SAKA 43 FEDENGAN
O Krisciyang Ngaˈayay Komaen to Epah Han?
Itini icowacowa pala, cowa ka lecalecad ko pinengneng no tamdaw to epah. O romaroma tamdaw cowa piˈiniˈinip aca to epah; o romaroma tamdaw malacafay to widang i, maolahay komaen to miming a epah; iraayho ko roma tamdaw mitatiw to takid ano caka lasang cowa ka sapisawadaw. Samaanay ko pinengneng no Fangcalay Cudad to komaenay to epah hani?
1. Komaen to epah o mararaway han?
O Fangcalay Cudad i, cowa ka piconged to tamdaw komaen to epah. O epah o sapakaolah no Kawas to tamdaw sanay ko Fangcalay Cudad. Sowal no Fangcalay Cudad: ‘Ira ko epah palipahakay to falocoˈ no tamdaw.’ (ˈOlic 104:14, 15) Itini i nolitengan, o romaroma madimadiay midoko to Kawas a tamdaw i, komaenay to epah.—1 Timoti 5:23.
2. Sowal no Fangcalay Cudad, komaenay to epah a tamdaw sasinanoten ko maanan?
Mirikecay ci Yihofa to haliepahay ato malasangay a waywayan. (Kalatiya 5:21) Sowal no Fangcalay Cudad: ‘Aka haliepah’ sanay. (Taneng 23:20) Ano kalacafay to roma a tamdaw i, anca ano cecay i, hamaan pakinali kita komaen to epah, o tatodong i, hamaan tahiraen i kapohelan no ponoˈ, cato pakaˈimer to sasowalen anca mipalak to tireng ko kakomaen to epah. Ano cowa ko papakaˈimer kita to epah, sangaˈayay i, aka komaen to epah.
3. Itini kakomaen to epah, sasamaan kita mikangodo to saˈosi no tao?
O kahacecay a tamdaw mamisaˈosi ko niyah to kakomaen to epah hokira. Ano patatodong ko tao a komaen to epah i, cowa ko mamilikaf kita cingranan. Ano awaay ko harateng no tao komaen to epah i, aka pacieci cingranan. (Loma 14:10) Ano komaen kita to epah ano iraay ko tatiihay noka pifiyor to tao i, sawad sa kita komaen to epah ko ngaˈayay. (ˈOsien ko Loma 14:21.) Kita i, ‘mararid patado to tao a miharateng, aka o niyah aca ko kiharen.’—ˈOsien ko 1 Korinto 10:23, 24.
CALEPEN MIKADKAD
Dotoc mamananam iso: O manan a safalod no Fangcalay Cudad ko papadama tisowanan misaˈosi to kakomaen to epah hokira, hakowa ko mikaenan a epah? Ano misaˈicelay kiso nohatini sapisawadaw to epah, sasamaan ko pidemak hani?
4. Mamisaˈosi to kakomaen to epah kiso hokira
Samaanay ko pinengneng ni Yis to komaenay to epah? Sakafanaˈaw to caˈof, nengnengen ita ko saka cecay a midemakan ningra a kafahkaan a demak. ˈOsien ko Yohani 2:1-11, ikor lengoen ko ilaenoay a salicay:
-
Mikitini midemakan ni Yis a kafahkaan, pakayni i epah ato komaenay to epah a tamdaw samaanay ko pinengneng ningra sanay kiso miharateng hani?
-
Ano cowa piconged ci Yis to tamdaw komaen to epah, o Krisciyang sasamaan ko pinengneng to komaenay to epah a tamdaw hani?
O Krisciyang ngaˈayay komaen to epah, kawra itini i romaroma pakayraan, komaen to epah cowa ko citanengay. ˈOsien ko Taneng 22:3, ikor saharateratengen kora ilaenoay pakayraan, sasamaan ko pisaˈosi iso?
-
Parakat to paliding anoca dademak to kikay.
-
Mapoyapoyay kiso.
-
Aka komaen kiso to epah sanay ko ising.
-
Ano komaen kiso to epah i, cowato pakaˈimer.
-
Cowa pihayda ko holic no kitakit komaen kiso to epah.
-
Cicafayay kiso to misawadayto komaen to epah a tamdaw, to sapiˈimeraw to epah cingra, misetekay to falocoˈ cowa ko mamiˈiniˈinip to mimimiming aca a epah.
