Ano awa ko remes awa ko ˈorip no tamdaw, mankora o remes tada masakalimlaan. O Kawas Misangaˈay a Tatapangan, mihaenay haw i, iraay ko fadangalan Ningra a misaˈosi to sasamaan misakadademak to remes. Pakayni i remes, samaanay ko sowal Ningra hani? Wa ngaˈay komaen to remes anca pacomod to remes i tireng han? Itini i milingatay to remes a demakan, sasamaan kiso citaneng ko pisaˈosi?

1. Samaanay ko pinengneng ni Yihofa to remes?

Na pasowalanto ni Yihofa ko midokoay Cingranan a tamdaw: ‘O ˈorip itiniay i remes.’ (Lifi 17:14 ato roma pihongyak.) Itini i pinengneng ni Yihofa, o remes mitaypiyaway to ˈorip. Naitiniay i Kawas ko ˈorip, o fangcalay, mankora fangcalay ko remes.

2. Iraay ko maanan a sakeceng no Kawas to remes?

ˈAyaw no mapatireng ko kasakopang no Krisciyang, palimoˈotay ci Yihofa to midokoay Cingranan a tamdaw aka komaen to remes sanay. (ˈOsien ko Satapangan 9:4 ato Lifi 17:10.) Ikor no mapatireng ko kasakopang no Krisciyang, miliyaway ci Yihofa somowal tonini a limoˈot. O mikayatay a malohemay malitengay itiya palimoˈotay to Krisciyang ‘kecengen ko remes.’​—ˈOsien ko Dmak 15:28, 29.

Kecengen ko remes o maanan ko tatodong hani? Tinakoen, ano palimoˈot ko ising tisowanan aka piˈinip to epah saan i, maedeng cowa ko maminanom kiso to epah. Ano mahaenay i, wa komaen kiso to ciepahay a kakaenen, anca cosiyaen ko epah i tireng han? Cato kira. Malecaday, ‘kecengen ko remes,’ sanay ci Yihofa, o tatodong i, cowato ko ngangaˈay kita komaen to remes, minanom to remes, anca komaen to cowa ka pasadaken ko remes a titi, cowa ka ngaˈay komaen to ciremesay a kakaenen.

Ano pakayniay i sapaisingaw a kalasaka dademak to remes sasamaan hani? O pina sapiadah a pakayraan, misafelitay to rikec no Kawas, pacomod to remes anca pacomod to pina kalimlaan no remes (Hongsipaw, Paysipaw, Siesiyawpan, Sieciyang). Kawra, nolatekay mafokilay kita a pafafidaˈ to maamaan a sapaadah. Tinakoen, misakadademak to pina midiyosan i remes a dafong; anca misefsef to remes no niyah a patikol i tireng a sapaadah. Micada anca minaˈay to sapaadah, o kahacecay a tamdaw mamisongilaˈ a misimsim, ikorto o niyah ko mamisaˈosi. a​—Kalatiya 6:5.

 CALEPEN MIKADKAD

3. Itini pisaˈosi to sapaadah a demakan pakahemeken ci Yihofa

Itini i milingatay to remes a sapaadah a demakan, samaan misaˈosi to pakahemekay ci Yihofaan a demak hani? Nengnengen ko IKA, ikor lengoen ko ilaenoay a hapakayraan, haratengen konini a hapakayraan hano masakalimlaan.

• Mitolon micangacang to taneng.​—Yakop 1:5.

• Mikilim to milingatay a safalod no Fangcalay Cudad, ato cipinang samaan a misakadademak.​—Taneng 13:16.

• Kilimen icowaay ko sangaˈayay a pakayraan itini i kitiraan iso.

• Sawaden ko cowa ko cacadaen iso a pakayraan.

• Songilaˈen a miharateng, o misaˈosian iso papatingalaw to makapahay falocoˈ no niyah.​—Dmak 24:16. b

• Aka mapawan o misaˈosian no makapahay falocoˈ a demak, ano o raramodto, malohemay malitengay, singsi no Fangcalay Cudad, anoca romaroma tamdaw, cowa ko ngangaˈay patado tisowanan a misaˈosi.​—Loma 14:12.

• Tiliden ko misaˈosian iso, tereken ko cecay matiliday a kalidokap hano niyah.

4. Mikilimay to sangaˈayay a sapaadah hapakayraan ko Misawacayay Tamdaw ni Yihofa

Dofdofen ko milingatay to remes a rikec no Kawas, sapilifokawho to cowa pacomod to remes a sangaˈayay sapiadah, wa ngaˈay mihaen han? Hano eca ka ngaˈay. Nengnengen ko IKA.

ˈOsien ko Titus 3:2, ikor lengoen ko ilaenoay a salicay:

• Ano malalengo ato ising i, hano papaihkal kita to mikangodoay, damsayay a waywayan hani?

 5. O milingatay to midiyosan i remes a dafong

Sepatay ko kalimlaan no remes: Hongsipaw, paysipaw, siesiyawpan ato sieciyang. Naitini i kalimlaan no remes ngaˈayay diyosen ko pinapina a dafong, o midiyosan i remes a dafong hananay nonini cudad konini a dafong. c O romaroma midiyosan i remes a dafong ngaˈayay malo sapaiyo miadah to adada ato sapiemet to mipowaray a remes.

Itini i milingatay to midiyosan i remes a dafong a demakan, o kahacecay a Krisciyang mamitoor to mapahatatanamay no Fangcalay Cudad a makapahay falocoˈ no niyah a misaˈosi. O roma Krisciyang misaˈosiay, caay ko mamicada to tano midiyosan i remes a dafong a sapaising, kawra o makapahay falocoˈ no roma Krisciyang makahiay micada.

Ano misaˈosi i, saharateratengen:

• Hano micada kako anca manaˈay to midiyosan i remes a dafong? Sasamaanen ako pasowal ko ising a mitadtad?

 KALIMLAAN

Makalimay ci Yihofa kitaanan aka patelas misakadademak to remes.

Lomalen

• Pinengneng ni Yihofa hano o fangcalay ko remes?

• Hano mafanaˈ kita, o mikecengay to remes a limoˈot no Kawas, mahawpay ko pacomoday to remes hani?

• Itini i milingatay to remes a sapaising a demakan, sasamaan mataneng ko pisaˈosi iso?