ርዕስ ደግሞ jw.org ዓለም አቀፉን የስብከት ሥራ ለመደገፍ ያስቻለው እንዴት እንደሆነ ያብራራል።

ቋንቋዎች፦ በአዲስ መልክ የቀረበው ድረ ገጽ ነሐሴ 2012 ለሕዝብ ሲለቀቅ፣ መነሻ ገጹ የሚገኘው በ139 ቋንቋዎች ነበር። ነሐሴ 2014 ላይ ማለትም ድረ ገጹን በዘመቻ መልክ ለማስተዋወቅ ተብሎ የተዘጋጀው ትራክት በወጣበት ጊዜ፣ የቋንቋዎቹ ቁጥር ጨምሮ ከ500 በላይ ሆነ። የሚገርመው ይህ ቁጥር 22 የምልክት ቋንቋዎችን ያካተተ ነበር። ዛሬ ድረ ገጹ ላይ የሚወጡ የተለያዩ መረጃዎች፣ ከ100 የሚበልጡ የምልክት ቋንቋዎችን ጨምሮ ከ1,070 በሚበልጡ ቋንቋዎች ይገኛሉ።

ወቅታዊ ርዕሶች፦ ከጥቅምት 2019 አንስቶ የjw.org መነሻ ገጽ በአዲስ መልክ ተዋቀረ፤ መነሻ ገጹ በትልቁ የተጻፈና ትኩረት የሚስብ ምስል የያዘ ዋና ርዕስ፣ ከዚያ በታች ደግሞ ሦስት የተለያዩ ርዕሶችን ማስተዋወቅ ጀመረ። ይህ ገጽታ ከአገልግሎት ጋር የተያያዙ ርዕሰ ጉዳዮችን ለማስተዋወቅ ይበልጥ ውጤታማ ሆኗል። ከጊዜ በኋላ የጽሑፍ ዝግጅት ክፍልና የሥነ ጥበብ ክፍል፣ እነዚህን ዋና ርዕሶች ለማዘጋጀት እንዲሁም መነሻ ገጹ ላይ የሚወጡት ርዕሶች ለጊዜው ተስማሚ የሆኑና ወቅታዊ ጉዳዮችን የሚዳስሱ እንዲሆኑ ለማድረግ የሚያስችል ፈጣን አሠራር እንዲኖር አደረጉ። ለምሳሌ መነሻ ገጹ በዓለም ዙሪያ ስለተከሰተው የኮቪድ-19 ወረርሽኝ እንዲሁም በሩሲያና በዩክሬን መካከል ስላለው ጦርነት ብሎም ከዚያ ጋር ተያይዞ ስለመጣው የስደተኞች ቁጥር መጨመር የሚያስተዋውቁ ርዕሶችን ይዞ ወጥቷል።

የኢንተርኔት ሽፋን፦ jw.org ድረ ገጽ፣ ፍላጎት ያላቸው ሰዎች ስለ ድርጅታችንና ስለምናከናውነው ሥራ ኢንተርኔት ላይ ትክክለኛ መረጃ እንዲያገኙ ያስችላል። በተጨማሪም ሰዎች ይበልጥ ማወቅ ከፈለጉ ድረ ገጹን በመጠቀም ከይሖዋ ምሥክሮች ጋር መገናኘት ይችላሉ። አንዲት መስማት የተሳናት ሴት በአሥራዎቹ ዕድሜ ላይ ሳለች ከይሖዋ ምሥክሮች ጋር መጽሐፍ ቅዱስን ታጠና ነበር፤ ሆኖም አካባቢ ስትቀይር ከእነሱ ጋር የነበራት ግንኙነት ተቋረጠ። ጥናቷን መቀጠል ብትፈልግም የይሖዋ ምሥክሮችን ማግኘት አልቻለችም። ከዚያ ግን jw.org ድረ ገጽ ትዝ አላት፤ በመሆኑም ኢንተርኔት ላይ የሚገኘውን ቅጽ ተጠቅማ የይሖዋ ምሥክሮች መጥተው እንዲያነጋግሯት ጠየቀች። ከጥቂት ቀናት በኋላ ሁለት ልዩ አቅኚዎች በሯን አንኳኩ። ይህች ሴት ጥናቷን የቀጠለች ከመሆኑም በላይ በስብሰባዎች ላይ መገኘት ጀመረች። አሁን የተጠመቀች ሲሆን ሦስት ልጆቿን ስለ ይሖዋ እያስተማረች ነው። እንዲህ ብላለች፦ “ለዚህ ድረ ገጽ ይሖዋን አመሰግነዋለሁ፤ ምክንያቱም ኢንተርኔት ላይ ያለውን ቅጽ ባልሞላ ኖሮ በአጋጣሚ አንድን የይሖዋ ምሥክር የማገኝበትን ጊዜ ከመጠባበቅ ውጭ ምንም አማራጭ አይኖረኝም ነበር።”

የስብከቱ ሥራ በፍጥነት ማደጉን በቀጠለ ቁጥር የይሖዋ ድርጅትም ይህን እድገት ለማስተናገድ የሚያስችሉ ውጤታማ መሣሪያዎችን ከሥር ከሥር ማቅረቡን እንደሚቀጥል ማወቅ በጣም ያበረታታል።—ኢሳይያስ 60:22