“የይሖዋን ስም የሚጠራ ሁሉ ይድናል።”—ሮም 10:13 አዲስ ዓለም ትርጉም

 “የጌታን ስም የሚጠራ ሁሉ ይድናል”—ሮም 10:13 የ1954 ትርጉም

 አምላክ አያዳላም፤ ደግሞም ብሔር፣ ጎሳ ወይም የኑሮ ደረጃ ሳይለይ ለሁሉም ሰዎች መዳን የሚችሉበትና የዘላለም ሕይወት የሚያገኙበት አጋጣሚ ከፍቷል። ሆኖም ይህን በረከት ለማግኘት ሁሉን ቻይ የሆነው አምላክ የግል መጠሪያ የሆነውን ይሖዋ የሚለውን ስም መጥራት ያስፈልጋል። a—መዝሙር 83:18

 በመጽሐፍ ቅዱስ ውስጥ ‘የይሖዋን ስም መጥራት’ የሚለው አገላለጽ የአምላክን ስም ከማወቅና በአምልኮ ወቅት ስሙን ከመጥራት ያለፈ ነገርን ያመለክታል። (መዝሙር 116:12-14) በአምላክ መታመንንና የእሱን እርዳታ መፈለግን ይጨምራል።—መዝሙር 20:7፤ 99:6

 ኢየሱስ ክርስቶስ ለአምላክ ስም ትልቅ ቦታ ይሰጥ ነበር። ባስተማረው የጸሎት ናሙና ላይ የጠቀሳቸው የመጀመሪያዎቹ ቃላት “በሰማያት የምትኖር አባታችን ሆይ፣ ስምህ ይቀደስ” የሚሉ ናቸው። (ማቴዎስ 6:9) በተጨማሪም ኢየሱስ የዘላለም ሕይወት ማግኘት ከፈለግን ስሙ የሚወክለውን አካል ማወቅ፣ መታዘዝና መውደድ እንዳለብን አስተምሯል።—ዮሐንስ 17:3, 6, 26

 የ1954 ትርጉም ሮም 10:13 ላይ “ጌታ” ብሎ የጠቀሰው አካል ይሖዋን እንደሚያመለክት እርግጠኞች መሆን የምንችለው ለምንድን ነው? ምክንያቱም ይህ ጥቅስ የተወሰደው ከኢዩኤል 2:32 ላይ ሲሆን እዚያ ላይ የመጀመሪያው የዕብራይስጥ ጽሑፍ “ጌታ” የሚለውን የማዕረግ ስም ሳይሆን የአምላክን ስም በቀጥታ ይጠቅሳል። b

 መጽሐፍ ቅዱስ በሮም ምዕራፍ 10 ላይ አንድ ሰው በአምላክ ፊት ተቀባይነት ማግኘቱ የተመካው በኢየሱስ ክርስቶስ በማመኑ ላይ እንደሆነ ይጠቁማል። (ሮም 10:9) ብሉይ ኪዳን ተብለው ከሚጠሩት መጻሕፍት የተወሰዱ በርካታ ጥቅሶች ይህን ሐሳብ ይደግፋሉ። አንድ ሰው እምነት እንዳለው የሚያሳየው የሚያምንበትን ነገር አማኝ ላልሆኑ ሰዎች ‘በይፋ በመናገር’ ነው፤ በይፋ ከሚናገራቸው ነገሮች መካከል ስለ መዳን የሚገልጸው ምሥራች ይገኝበታል። ይህም ሌሎች የዘላለም ሕይወት ለማግኘት የሚያስችላቸውን እምነት የሚያዳብሩበት አጋጣሚ እንዲያገኙ ያደርጋል።—ሮም 10:10, 14, 15, 17