Sapatongal Lalakaw
1. Hapinangen ko Taˈangayay Papilon
Itini Fangcalay Cudad, oya ‘Taˈangayay Papilon’ hananay a fafahiyan i, o polong a mararaway pihakelongan ko mitoroˈan, hano mafanaˈ kita hani? (Paˈarawan 17:5) Haratengen ko ilaenoay pina kalimlaan:
-
Miedefay i polong no cikiw ko pifiyor ningra. Mitadtaday ko Fangcalay Cudad maroˈay ko Taˈangayay Papilon itini i fafekang no polong no ‘tamdamdaw, kasakitakit,’ hanaca ‘mikowanay to kalo hongti no hekal.’—Paˈarawan 17:15, 18.
-
Cowa ko mirikecay anoca cowa ko misasingdiay cingra. Ikor no mapalaˈafo cingra i, ‘kalo a hongti no hekal’ ato ‘misasingdiay tamdaw’ iraayho materek.—Paˈarawan 18:9, 15.
-
Miolatay cingra to tamdaw pakayni to Kawas. Sapilifokaw cingra to hafay ato romaroma to sakaciepocaw makakadepay to sifo no hekal, mihaenay o tasalamaan fafahiyan hananay cingra. (Paˈarawan 17:1, 2) Miolatay cingra to polong no hekal a tamdaw, ˈalomanay ko tamdaw pakayniay cingranan ko sakapatay a malakis ko remes.—Paˈarawan 18:23, 24.
Patikol i saka 13 fedengan saka 6 kalimlaan
2. O Kasadakan ni Misiya a Tatokian
Pairasolay ko Fangcalay Cudad, ˈayaw no masadak ci Misiya wa ira ko 69 a 7 mihecaan a tatokian.—ˈOsien ko Taniil 9:25.
-
O 69 a 7 mihecaan ihacowaay a misatapang? Mikitiniay i ˈayaw no kongyen 455 miheca misatapang. Itiya, minokayay ci Nihimiya tayra i Yirusalim, ‘mitomadaw, miliyaw patireng’ tonini a niyaroˈ.—Taniil 9:25; Nihimiya 2:1, 5-8.
-
O 69 a 7 mihecaan ihacowaay mahererek? Mikitini ˈayaw no kongyen 455 miheca misatapang, mataˈlif ko 483 miheca (69x7) tahiniayto i kongyen 29 miheca. a Toniya mihecaan o picadaan ni Yis to paputisem malo Misiya.—Luka 3:1, 2, 21, 22.
Patikol i saka 15 fedengan saka 5 kalimlaan
3. Milingatay to Remes a Sapaising a Pakayraan
Cowa pacomod ko Krisciyang to remes, cowa pakiyaho to remes. Pakayni i misakadademak to remes no niyah a sapaising a pakayraan, samaanay ko saaroˈan no Krisciyang hani? Iraay ko roma pakayraan cowa ko mamicada ko Krisciyang, tinakoen salakaten mihoped ko remes no niyah, sakadademaken itini pitokadan.—Limoˈot 15:23.
Nikawrira, o roma sapaising a pakayraan micadaay ko Krisciyang alatek, mahawpay ko pikingsa to remes, tano kikayen a misawsaw ko remes no podo, pacamoren to cemel patingalaw ko remes, tano kikayen misawsaw ko masadakay a remes patikolen i tireng. Itini mitokaday, pikingsa no ising, anca romaroma sapiadah a pakayraan, sasamaanen misakadademak ko remes no niyah, o kahacecay a Krisciyang wa o niyah ko mamisaˈosi tonini a demak. Roma i, midemak ko kahacecay ising to sapaising a pakayraan cowa ka lecalecad alatek, mihaenay i, ˈayaw no micada ko Krisciyang to sapaising a pakayraan i, o aihekal a cipinang to sasamaanen misakadademak ko remes no niyah. Haratengen ko ilaenoay a salicay:
-
Ano mapahadakay ko remes i tireng no mako i, alatek tomerepay ko cecay liyad, wa micada ko makapahay falocoˈ ako tonini han? Onini a remes kamayanayho i tirengay no mako, anca oha ‘tataktaken i sera’ konini a remes han?—Limoˈot 12:23, 24.
