SAKA 26 FEDENGAN
Itini Tonini Hekal Hano ira ko Raraw ato Pades Hani?
Maˈaraw no tamdaw ko ka adayayan a demak i, milicayay cangra: “Hano sahatini sato aki?” Kawra, hamaan maolaten kita, ihkalay ko Fangcalay Cudad a mitadtad to lalangian nonini a demak.
1. Midemakay to maanan ci Satan, sakaira no raraw itini i hekal hani?
Ci Akoma Satan mitowakangay to Kawas, mihalakaay to mamala mikowanay ko niyah, mansa mikayhiday cingra to lalitengan ita ci Atam aci Ifaan, mikihatiya cingranan a mitowakang to Kawas. Midemakay to maanan ci Satan hani? Misaˈfitay cingra ci Ifaan. (Satapangan 3:1-5) Papiharatengay ci Ifaan awaay ko ngaˈayay a falocoˈ ni Yihofa, caay pafeli to maamaan a kangaˈayan ni Ifa. Saan ko sowal ningra, ano caka tengilen no tamdaw ko sowal no Kawas i, o lalipahak ko kaˈorip nangra sanay. Sowal ni Satan i, cowa ko mamapatay ci Ifa sanay, o sakacecay a mangah konini. Mankora, sowal no Fangcalay Cudad ci Satan ‘o misamangahay cingra, hanaca o wama no misamangahay,’ Sanay.—Yohani 8:44.
2. Misaˈosiay ci Atam aci Ifa midemak to maanan?
Kadofahay a pafeli ci Yihofa ci Ataman aci Ifaan. Pasowalan Ningra cangra ngaˈay a komaen to kahirahira heci no kilang itini i Itin a palosayan, edeng ko cecay a heci no kilang caay ka ngaˈay a kaenen. (Satapangan 2:15-17) Nikawrira, ci Atam aci Ifa cowa pitengil to sowal no Kawas, pacieci sanay a komaen to heci nora kilang. Sowal no Fangcalay Cudad ci Ifa i, ‘litod hanto ningra a komaen,’ ikor ci Atam i, ‘kaen hanto ningra.’ (Satapangan 3:6) Ci Atam aci Ifa nao malefotay a tamdaw, ano midemak cangra to matatodongay a demak i, cowa ko pasangaray, ˈarawhan padeteng sanay cangra mitowakang to limoˈot no Kawas. Mihaenay i, mararawto cangra hanaca micoˈay to pikowan no Kawas. O mahaenay a saˈosi pairaay to taˈangayay a roray nangra.—Satapangan 3:16-19.
3. O pisaˈosi ni Atam aci Ifa samaanay mifiyor kitaanan hani?
Mararaw ci Atam aci Ifa cowato ka lefot cangra, parocokan nangra ko polong a tamdaw to caay ka lefot a pinangan. Sowal no Fangcalay Cudad: ‘O raraw pakayniay i cecay tamdaw [ci Atam] a micomod i hekal, o patay pakayniay i raraw ko sakaira, hato mapatenakayto ko patay i polong a tamdaw.’—Loma 5:12.
Maroray kita adihayay ko lalangian. Nolatekay pakayniay to caay ka tatodong a pisaˈosi ita; nolatekay pakayniay to nika raraw a pisaˈosi ita a mifiyor kitaanan; nolatekay pakayniay to malifaay ita a cowa ka harateng a demak.—ˈOsien ko Patnakay 9:11.
CALEPEN MIKADKAD
Dotoc mamananam iso: Pakayni to raraw ato pades nonini a hekal hano cowa ko caciˈinorong ko Kawas? Maˈaraw no Kawas ko pisemsem ita samaanay ko falocoˈ Ningra?
4. O cima ko pairaay to sakaroray no mita
Harateng no ˈalomanay tamdaw o Kawas ko mikowanay tonini a hekal sanay. O soˈlinay konini han? Nengnengen ko IKA.
ˈOsien ko Yakop 1:13 ato 1 Yohani 5:19, ikor lengoen ko ilaenoay a salicay:
-
O Kawas ko caciˈinorong to raraw ato roray nonini a hekal han?
