SAKA 38 FEDENGAN
O ˈOrip Tada o Kalimlaan
Ira ko ˈorip ngaˈ, ngaˈay kita rihaked to kadofahay a nokaˈorip. Soˈlin nolatekay iraay ko pasangar no kaˈorip, kawra kamayanho mahela ko makapahay a demak i nokaˈorip. O ˈorip tada o kalimlaan, sasamaan kita misalimla to ˈorip hani? Misalimla kita to ˈorip o manan ko sakakaay a lalangian hani?
1. Hano mamisalimla kita to ˈorip?
Misalimla kita to ˈorip, samanen o sapatelong no sidaˈitay a Wama ci Yihofa kitaanan konini. Misangaˈan Ningra ko kihcod a ˈorip, o ‘pipowaran no ˈorip Cingra.’ (ˈOlic 36:9) Cingra i, ‘pafeliay to ˈorip, saselaˈan ato maamaan i polong a tamdaw.’ (Dmak 17:25, 28) Pafeliay ci Yihofa to sakaˈorip ita a dafong, kawra cowa ko sakangaˈay aca ita a maˈorip, ngaˈayho rihaked to masakenakenaay makapahay a dafong, lipahak ko nika ˈorip.—ˈOsien ko Dmak 14:17.
2. Sasamaan miakoˈid to pafeliay to ˈorip a Yihofaan, o masakalimlaan a sapatelong Ningra?
Itiyadho no wina kiso i, ciharatengayto ci Yihofa tisowanan. Ci Tafiti o midokoay to Kawas a tamdaw, maˈoningay i Fangcalay Cudad ko satolon ningra, sanay ko sowal to Kawas: ‘Na itiyadho no wina kako i, maˈarawayto Iso kako.’ (ˈOlic 139:16) Tada misalimlaay ci Yihofa to ˈorip iso. (ˈOsien ko Matay 10:29-31.) Ano makariˈang no tamdaw ko ˈorip no tao i, anca padeteng sa a kinasoˈot, tada masomaday ci Yihofa. a (Kasadakan 20:13) Ano saˈamelas sa kita mikariˈang to niyah a ˈorip, anoca caka pisinanot to sakarihadayaw midipot to ˈorip no tao i, mamasomad ci Yihofa. Salimlaen ita ko tireng no niyah, misalimlaho to ˈorip no tao, mihaen o miakoˈiday to pafeliay to masakalimlaan ˈorip a Kawas.
CALEPEN MIKADKAD
Dotoc mamananam iso: Itini masamaanay a pakayraan paihkal kiso to misalimlaay to ˈorip no niyah?
3. Dimokosen ko tireng
O patafangayto to tireng a Krisciyang misaˈicelay tano ˈorip no niyah midoko ci Yihofaan. Tano tirengan no niyah malo sapatoˈaya patafang i Kawasan. ˈOsien ko Loma 12:1, 2, ikor lengoen ko ilaenoay a salicay:
-
Mikitini i sinael, hano dimokosen ko tireng no niyah?
-
O mamidemak kiso to maanan to sapidimokosaw to tireng no niyah?
4. Dipoten ko niyah ato tao, eca ka madokaˈ anca mapatay
Patalipaˈelalay ko Fangcalay Cudad kitanan, aka pidemak to mamikariˈang to ˈorip a demakan. Nengnengen ko IKA, itini masamaanay a pakayraan misinanot kita to sakarihadayaw.
ˈOsien ko Taneng 22:3, haratengen hena, wa samaan kiso a midipot to tamdaw, ano itini i . . .
-
Itini i katayalanˈ.
-
Itini i piontoan.
-
Itini i tosiya.
-
Ano parakat anoca midakaw to paliding.
5. Misalimla to ˈorip no itiyaday a wawa
Mitiliday ci Tafiti to cecay ˈolic, ciharatengay ci Yihofa to itiyaday no wina a ˈorip sanay, misinanot to kalomahad no itiyaday a wawa. ˈOsien ko ˈOlic 139:13-17, ikor lengoen ko ilaenoay a salicay:
-
O pinengneng ni Yihofa, o ˈorip no tamdaw mikitiniay i poyapoyho no wina a misatapang, anoca mikitiniay i hofocento cingra a misatapang han?
