Ilalomaˈ no kahacecay pihakelongan iraay ko soˈlinay ko falocoˈ a tamdaw. Maˈaraway no Kawas ko matiniay a tamdaw, ciharatengay Cingra cangranan. Nikawrira, iraay ko romaroma a tamdaw, mikalasaka dademakay to pihakelongan midemak to mararaway a demak. (2 Korinto 4:3, 4; 11:13-15) O safanaˈ no sinpong, o roma mihakelongay tamdaw mikalonaay a misamsam to kaemangay, micapiday to lalood ato kaciˈangian a demak, palaˈafo a mipatay to roma finacadan. Maˈaraw ko mahaenay a demak, o misasoˈlinay a midoko to Kawas a tamdaw, tada masomaday ko falocoˈ nangra!​—ˈOsien ko Matay 24:3-5, 11, 12.

O soˈlinay a pihakelongan paˈdilay to Kawas. O mararaway pihakelongan kapiliˈan no Kawas. Ci Yihofa miharatengay to matatodong ko nika fanaˈ no tamdaw i Cingranan, ˈarawhan i, mararaway a pihakelongan, cowa pisalalangian to Fangcalay Cudad pasifanaˈ to tamdaw. Patinakoen, pakayni to o masamaanay ko Kawas, ato samaanayto ko mapatayay a tamdaw, sahto o mararaway ko sapasifanaˈ nangra.​—ˈOsien ko Patnakay 9:5, 10; 1 Timoti 2:3-5.

O sowal no romaroma mihakelongay, maolahay kako to Kawas sanay, ˈarawhan i, o hekal ni Satan ko kaolahan nangra, cowa ko mamasaˈfit nangra ko Kawas. (Yakop 4:4) Itini i Fangcalay Cudad, o polong a mararaway pihakelongan o “Taˈangayay a Papilon” hananay. Nolitengan a Papilon niyaroˈ itiniay i ikor no Lenlen ni Nowa a mapatireng, o pipowaran no mararaway a pihakelongan. Mangataayto, talifahal wa saan a mapalaˈafo no Kawas ko polong a misaˈfitay ato miroeroay to tamdaw a pihakelongan. Tada o ngaˈayay a lihaf konini!​—ˈOsien ko Paˈarawan 17:1, 2, 5, 16, 17; 18:8.

Iraayho ko roma ngaˈayay a lihaf han? Iraay. Itini icowacowa, ilalomaˈ no mararaway a pihakelongan, iraay ko misasoˈlinay ko falocoˈ a tamdaw. Cowa ka mapawan ni Yihofa cangra. Pairaan  no Kawas ko toki nangra minanam to soˈlinay kimad no Fangcalay Cudad, makakedec cangra a midoko Cingranan.​—ˈOsien ko Mika 4:2, 5.

Tada ciharatengay ci Yihofa toya maolahay to soˈlinay kimad, makapahay ko falocoˈ a tamdaw. Palimoˈot cangranan papiliyas to mararaway a pihakelongan. O tamdaw ano maolahay to Kawas, o mamakahi a mifalic, pahemek to Kawas.​—ˈOsien ko Paˈarawan 18:4.

Itini saka 1 hahekalan, ta matengil no misasoˈlinay ko falocoˈ a tamdaw ko mitenakan no Krisciyang a ngaˈayay lihaf i, mahemekay cangra a micada. Micadaay to sapasifanaˈ ni Yihofa, mifalic to pinangan, iraayto ko patosokan no kaˈorip ato tokel nangra, lipahakayto maˈorip cangra. Cangra i, o ngaˈayay taˈarawan no mita anini, samanen micadaan nangra ko ngaˈayay lihaf, paisalakatan ci Yihofa i nokaˈorip.​—ˈOsien ko 1 Tisalonika 1:8, 9; 2:13.

Ci Yihofa mitahidangay toya miliyasayto to mararaway pihakelongan a tamdaw, micomod i paro no lomaˈ Ningra. Ano cadaen iso ko sidaˈitay a pitahidang ni Yihofa i, ngangaˈay malawidang Ningra, kalacafay to ciolahay a salikaka midoko to Kawas, ira ko tokel milifok to tahadaˈocay a ˈorip.​—ˈOisen ko Marko 10:29, 30; 2 Korinto 6:17, 18.

Papalaˈafoen no Kawas ko polong a mararaway a pihakelongan, tada o ngaˈayay a lihaf koni. Itini paro no kakarayan, cowato ko mamaroero ko tamdaw. O mararaway pihakelongan cowato ko misiwala to tamdaw, cowato ko miliwasak to tamdaw. Itiyato i, cecacecay a tamdaw mamakedec a midoko to tadacecayay a soˈlinay Kawas.​—ˈOsien ko Paˈarawan 18:20, 21; 21:3, 4.