-
Itini i pidemak to cecay paisingay a pakayraan, ano diyosen a pasadak ko pina remes ako, maharekto milosimet patikolenho i tireng anca sakadademaken i dokaˈ no niyah, o mapahatatanamay no Fangcalay Cudad a makapahay falocoˈ ako mamakoracho han? Anca o mamicadaho kako to mahaenay sapaising a pakayraan hokira?
Patikol i saka 39 fedengan saka 3 kalimlaan
4. Masasieked
Cowa pakalalok to Fangcalay Cudad masasieked ko mararamoday, ihkalay somowal o mararamoday caay ka pakayni i masasieked a irato ko fadangalan miliyaw ciraramod. (1 Korinto 7:10, 11) Kawra ilaenoay a pakayraan, o roma Krisciyang alatek ciharatengay to sakasasiekedaw:
-
Pedeteng sa caka paliliˈ to paro no lomaˈ ko faˈinay: Manaˈay ko faˈinay paliliˈ to paro no lomaˈ, telocto i, awato ko sakaˈorip no paro no lomaˈ.—1 Timoti 5:8.
-
Pakidemay a makariˈang a masitiˈ: Makariˈang a masitiˈ ko raramod, irato ko sakatatiih no tireng anca sakapatayaw sato.—Kalatiya 5:19-21.
-
Mipalakay to kakalaˈed aci Yihofaan: Tahalifa to pisafelit no raramod, hato awaayto ko pakayraan midoko ci Yihofaan anca midofdof to sarikec Ningra.—Dmak 5:29.
5. O Pisalisinan ato Kaacangan a Demak
O Krisciyang cowa ko mamirienang to cowa ko kahemekan ni Yihofa a pisalisinan a demak. Ano maacang ko tao to pisalisinan i, mamitoor ko Krisciyang to mapahatatanamay no Fangcalay Cudad a makapahay a falocoˈ, misaˈosi to sasamaan misiˈayaw. Haratengen ko ilaenoay pina a tinakoan:
-
Ira ko pasowalay a pakahemek tisowanan i pisalisinan a romiˈad. Ngaˈayay kantangen iso a miakoˈid. Ano sakafanaˈaw ko tao to hano ecaka maacang kiso i pasalisinan a romiˈad i, ngaˈayay tadtaden iso cingra to lalangian.
-
Ano cowa ko Misawacayay Tamdaw ni Yihofa ko raramod iso, halamhamay tisowanan pacafay cingranan itini tonini pisalisinan a romiˈad malacafay to salawina a mitahka. O makapahay falocoˈ iso ano mihaiyay tisowanan a tayra i, paˈayawen a mitadtad ko raramod iso, itiya cowa ko mamirienang ko niyah to maamaan milingatay to mararaway pihakelongan a nanaman.
-
O tawki no miso i pisalisinan a romiˈad pakahemekay tisowanan pafeli to payci. Mamanaˈay kiso milayap han? Awaay ko pinang. Ngaˈayay saharateratengen iso: O harateng no tawki palilam to payci o masalalomaˈay nora kaacangan a demak han? Anoca o sapiakoˈid ningra tisowanan to roray a matayal han?
-
Itini pisalisinan a romiˈad ira ko patelongay tisowanan. Saan ko sowal no patelongay a tamdaw alatek: “Mafanaˈay kako cowa pisalisin kiso, kawra halamahamay kako micada kiso tonini a sapatelong.” Ora tamdaw paihkalay to ngaˈayay harateng no niyah alatek. Kawra sapilifetaw cingra to tatanektek kiso midama to pihakelongan hokira, anca tano hatiniay a pakayraan papirienang tisowanan to kaacangan i pisalisinan romiˈad. Maharek kiso misimsim to araaw nora tamdaw ikor, wa o niyah ko misaˈosi to mamicada to sapatelong hokira. Ano samaanto ko pisaˈosi, makalimay kita awa ko dangoc no makapahay falocoˈ no niyah, padadotoc madimadi ci Yihofaan.—Dmak 23:1.
Patikol i saka 44 fedengan saka 1 kalimlaan
6. Midengaay a Adada
Ano ciolahay kita to tamdaw, wa misaˈicel eca ka padenga to adada i taowanan. Ano ira ko midengaay a adada ita i, anca alatek madengaay ko niyah sa kiso, wa misinanot ngaˈ. Ano mihaen kita, o mitooray to safalod no Fangcalay Cudad ‘maolahay to tamdaw mahecad mikaolah to niyah.’—Loma 13:8-10.