5. O tatiihay a minaroˈan no pikowan ni Satan
ˈOsien ko Satapangan 3:1-6, ikor lengoen ko ilaenoay a salicay:
-
O manan a mangah ko nisowalan ni Satan?—Nengnengen ko 4 ato 5 sinael.
-
Samaanay ko sowal ni Satan to padeteng sanay ci Yihofa eca ka pafeli to maanan a sakangaˈay no tamdaw hani?
-
Mikitini i sowal ni Satan, sapilifokaw ko tamdaw to lipahak i, o mamicada to pikowan no Kawas wa ngaˈ sanay han?
ˈOsien ko Patnakay 8:9, ikor lengoen ko ilaenoay a salicay:
-
Cowa ka ci Yihofa ko mikowanay tonini a hekal, samaanayto ko pakayraan hani?
-
Ci Atam aci Ifa nao malefotay a tamdaw, itiniay i lakoing ko kitiraan, kawra pakasoˈlinay cangra ci Satanan, mitowakang ci Yihofaan
-
O pitowakang ni Atam aci Ifa pairaay to raraw no polong a tamdaw, misemsemay ato mapatayay
-
Papalahdawen ni Yihofa ko raraw, roray ato patay, patikol a malefot ko tamdaw, itini i lakoing ko kitiraan
6. Ciharatengay ci Yihofa to tahapadesay a tamdaw
Cowa ka ciharateng ko Kawas to pisemsem ita han? Nengnengen samaanay ko sowal no hongti ci Tafiti ato tarokos ci Pitiro. ˈOsien ko ˈOlic 31:7 ato 1 Pitiro 5:7, ikor lengoen ko ilaenoay a salicay:
-
Cipinangay ci Yihofa to pisemsem no mita, tada ciharatengay kitaanan. Mafanaˈ tonini, samaanay ko harateng iso hani?
7. O tatolasen no Kawas ko kihcod a pades
ˈOsien ko Isaya 65:17 ato Paˈarawan 21:3, 4, ikor lengoen ko ilaenoay a salicay:
-
O tatolasen ni Yihofa ko kihcod a tatiihay a demak, palahdaw to pidokaˈ nonini a demak. Masayaray nanay kiso han? Misamaanay hani?
Mafanaˈay kiso han?
Somowalay ci Satan to sakacecay a mangah, pakadit ci Yihofaan. Mipalakay to ngangan ni Yihofa, cowa ko masadafdafay, awaay ko olah a mikowanay sanay. Cato ka halafin, o tatolasen ni Yihofa ko pades palahdaw to pidokaˈ nonini a demak. Itiya o kakoracento ni Yihofa ko sapaolaf, misawacay to o sangaˈayay a mikowanay Cingra. Masakalimlaan a demak i, mamikorac to fangcalay ngangan ni Yihofa.—Matay 6:9, 10.
ANO IRA KO SOMOWALAY: “O kahacecay a tamdaw o tatahalifa to pades, o limasmas no Kawas konini.”
-
Sasamaan kiso pacaˈof?
KALIMLAAN
Ci Akoma Satan ato tatoˈasan ita o caciˈinorong to raraw no hekal. Tada ciharatengay ci Yihofa to misemsemay a tamdaw, kakalikito patolas to pades, palahdaw to pidokaˈ nonini a demak.
Lomalen
-
O manan a mangah ko nisowalan ni Satan ci Ifaan?
-
Mitowakang ci Atam aci Ifa to Kawas, samaanay mifiyor kitaanan?
-
Hano mafanaˈ kita to ciharatengay ci Yihofa to misemsemay a tamdaw?
MALALITINGAY A LALAKAW
Samaanay ko sowal no Fangcalay Cudad to “raraw” hananay.
“O Maanan ko “Raraw” Sanay ko Fangcalay Cudad Hani?” (Lalakaw no wangcan)
Cipinang to mikidatan ni Akoma Satan i Itin a demak.
“Hano Caho ka Patolasen no Kawas ko Pades Nonini a Hekal?” (Mikecolay, 2014/1/1)
Pacariraway to tamdaw a salicay, o caˈof no Fangcalay Cudad samaanay mihinom to tamdaw.
Cipinangayto ko cecay faˈinayan hano adihay ko pasangaray no kaˈorip, tengilen ko sowal ningra.