SAKA 29 FEDENGAN
Ano Mapatay ko Tamdaw Samaanayto Hani?
Iraay ko mapatayay a salawina iso han? Tada mararomay itiya, alatek sanay a miharateng kiso: Ano mapatay ko tamdaw samaanayto hani? Wa ngaˈayho maˈaraw ko mapatayay salawina han? Itini tonini fedengan ato ilaenoay a fedengan, o mamaˈaraw ita ko mihinomay a sapacaˈof no Fangcalay Cudad.
1. Ano mapatay ko tamdaw samaanayto hani?
O maeholay a mafotiˈ hananay ni Yis ko mapatayay. O maeholay a mafotiˈ a tamdaw cowato ka fanaˈ to mafekaday i taliyok a maamaan a demak. Malecaday, o mapatayay a tamdaw ‘caay ka fanaˈ to maamaan’ cangra, caayto ka adadaen. (ˈOsien ko Patnakay 9:5.) Maˈoripho ko tamdaw ano hakowaay ko olah to salawina ato widang, mapatayto cingra i, caayto ka fanaˈ matoˈol, samanen awaayto ko maanan a kafanaˈan ningra.
2. Mafanaˈ to samaanay ko mapatayay iraay ko maanan a sapadama kitaanan?
ˈAlomanay tamdaw matalaway to patay, hanaca ciˈangiay to mapatayay tamdaw. Kawra, somowalay ko Fangcalay Cudad to mapatayay hananay, paparihaday konini to falocoˈ ita. O sowal ni Yis: ‘Mamapasalat no soˈlinay kimad kamo,’ sanay. (Yohani 8:32) O sowal no adihayay pihakelongan, iraay ko saloˈafang sanay, mapatay ko tireng i, o saloˈafang padadotocayho maˈorip. Kawra cowa ko kimad no Fangcalay Cudad konini, mapatay ko tamdaw i, cowa ko mamisemsem. O roma i, mapatayay tamdaw caay pidokaˈ kitaanan, samanen awaayto ko maanan kafanaˈan nangra. Cowa ko mamidemak kita to mitaˈongay a misalisin to mapatayay, cowa ko papatado kita mipalemed cangranan.
O maˈoripay a tamdaw ngangaˈay masasowal to mapatayay han? Mananamayto ita, mapatayay tamdaw ‘awaay ko maanan kafanaˈan’. O romaroma tamdaw miharateng masasowalay ko niyah to mapatayay a salawina sanay, ˈarawhan alatek o masasowalay to tatiihay coyoh, samanen o tatiihay coyoh misao mapatayay tamdaw. Mafanaˈay ci Yihofa, masasowal to tatiihay coyoh tada katalawan ita, mansa, mirikecay Cingra kitaanan aka a masasowal to mapatayay sanay. (ˈOsien ko Limoˈot 18:10-12.) Mafanaˈ kita to masamaanay ko mapatayay i, ngaˈay madipot kita caka dokaˈ no tatiihay coyoh.
CALEPEN MIKADKAD
Dotoc cacipinang kiso, to samaanay ko pitadtad no Fangcalay Cudad to mapatayay hananay, o mamatongal ko nika pakasoˈlin iso to matomesay ko olah no Kawas cowa ko papasemsem to mapatayay tamdaw.
3. Cipinang to samaanay ano mapatayto ko tamdaw
Pakayni to samaanay ko mapatayay hananay, masasiromaay ko sowal no icowacowaay tamdaw. Ihkalay mahapinang ko hatiniay a sowal cowa ka sahto saan o soˈlinay.
-
Itini i kaitiraan iso a pala, pakasoˈlinay ko tamdaw to samaanay ko mapatayay sanay hani?
Nengnengen ko IKA, samaanay ko sowal no Fangcalay Cudad..
ˈOsien ko Patnakay 3:20, ikor lengoen ko ilaenoay a salicay:
-
O sowal no sinael mapatay ko tamdaw i, samaanayto hani?
-
Mikitini i sinael, mapatay ko tamdaw i, iraay ko saloˈafang padadotoc maˈorip icowa han?
