Haratengen hena, mamalingad ko wawa a micudad, misongilaˈay ko wina minengneng to masieroday ko rikoˈ no wawa, makoracay ko tireng ningra hokira. Mihaen ngaˈ, caka ciadada ko wawa, maˈaraw no tao ko nika ngaˈay no wama wina a midimokos to wawa. Malecaday, i kakarayan a Wama ci Yihofa maolahay kitanan, makalimay kitanan makorac to kalo romiˈad ato makorac ko waywayan. Mihaen to demak caciepoc kitanan, papaˈodingarho ci Yihofaan.

1. Itini kalo romiˈad sasamaan kita misaareteng to makorac?

Sowal ni Yihofa: ‘Ka korac kamo’ sanay. (1 Pitiro 1:16) To sapakadangaraw tonini, aitini kita i kalo romiˈad a makorac, itini i waywayan mamakorac kita. Itini kalo romiˈad, sasamaan kita makorac hani? Mararid a mainoˈ, mifacaˈ to rikoˈ, mikorac to lomaˈ ato paliding. Mamiasik kita to Kasaˈopoan. Ano makorac kita i kalo romiˈad i, papaˈodingar ci Yihofaan.​—2 Korinto 6:3, 4.

2. To sakakoracaw, aka madenga no tatiihay a nanaman?

Sowal no Fangcalay Cudad, kita i, ‘ka pikorac to niyahan, sawaden ko masakenakenaay mipakaditay to tireng ato falocoˈ a demakan.’ (2 Korinto 7:1) Tatodong no sinael i, o midokaˈay to tireng ato falocoˈ a demak, aka a pidemak kita. Sapakahemekaw ci Yihofaan, sasaˈicelen ita a mifalah ko mararaway a harateng. (ˈOlic 104:34) Cowa ko sasomowal kita to kaacekan anca kasimelangan a sowal.​—ˈOsien ko Kolosay 3:8.

Sapikoracaw to tireng ato waywayan, o mananho ko sasinanoten no mita hani? Oha mamisaˈicel kita miliyas to midokaˈay to tireng a dafong, mankora aka pitamoko, miˈicep, mikemkem to ciwarakay a papah, aka piselip to etok anca patelas misakadademak to cemel. Ano caka pidemak tonini a demak i, wa tanektek ko tireng ita, hanaca o paihkalay kita to misaaretengay to masakalimlaan a ˈorip. Sapikoracaw to waywayan, mamisaˈicel kita miremo to cowa ka korac a nanaman, tinakoen mipohpoh a misalama to kamaysiˈan anca minengneng to maˈodangay a lalakaw. (ˈOlic 119:37; Ifiso 5:5) Misawad to hatiniay a nanaman cowa ko madoloay, kawra ira ko sadama ni Yihofa i, o mamadangarto no mita.​—ˈOsien ko Isaya 41:13.

 CALEPEN MIKADKAD

3. Ka korac, paˈodingar ci Yihofaan

Mikitini to sakayat ni Yihofa to nolitengan Israil a tamdaw, cacipinang kita to pinengneng Ningra to makoracay a demak. ˈOsien ko Kasadakan 19:10 ato 30:17-19, ikor lengoen ko ilaenoay a salicay:

• Mikitini i sinael, samaanay ko pinengneng ni Yihofa to makoracay a demak?

• O manan a ngaˈayay nanaman ko papadama tisowanan a makorac hani?

Ano icowato ko kaitiraan ita, ano cihafayay ano manikaway, o ngangaˈay kita a makorac. Nikawrira, mamisadak kita to toki ato ˈicel to sakakoracaw. Nengnengen ko IKA, ikor lengoen ko ilaenoay a salicay:

• Songilaˈen ita misolimet ko dafong no niyah a mikorac, iraay ko maanan a ngaˈayay pifiyor to mitosilay a demak ita hani?

4. Milowid to tatiihay a nanaman

Ano iraay ko nanaman iso a mitamako, mihelip to etok anoca patelas misakadademak to cemel i, maedeng mafanaˈay kiso to cowa ko madoloay milowid to mahaenay a tatiihay nanaman. O manan ko papadama tisowanan hani? Saharateratengen o hatiniay tatiihay nanaman samaanay mifiyor tisowanan. ˈOsien ko Matay 22:37-39, ikor lengoen o mitamakoay, mihelipay to etok anoca patelas misakadademak to cemel samaanay a mifiyor . . .

• to kalalaˈed no niyah aci Yihofaan.

• to paro no lomaˈ ato i raringiday a tamdaw.

Patirengen ko limasmas a milowid to tatiihay a nanaman. a Nengnengen ko IKA.

ˈOsien ko Filipi 4:13, ikor lengoen ko ilaenoay a salicay:

• Mararid a mitolon, mikingkiw to Fangcalay Cudad, mirienang to saˈopo, hano papadama to tamdaw milowid to tatiihay a nanaman?

 5. Coˈayen ko cikaditay a harateng ato nanaman

ˈOsien ko Kolosay 3:5, ikor lengoen ko ilaenoay a salicay:

• Hano mafanaˈ kita, o minengnengay to maˈodangay a lalakaw, patenakay to maˈodangay a lihaf ato mipohpohay a misalama to kamaysiˈan a demak, itini i pinengneng ni Yihofa cowa ko makoracay?

• Misaaliay ci Yihofa kitanan makorac itini i waywayan, onini a saali matatodongay sanay kiso miharateng han? Misamaanay?

Sasamaan micoˈay to cowa ka korac a harateng. Nengnengen ko IKA.

Sakadademakan ni Yis ko cecay tinakoan a somowal, oha kalamkam kita mikorac to waywayan. ˈOsien ko Matay 5:29, 30, ikor lengoen ko ilaenoay a salicay:

• O tatodong no sowal ni Yis i, cowa ko mamidokaˈ kita to tireng, ao kakaliki kita a midemak o sanay. Toha sapiˈemetaw to cikaditay a harateng, sasamaan kita kalamkam misetek to falocoˈ a midemak hani? b

Ano misaˈicelay kiso a micoˈay to cikaditay a harateng, maedeng masemeray ci Yihofa to midemakan iso. ˈOsien ko ˈOlic 103:13, 14, ikor lengoen ko ilaenoay a salicay:

• Ano misaˈicelay kiso nohatini mifalah to cikaditay a nanaman, onini a sinael samaanay pakalalok tisowanan kodait eca ka pisawad?

 KALIMLAAN

Itini kita i tireng, harateng ato waywayan padadotoc a makorac, o papakahemek ci Yihofaan.

Lomalen

• Padadotoc a makorac hano masakalimlaan hani?

• Sasamaan kiso i kalo romiˈad misaareteng to makoracay hani?

• Sasamaan kiso itini i haratengan ato waywayan padadotoc a makorac hani?