Masieroday ko demak no Kawas ci Yihofa. (1 Korinto 14:33) O finawlan Ningra o mamasierod ko pilikakawa, hatiraay han? Ano mahaenay i, o kasakopang no Krisciyang samaanay a malikakawa hani? Sasamaan kita a micowat to karihaday no kasakopang hani?

1. O cima ko mikayatay to kasakopang no Krisciyang?

‘Ci Kristo o fafongohan no kasakopang.’ (Ifiso 5:​23) Itiniay cingra i kakarayan mikayat to demak no finawlan no Kawas i polong no hekal. Minilnilan ni Yis ko ‘madimadiay citanengay a koli’ midama to tayal ningra. Onini a ‘madimadiay citanengay a koli’ o kadofahay ko nalifetan a papina malohemay malitengay ko misakapotay, panganganan to Mikayatay a Malohemay Malitengay i Congpo hananay. (ˈOsien ko Matay 24:​45-​47.) O Mikayatay a Malohemay Malitengay i Congpo malecaday to saka 1 hahekalan itiniay i Yirusalim a tarokos ato malohemay malitengay, mihadak to sakayat to itiniay paro no kakarayan a kasakopang. (Dmak 15:2) Nikawrira, cowa ko ˈaˈideman no likakawa ita cangra, pasayraay cangra ci Yihofaan ato Fangcalay Cudad Ningra micangacang to sakayat, midofdofayho to sakayat ni Yis.

2. Cima ko malohemay malitengay? Itini kasakopang o maanan ko ˈinorong nangra?

O malohemay malitengay o halafinayto madimadi a midoko to Kawas a faˈinayan salikaka. Misalalangiay cangra to Fangcalay Cudad a pasifanaˈ to tamdaw, padamaayho ato pakalalokay to salikaka. Iraay ko ˈinorong no malohemay malitengay matayal i kasakopang, cowa ka palifonen cangra. ‘Makalimay ko falocoˈ a matayal i kaˈayaw no Kawas, cowa ko nika coos to caay ka tatodong a epoc, ao pakayniay i faedetay a falocoˈ.’ (1 Pitiro 5:​1, 2) I kasakopang iraay ko dama sikawdan midama to tayal no malohemay malitengay. Matayal cangra to cecay a laliyadan i, irato ko hatatodong malo malohemay malitengay alatek.

O romaroma malohemay malitengay mapanilnilay no Mikayatay a Malohemay Malitengay i Congpo malo kasakilac kantok. Mamilisoˈ cangra to kasasiroma a kasakopang, mihadak to sakayat ato pakalalok to salikaka. O kasakilac kantok misalalangiay to palinian no Fangcalay Cudad, itiniay i kasakopang cangra minilnil to malohemay malitengay ato dama a sikawdan.​—1 Timoti 3:​1-​10, 12; Titus 1:​5-9.

3. O kahacecay Misawacayay Tamdaw ni Yihofa itini kasakopang o maanan ko ˈinorong nangra?

Polong a salikaka misarocoday mirienang to kahacecay a kamok no kasakopang, misarocodayho mitosil i tamdaw. Tano mahaenay a pakayraan cangra ‘pakahemek to fangcalay ngangan ni Yihofa.’​—ˈOsien ko ˈOlic 148:​12, 13.

 CALEPEN MIKADKAD

4. Masayaray ko falocoˈ no tamdaw to pikayat ni Yis

Damsayay ci Yis mitahidang kitaanan mitoor cingranan, micada to sakayat ningra. ˈOsien ko Matay 11:​28-​30, ikor lengoen ko ilaenoay a salicay:

• Makalimay ci Yis to micadaay to sakayat ningra a tamdaw ira ko masamaanay a harateng?

5. Patirengay to hataˈarawan ko malohemay malitengay

1. Malohemay malitengay patanektekay to kalalaˈed no niyah aci Yihofaan, padamaayho to paro no lomaˈ matongal ko piingid ci Yihofaan

2. Ciharatengay ko malohemay malitengay to polong a tamdaw i kasakopang

3.   O malohemay malitengay miceriday a mitosil

4. O malohemay malitengay cowa ko pipasifanaˈ aca i pikimadan, midemakayho to mikoracay ato miasikay a tayal

6. Ngaˈayay kita midama to tayal no Malohemay Malitengay

Itini i sowal no Fangcalay Cudad, midama kita to tayal no malohemay malitengay iraay ko kalimlaan a lalangian sanay. ˈOsien ko Hipray 13:​17, ikor lengoen ko ilaenoay a salicay:

• Sowal no Fangcalay Cudad, mamahemek kita midofdof to mikeriday a tamdaw i kasakopang. Matatodongay konini a saali sanay kiso miharateng han? Misamaanay?

ˈOsien ko Luka 16:​10, ikor lengoen ko ilaenoay a salicay:

• Itini i hato cowa ko kalimlaan a demak hano midofdofho to malohemay malitengay?

 KALIMLAAN

Ci Yis o fafongohan no kasakopang. O malohemay malitengay itiniay i sakayat ningra matayal saki kasakopang, misaˈicalay misayar cangra to falocoˈ ita. Patirengay to hataˈarawan no mita. Mansa, mahemekay kita midama to tayal nangra.

Lomalen

• O cima ko mikeriday to kasakopang?

• Samaanay ko malohemay malitengay padama to kasakopang?

• O kahacecay midokoay ci Yihofaan a tamdaw itini kasakopang o maanan ko ˈinorong nangra?