Hofoc hanho kita mirocokayto to “raraw” a, mansa tahalifa to roray, ikor mapatayto, onini a maemin sahtoay o pairaan no pitowakang ni Atam aci Ifa to Kawas ko sakahaen. Kawra, iraayho ko hatokel ita, samanen maherekayto ci Yihofa a milimasmas, pakaynian i Wawa Ningra ci Yis Kristoan a milidong kitanan. O malefotay a tamdaw ci Yis hayi sanay cingra a mapatay, patafang to malefotay ˈorip malo “sapatefoc” sanay ko Fangcalay Cudad. (ˈOsien ko Matay 20:28 ato roma pihongyak.) Malecad o sapatefoc a payci ngaˈay panokay to mapalitay a tamdaw, o sapatefoc wa ngaˈay padama to tamdaw miliyas to raraw ato patay, milifok to sakatedal. Na iraay ko fadangalan ni Yis tahadaˈoc maˈorip i fafekang no sera, kawra makahiay cingra pasadak tonini a fadangalan, sakaira no toki ita milifok to malahdaway ni Atam aci Ifa a kihcod. O nano demak ni Yis paihkalay to maolahay cingra aci Yihofa kitaanan. Minanam tonini a fedengan wa patongal to piakoˈid iso to kinafalah ni Yis to ˈorip.

1. Nohatini wa ngaˈay kita mikitini kinafalah ni Yis to ˈorip milifok to maanan a epoc?

Hofoc hanho kita o cowato ko malefotay a tamdaw, midemakay to adihayay cowa ko kahemekan ni Yihofa a demak. Kawra, sowal no Fangcalay Cudad: ‘O moecelay a tamdaw ci Kristo, na patadoay cingra to ˈalomanay cowa ka moecel a tamdaw a mapatay, kinacecay aca tahadaˈoc palahdaw to raraw, araaw o sapikeridaw to tamdaw minokay i Kawas.’ (1 Pitiro 3:​18) Pakayni kinafalah ni Yis to ˈorip, wa ngaˈay kita ira ko ngaˈayay kalawidang to Kawas anini. Sasamaan ko demak ita hani? O mamikifalocoˈ a pasasiyor to raraw, pakayni i ngangan ni Yis mitolon micangacang to sasodod ni Yihofa kitaanan, misaˈicelho eca ka piliyaw to malecaday a raraw.​—1 Yohani 2:1.

2. Ano ikor, wa ngaˈay kita mikitini kinafalah ni Yis to ˈorip milifok to maanan a epoc?

Ocoran ni Yihofa ci Yis tayni i fafekang no sera, patafang to malefotay a ˈorip, ‘to saka ecaaw ka tekop no polong pakasoˈlinay [ci Yisan] a tamdaw, ao mamilayap to midaˈocay a ˈorip.’ (Yohani 3:​16) Tona maherekayto ci Yis kinafalah to ˈorip saki tamdamdaw, oha papalahdawen ni Yihofa ko tatiihay minaroˈan noka pitowakang ni Atam, hanaca kakalikito mihaen to demak Cingra. Ano tano waywayan kita paihkal to nika pakasoˈlin to pikinafalah ni Yis to ˈorip, wa tatahadaˈoc lipahak ko ˈorip ita itini i fafekangay no sera a lakoing.​—Isaya 65:​21-​23.

 CALEPEN MIKADKAD

3. O pikinafalah ni Yis to ˈorip mitedalay to raraw ato patay ita

1. O malefotay a tamdaw ci Atam, mitowakangay cingra to Kawas, mansa polong a tamdaw iraay ko raraw, salikor mapatayayto

2. O malefotay a tamdaw ci Yis, midofdofay cingra to Kawas, mansa polong a tamdaw iraay ko tokel patikol a malefot, tahadaˈoc a maˈorip

4. O pikinafalah ni Yis to ˈorip palemeday to tamdamdaw

 5. O sapakaolah ni Yihofa tisowanan ko sapatefoc ni Yis

O pinengneng no widang ni Yihofa to sapatefoc i, o mikiriwiˈay a sapakaolah cingranan wa saan. Nengnengen ko cecay tinakoan. ˈOsien ko Kalatiya 2:​20, ikor lengoen ko ilaenoay a salicay:

• Sasamaan kita mikitini i sowal ni Pawlo mahapinang, o pinengneng ningra to sapatefoc i, o mikiriwiˈay a sapakaolah to niyahan?

Mararawto ci Atam i, cingra ato polong a teloteloc ningra caayto pakaliyas to patay. Ocoran ni Yihofa ko Wawa Ningra mikinafalah to ˈorip, paira to tahadaˈocay a ˈorip iso.

Miˈosi to sinael i, saharateratengen, maˈaraw ni Yihofa ko pisemsem no Wawa Ningra i, samaanay ko falocoˈ Ningra. ˈOsien ko Yohani 19:​1-7, 16-​18, ikor lengoen ko ilaenoay a salicay:

• Mafanaˈ to nidemakan ni Yihofa aci Yis saki tisowanan i, samaanay ko falocoˈ iso?

 KALIMLAAN

O pikinafalah ni Yis to ˈorip, mamasodod ni Yihofa ko raraw ita, ira ko hatokel ita tahadaˈoc a maˈorip.

Lomalen

• Misamaanay hano mapatay ci Yis hani?

• O sapatafang ni Yis a malefotay ˈorip hano o ‘maroyaroyay a sapatefoc,’ han ko sowal hani?

• O pikinafalah ni Yis to ˈorip o maanan ko epoc i tisowanan hani?