Pakayni to lalitengan a Israil tamdaw misaˈosian ni Yihofa ko sarikec, midipot to cipoyapoyay ato cowaho ka sofocen a wawa. ˈOsien ko Kasadakan 21:22, 23, ikor lengoen ko ilaenoay a salicay:
-
Ano cowa ko padetengan patay sanay ko itiyaday a wawa i, samaanay ko piharateng ni Yihofa?
-
Ano padeteng sa mipatay to itiyaday a wawa i, samaanay ko piharateng ni Yihofa hani? b
-
Mahecaday ko piharateng iso ato ni Yihofa han? Misamaanay?
Nolatekay, o misalimlaay to ˈorip a tamdaw, pasadak to poyapoy o edengan a papiliˈen wa saan a miharateng alatek. ˈOsien ko Isaya 41:10, ikor lengoen ko ilaenoay a salicay:
-
Itini i pasadakay to poyapoy a demakan, taˈangayay ko saroero ano saan i, icowa mikilim to sapadama? Misamaanay?
ANO IRA KO SOMOWALAY: “Ano cimato a fafahiyan iraay ko fadangalan misaˈosi to papasadak to poyapoy hokira, samanen o tireng no niyah kora.”
-
O manan ko papadama tisowanan pakahapinang, o misakaretengan ni Yihofa cowa ko tireng aca no wina, mahawpay ko ˈorip no itiyaday a wawa?
KALIMLAAN
O ˈorip i, naitiniay ci Yihofaan a sapatelong. Pasifanaˈay ko Fangcalay Cudad kitanan papisalimla, papisakareteng halo midipot to ˈorip no niyah ato ˈorip no tao.
Lomalen
-
Hano misakareteng ci Yihofa to ˈorip no tamdaw?
-
Ano mipatay to tao anca padeteng sa milaheci to ˈorip no niyah i, samaanay ko piharateng ni Yihofa?
-
Miakoˈiday kiso to sapafeli ni Yihofa a ˈorip, onini a sapatelong han? Misamaanay?
MALALITINGAY A LALAKAW
Pafelian ni Yihofa kita to ˈorip, onini a sapatelong, sasamaan miakoˈid Cingranan?
Sasododen no Kawas ko namipasadakay to poyapoy a tamdaw han? Nengnengen samaanay ko caˈof.
Cipinangto kita to pinengneng no Kawas to ˈorip, sasamaan mipiliˈ to lawla?
“‘Pakidemay Katalawan a Onto’—Sapitanamaw Kiso Han?” (Katalipaˈelal!, 2000/10/8)
Samaanay padama ko Fangcalay Cudad to sapikinasoˈotaw a tamdaw.
a Tada ciharatengay ci Yihofa to masomaday ko falocoˈ a tamdaw. (ˈOlic 34:18) Mafanaˈay Cingra, ano pakidem masomad ko falocoˈ no tamdaw i, alatek sedak sanay ko sapikinasoˈotaw a harateng. Ci Yihofa miharatengay to sapadamaaw to mahaenay ko falocoˈ a tamdaw. Ano ira ko sapadama ni Yihofa, ngangaˈay a miwanik to sakinasoˈotaw a harateng. Nengnengen ko ‘Malalitingay a Lalakaw’ nonini a fedengan. “Sakapatayaw Kako—Wa Padama ko Fangcalay Cudad Takowanan Miwanik to Mahaenay a Harateng Han?”
b Na padeteng sanay a pasadak to poyapoy a tamdaw, alatek tada cikiyamay ko falocoˈ pakayra tora demak, kawra ngangaˈay cangra masodod ni Yihofa. To sakacipinangaw, nengnengen ko ‘Malalitingay a lalakaw’ nonini a fedengan. “Pakayni to Padeteng Sanay Pasadak to Poyapoy, Samaanay ko Sowal no Fangcalay Cudad?” a lalakaw.
