Malacafay kita to salikaka i, wa mahecad to harateng no Israil a Hongti ci Tafiti. Sanay cingra: ‘Malacafay makakedec ko salikaka, tada makapahay, kahemekanto!’ (ˈOlic 133:1) Cowa ka ira sa ko hatiniay a sakakedec, ao misaaliay to mamisaˈicel ko cecacecay a tamdaw.

1. O finawlan no Kawas iraay ko manan mikiriwiˈay a tahapinangan hani?

Ano tayra kiso i roma kitakit mirienang to saˈopo i, soˈlin cowa ka fanaˈ mitengil to itiraay a sowal, kawra hato minokayayto i lomaˈ ko harateng iso. Misamaanay hani? Samanen ano icowato kita i, misaka dademakan ita ko mahecaday a mitepangan lalakaw no Fangcalay Cudad, misaˈicelayho masasiolah. Ano icowato ko pikilomaˈan ita, ‘micangacangay kita to ngangan ni Yihofa, makakedec malacecay a midoko Cingraanan.’​—Cifaniya 3:9, sapatongal a lalakaw.

2. Sasamaan kiso micowat to makakedecay?

Palimoˈotay ko Fangcalay Cudad kitaanan: ‘Mikifalocoˈ fanekfek a masasiolaolah.’ (1 Pitiro 1:22) Sasamaan kita misaka dademak hani? Ceriden miharateng ko kangaˈayan no tao, hamaan pamotek sa minengneng to dangoc no tao. Cowa ko kaolahan aca ita a tamdaw ko sacafayen, tanamen hena misaˈicel mafanaˈ to romaroma salikaka. Saˈicelenho palahdaw ko misakakinihay to tao.​—ˈOsien ko 1 Pitiro 2:17. a

3. Ano cowa ka hecad ko harateng to salikaka i, sasamaan ko demak ita hani?

Soˈlin makakedecay malacecay kita, kawra, kita maemin cowa ko malefotay a tamdaw. Nolatekay patoleday kita to tao, mangalef midokaˈ ko tao kitaanan. Mahecaday ko harateng no tao i kitaanan alatek. Mihaenay i, sanay ko Fangcalay Cudad, ‘kapadadotoc . . . nai falocoˈ a masasodosodod. Samaanay ci Yihofa nai falocoˈ a misodod tamowanan, mihaen kamo nai falocoˈ a misodod to tao.’ (ˈOsien ko Kolosay 3:13.) Maceriday kita pakararaw ci Yihofaan, kawra makalimay Cingra misodod kitaanan. Mansa, misaaliay ci Yihofa kitaanan misodod to salikaka. Ano midokaˈay kako to tao sa kiso i, kalikien talaˈayaw a misaysay.​—ˈOsien ko Matay 5:23, 24. b

 CALEPEN MIKADKAD

4. Remoen ko misakakinihay

Maolahay kita to polong a salikaka, kawra nolatekay cowa ka madolo micada to cowa ka hecad ko harateng to niyah a tamdaw. Sasamaan miremo toniya pasangar hani? ˈOsien ko Dmak 10:34, 35, ikor lengoen ko ilaenoay a salicay:

• Micadaan ni Yihofa ko masasiromaay a tamdaw malo Misawacayay Tamdaw ningra. Ano malacafay kiso to cowa ka hecad ko lalengawan a salikaka i, sasamaan mitodong ci Yihofaan hani?

• Itini kitiraan iso i, o masamaanay a misakakinihay harateng, wa mifiyor to pinengneng iso to tao hani?

ˈOsien ko 2 Korinto 6:11-13, ikor lengoen ko ilaenoay a salicay:

• Oya cowa ka hecad ko lalengawan a salikaka, sasamaan kiso mitongal to kalawidang cangranan hani?

5. Nai falocoˈ a misodod, micowat to rihaday

Malefotay ci Yihofa, cowa ka raraw. Misodod Cingra kitaanan, cowa ka pisaali to sapisododaw ita Cingranan. Mihaen Cingra, sahtoay, o nai falocoˈay a makalim. ˈOsien ko ˈOlic 86:5, ikor lengoen ko ilaenoay a salicay:

• Pakayni i misododay, patirengay ci Yihofa to maanan a makapahay a taˈarawan?

• Makalimay misodod ci Yihofa kitaanan, mafanaˈ tonini a demak matemeray ko falocoˈ iso han? Misamaanay hani?

• Itini masamaanay a pakayraan, cowa ka dolo kita rihaday ko kalalaˈed to tao?

Sasamaan kita mitodong ci Yihofaan, mitafo to makakedecay malacecay ato salikaka? ˈOsien ko Taneng 19:11, ikor lengoen ko ilaenoay a salicay:

• Ano pakararaway ko tao tisowanan, anca madokaˈay ko falocoˈ sa kiso i, samaanen iso misalof ko demak hani?

 Ano pakararaw kita to tao i, sasamaan ko demak ngaˈ? Nengnengen ko IKA, ikor lengoen ko ilaenoay a salicay:

• Oniya fafahiyan salikaka samaanay a micowat to rihaday?

 KALIMLAAN

Makalim a misodod kiso to tao, maolah to polong a salikaka, wa ngaˈay micowat to makakedec malacecay ko kasakopang.

Lomalen

• Sasamaan kiso miremo to misakakinihay hani?

• Ano cowa ka hecad ko harateng iso ato roma salikaka i, sasamaan ko demak iso hani?

• Itini misodod a pakayraan, patirengay ci Yihofa to makapahay a taˈarawan. Sapitodongaw kiso Cingranan han? Misamaanay hani?