Somowalay ko Fangcalay Cudad to nika patay no ngaˈayay widang ni Yis ci Lacarus. ˈOsien ko Yohani 11:11-14, sinanoten samaanay ci Yis pasowal to kapatay ni Lacarus, ikor lengoen ko ilaenoay a salicay:
-
Tano maanan ni Yis patinako ko patay?
-
Onini a sapatinako somowalay to samaanayto ko mapatayay a tamdaw?
-
Pakayni to mapatayay tamdaw, matatodongay ko sowal no Fangcalay Cudad sanay kiso han?
4. Cipinang to samaanay ko mapatayay hananay i, mamilifok to pasalat
Ano cipinang kita to mapatayay hananay i, cowato ko mamatalaw. ˈOsien ko Patnakay 9:10, ikor lengoen ko ilaenoay a salicay:
-
O mapatayay a tamdaw ngaˈayho midokaˈ kitaanan han?
O harateng no romaroma a tamdaw, taˈongen a misalisin ko mapatayay tamdaw sanay. O soˈlinay kimad no Fangcalay Cudad papadama kitanan mifalah to mahaenay mararaway a piharateng. ˈOsien ko Isaya 8:19 ato Paˈarawan 4:11, ikor lengoen ko ilaenoay a salicay:
-
Maˈaraw ni Yihofa mitaˈong ko tamdaw to mapatayay, micangacang to sapadama no mapatayay i, samaanay ko harateng Ningra sanay kiso hani?
Cipinang to samaanay ko mapatayay i, mamasawad ko adihayay kapiliˈan ni Yihofa a pinangan nolitengan
5. Cipinang to samaanay ko mapatayay hananay i, mamilifok to sahinom
Mapasifanaˈay ko ˈalomanay tamdaw to mararaway a kimad, maˈoripho mararaw ko demak i, mapatayto oha mamisemsem cingra sanay. Kawra pasowalay ko Fangcalay Cudad kitaanan, cowa ko mamisemsem ko mapatayay tamdaw sanay, soˈlin maˈoripho pakidemay ko raraw, mapatayto cowa ko mamisemsem. Tada pairaay to sahinom kitaanan konini. ˈOsien ko Loma 6:7, ikor lengoen ko ilaenoay a salicay:
-
Ano pasowalay ko Fangcalay Cudad to matedalayto ko mapatayay tamdaw, maliyasayto ko raraw saan i, mapatayto o papakayni to iˈayaway a raraw ningra a mapasemsem han?
Ano matongal ko kacipinang iso ci Yihofaan i, o papakasoˈlin, cowa ko mamipasemsem Cingra to mapatayay tamdaw. ˈOsien ko Limoˈot 32:4 ato 1 Yohani 4:8, ikor lengoen ko ilaenoay a salicay:
-
Somowalay ko sinael adihayay ko makapahay a capeling no Kawas. Miharateng kiso i, o mamipasemsem Cingra to mapatayay tamdaw han?
-
Cipinang to samaanay ko mapatayay hananay i, mahinomay ko falocoˈ iso han? Misamaanay?
ANO IRA KO SOMOWALAY: “Calemcemay kako to mapatayay salawina ngaˈayay ko kaˈorip nangra hokira.”
-
Tatano maanan a sinael mihinom kiso cingranan?
KALIMLAAN
Ano mapatay ko tamdaw mahererekayto ko ˈorip, cowa pisemsem ko mapatayay tamdaw, cowato ko mamidokaˈ to maˈoripay a tamdaw.
Lomalen
-
Mapatay ko tamdaw i, samaanayto hani?
-
Cipinang to samaanay ko mapatayay hananay i, hano mamilifok to pasalat hani?
-
Cipinang to samaanay ko mapatayay hananay i, hano mamilifok to sahinom hani?
MALALITINGAY A LALAKAW
O romaroma a Fangcalay Cudad tano ‘saloˈafang’ hananay a mihongyak, o maanan ko soˈlinay a tatodong nira hani?
Tano cikokan no Kawas a misayfang ko mariˈangay a tamdaw han?
O cecay faˈinayan cipinang to samaanay ko mapatayay i, tada mahinomay cingra, tengilen ko sowal ningra.
Matatodongay a Pitadtad no Fangcalay Cudad Tada Matemeray ko Falocoˈ Ako? (Mikecolay, 2015/2/1)