Ano ihkalen ko sowal i, sasamaan misaka dademak to ‘maolahay to tamdaw mahecad mikaolah to niyah’ a sapalimoˈot hani? Ciadadaay a tamdaw hamaan miingid to tamdaw, tinakoen, matatatiw to kamay, mitakec anca mihangot. Ano ciharatengay to paro no lomaˈ i, kawra eca ka pitahidang to ciadadaay a tamdaw a palafang, o ciadadaay a tamdaw oha mamafanaˈ tonini a pakayraan, hamaan a miroroh to tao. Ano mamipaputisem ko ciadadaay a tamdaw, talaˈayawen mifanaˈ ko malohemay malitengay, mihaen i, wa ngaˈay songilaˈen a milimasmas, madipot ko roma micadaay to paputisem a tamdaw. Ano matefin no cecay tamdaw ko midengaay a adada, wa madenga alatek, ano saka cicafayaw cingra i, i saˈayawen a mikinsa ko tireng, mihaen i, o ‘ciharatengay to tao,’ ‘cowa ko niyah aca ko miharatengan.’—Filipi 2:4.
Patikol i saka 56 fedengan saka 2 kalimlaan
7. O Misasingdiay ato Holic a Salicay
Ano matatelek kita to tao pakayni i singdi ato payci a pakayraan i, ano ecato ko Krisciyang i, pairaen ko matatelekay a mitilidan ngaˈ, mihaen i, maliyas ko adihayay a pasangar. (Yirimiya 32:9-12) Soˈlin mihaen i, o kalalaˈed no Krisciyang pakayni i payci alatek ira ko cowa ka hecad a harateng. I kalo a demakan, o matatelekay a tatosa, itini i awaay ko micapiday a tamdaw a pakayraan i, tano dipayalay a pakayraan misaysay to pasangar nangra.
Kawra, ano pakidem ko pasangar i, tinakoen milingatay to misakaniway anca mipaorafay, wa sasamaan kita misaysay hani? (ˈOsien ko Matay 18:15-17.) Toloay ko mihadakan ni Yis a pakayraan:
-
Tatosa aca misaysay to pasangar.—Nengnengen ko saka 15 sinael.
-
Ano caka saysay ko pasangar i, tahidangen ko cecay tosa matenesay a Krisciyang patihi tisowanan a milengo to tao.—Nengnengen ko 16 sinael.
-
Ano caka saysay i, ngaˈ ngaˈay tahidangen ko malohemay malitengay no kasakopang.—Nengnengen ko 17 sinael.
Ano hangangaˈay i, aka patayraen i hoing mieko ko salikaka, ho caka mipalak to ngangan ni Yihofa ato Kasakopang. (1 Korinto 6:1-8) Kawra, alatek o roma a demakan wa patayraen i hoing a misaysay, tinakoen malalikongay, mitafo to sapidipot to wawa a fadangalan anca o sakaˈorip no malalikongay, sapatefoc no pawsiyen, misingsi to malahdaway ko hafay, paliˈayaw misilsil to hafay no niyah. Misaka dademak ko Krisciyang to hoing, misaˈicel tano dipayalay a misaysay to lacongis, cowa ko misafelitay to safalod no Fangcalay Cudad konini.
O roma pakayraan milingatay to pakidemay a raraw, tinakoen miˈodangay, misamsamay anca miˈodangay to wawa, midokaˈay to tireng no tao, mitakaway, mipatayay. Ano mifekad ko hatiniay a demak, fanaˈen no Krisciyang ko dimeng, cowa ko misafelitay to safalod no Fangcalay Cudad.
a ˈAyaw no kongyen 455 miheca tangasa ˈayaw no kongyen 1 miheca, komoden 454 miheca, naitini ˈayaw no kongyen 1 miheca tangasa kongyen 1 miheca, cecayay aca a mihecaan (samanen awaay ko 0 a mihecaan), naitini kongyen 1 miheca tangasa kongyen 29 miheca, komoden 28 miheca. Ano patatekoen a mikomod kora mihecaan i, 483 miheca.