Itini pakaetimay anoca i romaroma kalisopsopan, mamisadak to epah han? Nengnengen iraay ko maanan a hapakayraan papadama tisowanan misaˈosi. Nengnengen ko IKA.
ˈOsien ko Loma 13:13 ato 1 Korinto 10:31, 32. Maherek miˈosi to kahacecay a sinael, ikor lengoen ko ilaenoay a salicay:
-
Samaanen iso kalasaka dademak konini safalod, mahemeken ko Kawas to pisaˈosi iso?
Kahacecay Krisciyang mamisaˈosi to kakomaen to epah hokira. Soˈlinto komaenay to epah cingra, kawra cowa ka corok sa to kaitiraan a komaen
5. Saˈosien to hahakowa ko mikaenan a epah
Ano misaˈosiay kiso komaen to epah, haratengen soˈliˈlin mihaydaay ci Yihofa to tamdaw komaen to epah, kawra micongeday Cingra to pakidemay komaen to epah. Misamaanay hani? ˈOsien ko Hosiya 4:11, 18, ikor lengoen ko ilaenoay a salicay:
-
Ano pakinali komaen to epah wa ira ko manan a teloc hani?
Sasamaan ko hademak no mita, hongaˈ caka pakinali ko mikaenan a epah? Mafanaˈ kita to tolas no niyah. ˈOsien ko Taneng 11:2, ikor lengoen ko ilaenoay a salicay:
-
ˈAyaw no kakomaen to epah saˈosien ko hatolas, hano o citanengay a pakayraan?
6. Remoen ko haliepahay a nanaman
Nengnengen ko cecay tamdaw samaanay misawad to haliepahay a nanaman? Nengnengen ko IKA, ikor lengoen ko ilaenoay a salicay:
-
Itini i ika ci Temite komaenho to epah ikor samaanayto cingra?
-
Tangsolay masawad ningra ko haliepahay a nanaman han?
-
Saikor samaanayto masawad ningra ko epah hani?
ˈOsien ko 1 Korinto 6:10, 11, ikor lengoen ko ilaenoay a salicay:
-
O malasangay pairaay to manan pakidemay a teloc?
-
O haliepahay a tamdaw hano ngangaˈay mafalic?
ˈOsien ko Matay 5:30, ikor lengoen ko ilaenoay a salicay:
-
O sowal no sinael ketonen ko cecay kamay sanay, tatodong i, o kakinapatay kita mifalah, pakahemek ci Yihofaan. Ano misaˈicelay kiso misawad to epah, ngangaˈay misamaan to demak hani? a
ˈOsien ko 1 Korinto 15:33, ikor lengoen ko ilaenoay a salicay:
-
Ano haliepahay ko widang no mita, minaol cangranan, wa ira ko manan pifiyor kitanan hani?
ANO IRA KO MILICAYAY: “Cowa ko ngangaˈay komaen to epah sanay ko Fangcalay Cudad han?”
-
Sasamaan ko caˈof iso?
KALIMLAAN
O epah naitiniay i Kawas a sapakaolah, o sapafeli Ningra to tamdaw, kawra mirikecay Cingra to haliepahay ato malasangay.
Lomalen
-
Pakayni to epah, samaanay ko sowal no Fangcalay Cudad?
-
O pakinaliay komaen to epah pairaay to manan a teloc?
-
Itini to kakomaen to epah a demakan, sasamaan kita misakangodo to saˈosi no tao?
MALALITINGAY A LALAKAW
Pakayni to komaenay to epah, o kapah tamdaw sasamaan mataneng ko pisaˈosi?
O maanan a pakayraan papadama to tamdaw misawad to haliepahay?
“Maedeng ko Kakomaen to Epah Sasamaan a Madangar Hani?” (Mikecolay, 2010/1/1)
O Krisciyang ngaˈayay matatekoh to takid han?
Samaanan ningra misawad ko epah? Nengnengen “Awaay ko Tolas Ako Komaen to Epah” o nalifetan no tamdaw.
“Minanam to Fangcalay Cudad a Mafalic ko Nokaˈorip” (Mikecolay, 2012/5/1)
a O haliepahay a tamdaw, alatek misaaliay to sapadama no ising. O sowal no ising, o mahaenay a tamdaw cowa kangaˈay miˈiniˈinip aca to epah.
