Ci Yis cowa ka lecad to kalo a tamdaw, ˈayaw no tayni i hekal cingra a mala tamdaw i, o ˈadingoan ko tatirengan itiniay i kakarayan cingra. (Yohani 8:23) Ci Yis o saˈayaway a nisangaˈan no Kawas, ikor padamaay to Kawas a misangaˈ to maamaan. Tona o Kawas cecay ko misangaˈay ci Yisan, mankora o “edengan a Wawa” no Kawas han cingra. (Yohani 1:14) Mitaypiyaway to Kawas ci Yis a pasowal, mankora o “Sowal” han cingra.​—ˈOsien ko Taneng 8:22, 23, 30; Kolosay 1:15, 16.

Naitiniay ci Yis i kakarayan tayni i sera, telian no Kawas ko ˈorip ningra i tiyad no limocedan a Mariyaan. Mankora, o ˈorip ni Yis cowa ko naitiniay i kalo a faˈinayan. (Luka 1:30-35) Tayni i sera ci Yis i, (1) o papasifanaˈ to tamdaw mafanaˈ to Kawas, (2) patireng to taˈarawan no mita, ho mafanaˈ kita to sasamaan a pakahemek to Kawas, soˈlin tahalifa kita to pasangar cowa ka pisawad, ato (3) patafang to malefotay a ˈorip ningra malo “sapatefoc.”​—ˈOsien ko Matay 20:28.

O sapatefoc hananay i, o sapitedalaw to tamdaw nai patay a sapaˈaca. (Kasadakan 21:29, 30) Misangaˈ ko Kawas to tamdaw isalakat i, cowa koha mamaliteng ato mamapatay. Hano mafanaˈ kita hani? O sowal no Kawas to lalitengan ita ci Ataman, ano “mararaw” cingra i, o mamapatay cingra sanay. Mankora, ano caka mararaw ci Atam i, cowa ko mamapatay cingra. (Satapangan 2:16, 17; 5:5) Sowal no Fangcalay Cudad, o patay “mikitiniay” ci Ataman ko “sakaira i hekal.” Mararawto ci Atam i, o patay ko tefoc, mihaenan ni Atam parocok ko  polong a teloteloc to raraw ato patay. Orasaka, misaaliay kita to sapatefoc to sapilidongaw to ˈorip ita, hongaˈ cato ka patay kita.​—ˈOsien ko Loma 5:12; 6:23.

Cima ko ngangaˈay pahadak to sapatefoc, toha sakalidongaw ita pakaliyas to patay hani? O tamdaw cowa ka lefot ciraraway a maemin, caay ko ngangaˈay patado cingra a micakay to ˈorip no tao.​—ˈOsien ko ˈOlic 49:7-9.

Ci Yis cowa ka lecad kitanan, o malefotay cingra, cowa ka pidemak to mararaway, mankora cowa ko mamapatay pakayni i raraw no niyah. ˈArawhan i, pakayniay i raraw no mita, kinafalah to ˈorip. Ocoran no Kawas ci Yis tayni i sera, mapatay saki kitanan, paihkalay ko Kawas to olah kitanan. Ci Yis midofdofay to Wamaan, pakayni i raraw ita pasadak to sapatefoc, paihkalay cingra to olah kitanan.​—ˈOsien ko Yohani 3:16; Loma 5:18, 19.

Nengnengen ko ika Misamaanay Hano Mapatay ci Yis Hani?

Ci Yis ya itiniho i sera i, miadahay to adadaay, patikol a paˈorip to mapatayay, padama to misemsemay tamdaw. Pakayni toniya kihcod a demak, patalahkalay ci Yis ano ikor, o mamihaen cingra a padama to polong midofdofay to Kawas a tamdaw. (Matay 15:30, 31; Yohani 5:28) Mapatay ci Yis i, patikolan no Kawas paˈorip cingra, malo ˈadingoan a tatirengan. (1 Pitiro 3:18) Ikorto i, maroˈay i kawanan no Kawas, mitala to Kawas a pala Hongti cingranan, mikowan to polong no cikiw. (Hipray 10:12, 13) Anini i, itiniay i kakarayan a mala Hongti ci Yis, o sikawdan ningra itiniay i paro no kakarayan mitenak to ngaˈayay a lihaf.​—ˈOsien ko Taniil 7:13, 14; Matay 24:14.

Mangataayto, Hongti ci Yis o papalahdaw to tatiihay a tamdaw, palasawad to maamaan a pades. Ano pakasoˈlin ci Yisan a midofdof cingranan i, o mamilifok to midaˈocay a ˈorip itini i seraay a lakoing.​—ˈOsien ko ˈOlic 37:9-11.