ቀን፦ ከመስከረም 13-15, 2019

ቦታ፦ የኮሪያ ዓለም አቀፍ ኤግዚቢሽን ማዕከል፣ ሶል፣ ደቡብ ኮሪያ

ፕሮግራሙ የተካሄደበት ቋንቋ፦ ሩሲያኛ፣ ቻይንኛ ማንዳሪን፣ ኢንዶኔዥያኛ፣ እንግሊዝኛ፣ ኮሪያኛ፣ ቬትናምኛ

ከፍተኛ የተሰብሳቢዎች ቁጥር፦ 60,082

አጠቃላይ የተጠማቂዎች ቁጥር፦ 478

ከተለያዩ አገሮች የመጡ ልዑካን ብዛት፦ 6,076

የተጋበዙት ቅርንጫፍ ቢሮዎች፦ ማሌዥያ፣ ስካንዲኔቪያ፣ ብራዚል፣ ቼክ-ስሎቫክ፣ ኢንዶኔዥያ፣ ካዛክስታን፣ ዩናይትድ ስቴትስ፣ ግሪክ፣ ፈረንሳይ፣ ፊንላንድ፣ ቬትናም

ተሞክሮ፦ ለልዑካኑ ምግብ ያቀረበ አንድ ድርጅት ሥራ አስኪያጅ የሆነው ቾይ ጂ ዉንግ እንዲህ ብሏል፦ “አንዱ የድርጅታችን ሠራተኛ በዚህ ሥራ የተነሳ የይሖዋ ምሥክሮች ምን ያህል ደግ እንደሆኑ እንዳስተዋለ ነግሮናል። እኔን ይበልጥ ያስገረመኝ ደግሞ ከሌላ አገር የመጡትም ሆኑ ኮሪያውያን የይሖዋ ምሥክሮች ቀደም ሲል ባይተዋወቁም እንኳ አንዳቸው ለሌላው ፍቅር ማሳየታቸው ነው። የቅርብ ጓደኛሞች እንደገና የተገናኙ ይመስል ነበር። በበርካታ ሃይማኖታዊ ፕሮግራሞች ላይ የተሳተፍኩ ቢሆንም የይሖዋ ምሥክሮች ያዘጋጁትን ይህን ፕሮግራም ልዩ ሆኖ አግኝቼዋለሁ።”

የኡተም አስጎብኚ ኤጀንሲ የቦርድ አባል የሆነው አን ሶን ጁ እንዲህ ብሏል፦ “የይሖዋ ምሥክሮች ምን ያህል ደግ እንደሆኑና ምንጊዜም ፈገግታ እንደማይለያቸው ከተመለከትኩ በኋላ የእኛ ሠራተኞች የሆኑ የአውቶቡስ ሹፌሮች እንደ እነሱ እንዲሆኑ ለየት ያለ ማሳሰቢያ መስጠት እንደሚያስፈልግ ተሰማኝ። የይሖዋ ምሥክሮች እንዲህ ዓይነት ምግባር እንዲኖራቸው ያደረገውን ሚስጥር ለማወቅ ጓጉቼ ነበር፤ ሆኖም አብሬያቸው ስሠራ ከልባቸው እንደሚዋደዱና እንደሚከባበሩ እንዲሁም የሚያምኑበትን ነገር በተግባር እንደሚያውሉ ማስተዋል ቻልኩ። በሥራው የተካፈሉት የይሖዋ ምሥክሮች ሁሉ ያለምንም ክፍያ በፈቃደኝነት እንደሚሠሩ ሳውቅ ተገረምኩ። አንዳቸው ሌላውን በትኩረት እንደሚያዳምጡና ምንጊዜም በፈገግታ ምላሽ እንደሚሰጡ መመልከቴ እኔም ምን ለውጥ ማድረግ እንዳለብኝ እንዳስብ አድርጎኛል። የሚቻል ከሆነ ከይሖዋ ምሥክሮች ጋር በድጋሚ አብሬ ብሠራ ደስ ይለኛል።”

የኤምቢሲ ሙንህዋ ብሮድካስቲንግ ስቴሽን ዴጃንግም ፓርክ የሥራ አመራር ዳይሬክተር የሆነው ኪም ጊዮ ሺክ እንዲህ ሲል አስተያየቱን ሰጥቷል፦ “የይሖዋ ምሥክሮች ያዘጋጁት ይህ ፕሮግራም በጣም ደስ የሚል ነበር። የካቶሊክ እምነት ተከታይ ብሆንም እውነተኛ ክርስቲያኖች ምን ዓይነት ባሕርይ ሊኖራቸው እንደሚገባ በዝግጅቱ ላይ በደንብ አይቻለሁ። እኔም ሆንኩ የሥራ ባልደረቦቼ የይሖዋ ምሥክሮች ተባባሪና የተደራጁ መሆናቸውን አስተውለናል። ለሌሎች ደግነት ያሳዩ የነበረ ከመሆኑም ሌላ በግቢያችን ውስጥ ያለውን በጣም ትንሽ ነገር እንኳ ለመጠቀም ፈቃድ ይጠይቁ ነበር። እኔ ራሴ የይሖዋ ምሥክር የሆንኩ ያህል በጣም ኮርቼባቸዋለሁ።”